1 Baana ba ngu, benu laamiikwayaaba ti, mikele mili na matwala ŋa yulu a muutu ndulu ŋa nde akini moonyi, mu tooni ati benu laayaba Mikele. 2 Ni mu buuna, Mikele mibamweese ti mukaasu wu bakwele akangama na mulumi a nde, bu mulumi akini moonyi. Ka tso mulumi kwidi, mukaasu ka bunyanga ŋa busu bu mukele wu kapfuuta nde na mulumi. 3 Tso ŋa mulumi a nde akini moonyi, nde aba mukadi a bahala likima, nde sa aba mukaasu mayamba. Ka tso mulumi a nde kwidi, nde ka bunyanga ŋa busu bu mukele. Na nde uba mukadi a bahala likima, hwavele uba mukaasu mayamba. 4 Ni bumosi kaka benu bana ba ngu a me, benu lamiikwa ŋa busu bu Mikele bu lili itwadi na nyutu a Kristo. Ka bunuubu benu laaka ba muutu mukima, nde wuuna wu asuuhi ŋa hati la babakwa, mana bisu a benu libutaani mbutu yimbwe ŋa busu bwa Nzambi. 5 Eye, ŋa bisu laaba hutso lituma bibaayaka imuutu, manzaala ma mabi ma Mikele myakatuma, maakabasala mutso linyutu la bisu loosi, mana bisu lisala bisalu bi byubita bisu hu lipfu. 6 Ka bunuubu, bisu a benu lika bunyanga ŋa busu bu Mikele, mu tooni ati, bisu lili we babakwa ŋa busu bu Mikele mi myakakotese bisu mu buviha. Mana bisu lisalila Nzambi hutso lituma bibaayaka linyatihi bibaayaka Livupu. Ka a husaali hutso lituma la tsikulu bibaayaka mikele mibasonehe ve.

7 Buuna, hima luleelaani ti Mikele ni lisumu? Naana ubila ve! Ka Mikele ni mimyayabisi me lisumu ni hima. Mumbuli, me a hakiinzaaba linyungi ve, tso Mikele a myaleeli ve ti: «We a hanyungala ve✝.» 8 Ka bu lisumu lasiingama mu Mikele, lo libabutala me manzaala moosi ma mabi. Ni mu buuna, hwavele Mikele, lisumu la miikwa. 9 Mu taangu a tsikulu, hwavele Mikele, me ambeedi moonyi. Ka bu Mikele myayamonehele, lisumu bibaayaka miibwebaha moonyi, 10 na me amiikwa. Na ma maayiila me, ni ti tumili yi yikiibita hu moonyi, yabita me hu lipfu. 11 Mu tooni ati, lisumu lasiingama mu tumili: lisumu laasoho me na laaduba me.

12 Ni mu buuna, Mikele myomo mili mya ngidi, na tumili yili ya ngidi, ya tsiitsa na yi mbwe. 13 Buni? Tumili yi yili yimbwe yimiikituha tooni lipfu la me? Naana! Ni lisumu lili tooni lipfu la me, mu usalila ma mabwe. Ni mu buuna, Mikele myasa ti bisu liyaaba buni lisumu laafulala bisiha byosi mu bubi.

14 Eye, bisu liyaabi ti Mikele ubamata mu Livupu la Nzambi.

Ka me, me ndi muutu wu akolo wu bamiisumbasa we muviha mu lisumu.

15 Me a humbatsikaha ma me ndi mu upanga ve. Mambu ma me umbaatondo, me a mbatsalila mo ve, ka mambu ma me ambele, ni maana ma me umbapanga. 16 Tso me umbapanga mambu ma me aveletondo, buuna me ndi mu utsiinga ti Mikele mili mi mibwe. 17 Bunuubu, a ni me ndi mu upanga buuna ve, ka ni lisumu bibaayaka lili mu me lili mu utuma me.

18 Ka me nzaabi ti, mambu ma mabwe mali mu imuutu hya me hi hyaakolo hiniihi. Eye, me na nzala uvanga mambu ma mabwe, ka me a handi na mifudi mi ukuhasa mo ve. 19 Eye, me a hambapanga mambu ma mabwe ma me umbaatondo ve, ka me umbapanga mambu ma mabi ma me aveletondo. 20 Tso me paangi ma me aveletondo, a me ndi mu upanga buuna ve, ka ni lisumu bibaayaka lili mu me, lili mu utuma me.

21 Me miitsikaha bunuubu: ŋa mbuha yi me tondi uvanga mambu ma mabwe, me ubaavaanga ndulu mambu ma mabi. 22 Hutso matsimi ma mutima a me, me ndi na kinya mu matumili ma Nzambi. 23 Ka me ndi mu umono hutso linyutu la me, tumili kima yi yibalwanisa tumili yi buyedi bwa me bubasilasa. Yo yili mu ukitusa me kondaayi a mukele lisumu wu bibaayaka mu me. 24 Me ndi mu lingebe! Na uyobolo me mu linyutu mo liniili, bibaayaka lili mu ubita me hu lipfu? 25 Lifutalaani matondo huli Nzambi mu Yisu Kristo Pfumu a bisu!

Mu ukuka, mu buyedi bwa a me, me hu tsina lituma bibaayaka Mikele mya Nzambi me ndi, ka mu ikolili hi imuutu hya me, me ndi muviha a mukele lisumu.