10 Kaahu hu musyenge a Damaseko, hwaba na muyihi mumosi nduhi a nde Ananya. Pfumu ayamonehele na nde mu imono-miisu na aleeli nde: «Ananya!» Nde ayahuli: «Me ndyowu, Pfumu.» 11 Pfumu aleeli nde: «Yene masulubete mu nzila yi bali mu uteele "nzila yi yasungama", mu nzo a Yuda. We fuula muutu wu bubaateele Sahuli, musi Tarese. Nde mu usambila ali mu taangu yi. 12 Mu imono-miisu, nde ni umono bahala limosi nduhi a nde Ananya, mu ukoto mu nzo a nde na mu usuusala nde myoho, mana miisu ma nde madibuma.»
13 Ananya afutili: «Pfumu, baatu ba balahi baabehele me tsangu a muutu mo wunuuwu na uyabisa ma mabi ma nde ali mu uvangila ba we bangidi babali hu musyenge a Yeruselemi. 14 Na nde miiya huni na lituma li bakuutu ba bangaanga ba Nzambi baaviidi nde, mu ukaanga boosi ba bubaasambila we.» 15 Ka Pfumu afutili huli Ananya: «Yene, ka me miitsoolo nde mana me tsalila nde. Ni nde uyayabisa nduhi a me huli boosi ba baavele Bayudaayo na bapfumu ba bo, napa huli bisu Isereli. 16 Me tsa mweese nde me mwakulu, mapasi moosi ma nde humono mu nduhi a me.»
17 Humbisa, Ananya ayeni, na akoti mu nzo. Nde asuusili Sahuli myoho, na aleeli nde: «Sahuli, mwaana a ngu a me, Pfumu Yisu wu ayamonehele na we mu nzila yi we akayiila mu yo, miitsindaha me huli we. We sa bwemono na we sa luula mu Livupu la Ngidi.» 18 Mu mawasa, mu miisu ma Sahuli, bisiha bi byafwanina na mahahala byabwidi, na miisu ma nde maadibumi. Buuna nde atelimi, na ayaki tondihili. 19 Titswene nde adidi na abahi mifudi.
Sahuli alongisi Tsaangu Yimbwe hu musyenge a Damaseko
Sahuli avyosi mwa bilumbu na bayihi ba baaba hu Damaseko.