Nziili Mukuma wu liyalala na wa moonyi mu tsi
1 Ŋa mbandu hwaba na Mukuma. Mukuma aba itwadi na Nzambi. Mukuma aba ni Nzambi. 2 Buuna ŋa mbandu, Mukuma aba itwadi na Nzambi. 3 Byosi bi Nzambi havangi, nde avangi byo mu Mukuma. A hu li na isiha hi nde havangi hwavele Mukuma ve1.3 Mba 1.3; Mkg 33.6 . 4 Mukuma aba ni suhu la moonyi. Moonyi mo wuuna aviidi liyalala huli baatu boosi. 5 Liyalala libaayalusa piipidi. Ka piipidi a yaatwali udimasa lo ve.
6 Nzambi atsindihi muutu nga nduhi Yowani. 7 Nde ayidi we mbangi, mu uyata imbangi mu liyalala, mana baatu basa imiinu mu lo. 8 Yowani a habeedi liyalala ve. Ka nde ayidi mu uta imbangi mu liyalala. 9 Liyalala mo liina laaba ni liyalala la mbuli a mbuli, li lili mu uya mu tsi. Lo lili mu uyalusa baatu boosi.
10 Mukuma aba mu tsi, na Nzambi avangi tsi mu nde. Ka baatu ba tsi a baadihuli nde ve. 11 Nde ayidi huli baatu ba nde, ka baatu ba nde a baayaki nde ve. 12 Ka boosi ba baayaki nde, na huli boosi ba baasiidi imiinu mu nde, nde aviidi bo muswa mu uba baana ba Nzambi. 13 Bo a bali baana ba Nzambi mu makila, buuve mu litondo li musunya ve, a tso mu litondo la muutu ve. Ka bo baabutimi baana ba Nzambi mu litondo la nde.
14 Mukuma akituhi musunya na nde atsahili ŋa hati la bisu1.14 Pal 33.6, wu aluula mu hyese na imbuli. Bisu laakengisi muyusu a nde, muyusu wu Mwana wu livingu ali mu uyaka huli Taata a nde. 15 Yowani atiili nde imbangi na asiidi ileedi mo hinihi: «Ni mu nde me anzambili ŋa me andeeli bunuubu: "Nde uya humbisa a me, ka nde akulala me, mu tooni ati nde abeedi moonyi tehele babuta me."» 16 Bisu boosi laayaki ikuuku hi busina bwa hyese hya nde. Nde ayitili bisu lisyeme li lilahi. 17 Ni mbuli, Nzambi asalili Moose1.17 Pal 31.18; 34.28 mu uva bisu Mikele. Ka ni mu Yisu Kristo, Nzambi habehili bisu hyese na imbuli bya nde. 18 A hu li na muutu wu amiimono Nzambi1.18 Pal 33.20 ve. Ka ndulu Mwana wu livingu, wu li Nzambi na wu ubaatsahala ŋa tsoho a Taata, ni nde amweese bisu buni Nzambi ali.