1 Ni me Pahuli, musalili a Yisu Kristo, ndi mu utsonehele benu. Nzambi ateele me mu uba iluumbi, na nde asoolo me mu uyabisa Musamu wu Mubwe.

2 Umata beleve, Nzambi asiidi lahi bibaayaka Musamu wu Mubwe wunuwu, mu mimbihuli mya nde na mu Mabuuku ma Ngidi. 3 Musamu wu Mubwe mo wuuna, bibaayaka mu utala Mwana a nde Yisu Kristo, wu babuti mu bumuutu bwa nde, mu imbisa hya pfumu Davidi. 4 Mu Livupu la Ngidi, Nzambi asooli nde mu matwala ma nde ti nde bibaayaka Mwana a Nzambi, bu hasuuli nde ŋa hati la babakwa. Ni Yisu Kristo Pfumu a bisu. 5 Ni mu tooni a Yisu, Nzambi haviidi me hyese hyuba iluumbi hya nde. Mu ubita baatu ba bibandu byosi, mana basiila nde imiinu na basiingala nde. 6 Benu kaka lili mu litangu la baatu mo bana, ba Yisu Kristo haateeli.

7 Me ndi mu utsonehele huli benu boosi ba lili hu Musyenge a Looma, benu ba Nzambi hatondo, ba nde hamiiteele mu uba bangidi. Nyaha Nzambi Taata a bisu, na Pfumu Yisu Kristo, bava benu hyese na hyenze.

8 Hati a tsomi, me ndi ufutala matondo huli Nzambi mu benu boosi, mu nduhi a Yisu Kristo. Mu tooni ati, bali mu utoyo mu imiinu hya benu mu toto yoosi. 9 Nzambi wu me ndi mu utsalila mu mutima a me woosi, mu uyabisa benu Musamu wu Mubwe wu bibaayaka mu utala Mwana a nde, yaabi ti me ndi mu undeele imbuli: Me a umbakolo mu utangula benu ve. 10 Tangu yoosi yi me umbaatsambila, me ndi mu upondo huli Nzambi ti, tso liina ni litondo la nde, me kuhasa nlahi bibaayaka uyamono benu. 11 Ka me na lehemene bibaayaka uyamono benu, mana Nzambi ava benu bungodu bu Livupu la Ngidi, mu uhwadisa imiinu hya benu. 12 Buuve, hufulili bubwe ti, me na lehemene bibaayaka uba ŋa hati la benu, mana liyakaani kwadisili mu itwadi. Kwadisili a benu mu imiinu hya me, na kwadisili a me, mu imiinu hya benu. 13 Baana ba ngu, me tondi ti benu liyaaba ti, me umbamba na matsimi ma uya huli benu. Ka natee bunuubu, me a hambaha nzila ve. Me na nzala ati isalu hya me hibuta mbutu huli benu kaka, we bu hyo hyabuta mbutu mu bibandu bikima. 14 Me ndi muutu wu afwana uyalongese huli baatu boosi: huli biyedi na huli ba bavele buyedi, huli babaayiha na ba baveleyiha muhanda. 15 Ni mu buuna, me ndi na lehemene bibaayaka uyabisa Musamu wu Mubwe huli benu kaka, ba lili hu Musyenge a Looma.

16 Me a handi na tsonyi mu uyabisa Musamu wu Mubwe ve, mu tooni ati, Musamu wu mubwe ni matwala ma Nzambi ali mu usalila, mu uyobolo pasi nde wu bibaayaka mu usiila nde imiinu. Hati a tsomi mu Bayudaayo, titswene mu Bangeleke. 17 Mu mbuli, Musamu wu Mubwe bibaayaka mu umweese bunuubu: Nzambi ubatsikaha butsiitsa bwa baatu, mu taangu yi bo bali mu usa hiitu mu nde, we bu basonehe mu Libuuku la Ngidi: «Mutsiitsa uba moonyi mu imiinu.»

18 Umata hu yulu, Nzambi ubamweese kesi a nde huli baatu ba bubaveleyusa nde na ba bubaavaanga ma mabi. Bo bali mu upfubaha imbuli mu ngaabi a bo. 19 Ni mu buuna, mambu ma mbuli ma buutwala uyaaba mu Nzambi, mali ma maayaluha ŋa busu bwa bo: ni Nzambi nde mwakulu amweesi bo lo paayalala. 20 Mu tooni ati, umata bu Nzambi havangi tsi, mbiili a nde yi yibavelemonehele, yi yili matwala ma nde ma nzyeni, na bu nde ali, bibamonehele mu mavaanga ma nde. Ni mu buuna, bo utwala uleele ve ti, bo a bayaabi ve. 21 Bo bayaabi Nzambi. Ka bo a bubakiinza nde ve, na bo a bubayusa nde we bu hwafwana ve. Bo bamiidunga hutso matsimi ma maavele lisuunga, na mitima mya bo, mi myavele buyedi, myamiisohomo hutso a pipidi. 22 Bo bali mu ubinuha ti bo na buyedi, ka bo bamiiyama maladi. 23 Ŋa mbuha uva muyusu huli Nzambi wu avelekwa, bo bubakunda bifwita, bifwaani bya baatu ba bubakwa, banyunyi, banyama ba miilu mina, na banyama ba bubayene mu bali. 24 Ni mu buuna, Nzambi havahuli bo hutso a tsumihili, we bu huli linyungi bibaayaka mitima mya bo, mana bo basumana nyutu a bo, bomo na bomo. 25 Bo bubasobo imbuli hya Nzambi mu mapfuta, bo bubakunda na bubaasalila mavaanga ma Nzambi ŋa mbuha Muvaangi a tsi, wu bu baayuusa mu bilima na bilima. Amen!

26 Ni mu buuna, Nzambi hayeholo bo mu ubaavaanga ma tsumihili. Bakadi ba bo, a bali mu ubwepfuuta taangi na balumi ba bo ve, buuna bo ubapfuuta taangi aka bomo na bomo bakaasu. 27 Bumosi kaka huli babahala, bo a bali mu ubwepfuuta taangi na bakadi ba bo ve. Bo bali na peyu yindahi mu upfuuta taangi bomo na bomo babahala. Maana mavaanga ma tsonyi bo bali mu usa, na bo bali mu uyaka tsyembili yi yaayelemene mu udunga hwa bo.

28 Bu bo babisi uyaaba Nzambi, Nzambi atiimbi bo ŋa busu bu buyedi bwa bo bu bwadunga, na bo bali mu uvanga ma maavelefwana. 29 Bo bamiiluula mu vele bibaayaka butsiitsa bwa pila mu pila, mu bubi, linyungi, bukanyi; bo baluula mu nyengi, mu ndubili a baatu, mu midiingu, mu ubavahula bana, mu mitsotso, mu dyeele, mu mavaanga ma tsumihili. Bo bubakusa bana mu upfuta. 30 Bo bubakuta mapfuundu mu bana. Bo bali baboho ba Nzambi, banga lisabu, banga a ngaabi, banga nyeme. Bo batondo ubabuta ma mabi, bo bubakakana na bikuta bya bo. 31 Bo bali ba bavele na buyedi, bo a bubakuhasa malahi ma bo ve, bo bali na mitima mi minono, lingebe mu bana ve. 32 Bo bayaabi we bu hwafwana, kesili a Nzambi. Baatu ba bubaasalila buuna, bahwama na lipfu. Ka bo bali mu usupaha ubaavaanga ma pila mo yiina, na titswene, bo bali mu usilasa kaka bavangi ba ma mabi.