33 Ŋa baayato ŋa mbuha mosi yi baakateele «Ibanga», masadaadu maakomini Yisu ŋa kuruwa, nzila mosi na biyahudi bi byole. Mumosi ŋa mbahala a Yisu, wuna ŋa kaasu a nde. 34 [Yisu aleeli: «Taata, sa bo kolo-kolo, mu tooni ati, bo a bayabi ma bali mu uvanga ve.»] Bo baatiidi ngodo mu ukaba bikutu bya nde. 35 Konge a baatu yaba ŋana na yakatala. Bakuutu ba Bayudaayo, bo, baakakwede Yisu na baakaleele: «Nde fuuhisi bakima, nyaha nde afuuhasa nde mwakulu. Tso mbuli nde ni Kristo, wu Nzambi hasoolo!» 36 Masadaadu ka maakakwede nde na maayasusaha mu uva nde vinye a nganyi. 37 Na maaleeli: «Tso we ni pfumu Bayudaayo, nyaha we fuuhasa we mwakulu!» 38 Ŋa yulu mutswe a nde hwaba na baya libaasonehe bu: «Nde wunuwu ni pfumu Bayudaayo.»

39 Mumosi mu biyahudi bi baakomini ŋa kuruwa, akatuha Yisu na ubaaleele: «We ali Kristo ve? Fuuhasa we mwakulu na bisu kaka!» 40 Ka hya byole hyasyembi wuna na uleele: «We tso boomo bwa Nzambi ve? We wu uli mu tsyembili mosi na nde! 41 Mu bisu a we, tsyembili mo yiniiyi yayelemene. Mu tooni ati bisu a we, tsyembili mavaanga ma bisu a we lili mu uyaka. Ka nde wunuwu a hasa lilibi tso limosi ve.» 42 Titswene nde abweleele: «Yisu, yibwala me moonyi, ŋa bu ubyalisa we mu Ipfumu hya we.» 43 Yisu afutili nde: «Mu mbuli me ndi mu undeele we: loloyi, we uba itwadi na me hu paradiso.»