Yowani 20

Yisu miimonehele huli Mariya musi Magadala

11 Mu taangu mo yiina, Mariya aba hu mbadi ŋa kotili a ngila, na nde aba mu ulila. Bu nde haaba mu ulila, nde abaandimi mu utala hutso a ngila. 12 Nde amoni bapofi boole balwata bikutu bi bifuuka, baatsahala ŋa mbuha yi baaba baasuusa nyutu a Yisu. Pofi mumosi hu tsyelo mutswe, wuna hu miilu. 13 Bapofi baafuuli nde: «Maama, mu hima we li mu ulila?» Nde afutili bo: «Mu tooni ati baamiimasa Pfumu a me, na me a hanzaabi huni baayasuusa nyutu a nde ve.»

14 Bu nde hakaleele buuna, nde akinguhi, na nde amoni Yisu mu tele, hwavele uyaaba ti ni Yisu. 15 Yisu afuuli nde: «Maama, mu hima we li mu ulila? We na li mu usaha?» Bu nde hakatsima ti muutu wu, aba musali a wooto, mukaasu aleeli nde: «Pfumu, tso ni we biti nde, leele me huni we suusi nde, na me nzapolo nde.» 16 Yisu ni uleele nde: «Mariya!» Nde akinguhi na aleeli nde mu Ibeleho: «Rabuni!» Mbindulili ni ti: «Mulongisi!»

17 Yisu aleeli nde: «A habembe me! Mu tooni ati me kini a hapaata huli Taata a me ve. Ka yene huli baana ba ngu a me, na leele bo ti, "Me aka mu ukumasa huli Taata a me, wu li kaka Taata a benu. Me aka mu ukumasa huli Nzambi a me, wu li kaka Nzambi a benu."» 18 Mariya musi Magadala ayayabisa huli bayihi: «Me miimono Pfumu!» Na nde ayabisi bo mambu ma Yisu haleeli nde.