1 Bisu ba laahwada mu imiinu, laafwana ukumbasa ba bakolo. A lisaha mu ukuhasa mapeyu ma bisu mwakulu ve. 2 Nyaha pasi muutu mu bisu a benu, asaha hi hyumweese munawe kinya mu libwe la nde, mana nde akula mu imiinu. 3 Eye, Kristo a hasahi libwe la nde mwakulu ve. Ka we bu Mabasonehe ma Ngidi mali mu uleele: «Bituhi bi bakatuha we, byayaabwa ŋa yulu a me✝.» 4 Moosi ma mali mutso a Mabasonehe ma Ngidi tsikulu, basonihi mo mu uva bisu nzaabili. Mana bisu libaha hiitu mu mukami na kwadili bi mo mali mu uva bisu. 5 Nyaha Nzambi wu bibaayaka mu uva bisu mukami, na kwadisili, ava benu bunyanga mu ubaba likoongo we bu huli tumili a Yisu Kristo. 6 Buuna, boosi itwadi, mu ndaha mosi, yuusaani Nzambi, wu bibaayaka Taata a Pfumu a bisu Yisu Kristo.

7 Mu ukuka, bayakasanaani we bu Kristo haayaki benu, mana baatu bayusa Nzambi. 8 Ka bibaayaka me ndi mu utsilasa ni liniili: hati a tsomi, Kristo ayidi mu usalila Bayudaayo mu usilasa ti Nzambi bibaayaka mu uleele mbuli. Ni mu liina, nde hakuhisi malahi ma Nzambi asiidi huli bakaaha ba bo. 9 Ni bumosi kaka, ba bavele Bayudaayo, bali mu uyusa Nzambi mu bubwe bwa nde, we bu Mabasonehe ma Ngidi mali mu uleele:

«Ni mu buuna, me tsa pa we muyusu ŋa hati bibaayaka bibandu bikima bya ŋa toto,

na me tsa nzimba mu tooni muyusu a nduhi a we.»

10 Mabasonehe ma Ngidi mali mu ubweleele:

«Benu bibandu bi matsi moosi, baani mu kinya na ibandu hya Pfumu!» 11 Mali mu ubweleele bunuubu: «Yusaani Pfumu, benu matsi moosi,

yimbaani nyimbu yi muyusu a nde, benu bibandu byosi!»

12 Mumbihuli Esaya kaka bibaayaka mu uleele: «Imbisa hya Yese hyuya,

nde uteleme mu utuma bibandu bikima,

matsi moosi sa masiila nde hiitu»*v. 10: Pfu 32.43 v. 11: Mkg 117.1 v. 12: Esa 11.10..

13 Nyaha Nzambi wu ubava hiitu, aluusa benu mu kinya na mu hyenze bi byakuha mu imiinu hya benu mu nde. Mana benu liluula mu hiitu hi matwala ma Livupu la Ngidi.

14 Baana ba ngu, me ndodi lo, mitima mya benu myaluula mu matsimi ma mabwe, na mu nzaabili yi yaayelemene. Na benu laaka mu iteesi hi uvasasana mandoongi. 15 Ka me miitsonehele benu na mwana wasa*, hutso mihanda mu mambuha ma malahi, mu uyibwala benu moonyi, mu ma benu laamiikwayaba. Me atsonehe buuna, mu tooni a hyese hi Nzambi hava me, 16 mu uba musalili a Yisu Kristo huli ba bavele Bayudaayo. Me ndi mu utsa isalu hya ngaanga a Nzambi, hi uyabisa Musamu wu Mubwe a Nzambi, mana ba bavele Bayudaayo bakituha bungodu bu bubwe, bu Nzambi husilasa, bu bamiisyeme mu matwala ma Livupu la Ngidi. 17 Ni mu buuna, mu itwadi na Yisu Kristo, me ndi na nyeme mu tooni isalu hya me mu Nzambi. 18 Ka tso me utwala uleele dyambu, ndulu ni mu bibaayaka Kristo hasalila mu me, mu ubehe ba bavele Bayudaayo mu usiingala Nzambi. Nde hakuhasa lo, mu mambu ma maapala mu munywa a me na mu mavaanga ma me, 19 mu matwala ma biliimbu bya kimuhili, na bipadi, mu matwala ma Livupu la Nzambi. Mono buni me anzabisi we bu hwafwana Musamu wu Mubwe wa Kristo, mu ubayene matsyelo moosi, umata musyenge a Yeruselemi natee hu itaanzi hya Iliriya. 20 Ka me na muyusu mu uyabisa Musamu wu Mubwe, ndulu mu mambuha ma baatu bakini a bayuhi Tsangu a Kristo ve. Mu tooni uveletunga ŋa yulu ibeene hi mukima hatunga. 21 Me apaanga we bu Mabasonehe ma Ngidi mali mu uleele:

«Huli ba baveliyabisa lo, sa bamono nde,

na ba baveliyuha lo, sa batsikaha*.»

22 Yiina ni tooni yi yaasiidi ti me pelenza taangu yoosi huli benu. 23 Ka bunuubu, me miitsukasa isalu hya me mu bitaanzi mo biniibi. Umata bilima bi bilahi, me na nzala yindahi mu uyamono benu 24 na me tondi usa buuna ŋa me unzyene hu Esipanye. Mu tooni ati, me na hiitu hi umono benu ŋa me upyoho na uyaka likumbasa la benu mu mudyenge mu tsi mo yiina, humbisa utsahala na benu mu mwa bilumbu. 25 Ka mu taangu mo yiniiyi, me ndi mu unzyene hu Yeruselemi mu uyakuhasa isalu hya ba libundu ba bali huuna. 26 Eye, mabundu ma Masedonya na ma Akayi, maakese mu ukukaha bungodu bwa bo, bu ukumbasa ba nga puumbu ba libundu la Yeruselemi. 27 Bo mwakulu bakese buuna. Ka tso lisinzitsikaha, huli bo beedi aka we mukanu. Mu tooni ati, tso Bayudaayo ba libundu bali mu uva labo kabu bibaayaka busina bu livupu, huli ba bavele Bayudaayo ba libundu, bo kaka bafwana ukumbasa Bayudaayo ba libundu mu bi bo bali na byo nzala. 28 Ŋa me umana isalu mo hiina, na ŋa me upa bo pahu mo yiina, me tsa nzyene hu Esipanye na me tsa pyohele huli benu. 29 Na me nzaabi ti ŋa me unziila benu, ni na lisyeme la Kristo bibaayaka lafulala me unza. 30 Me ndi mu upondo benu liniili bana ba ngu, mu tooni a Pfumu Yisu Kristo na mu tooni litondo bibaayaka Livupu libava: lwanaani itwadi na me mu uvondele me hyese huli Nzambi mu masambulu ma benu. 31 Sambilaani mana me pelembwa ŋa myoho mya ba bavelesa imiinu ba hu itaanzi hya Yude, na mana libundu bibaayaka musyenge a Yeruselemi liyaka likumbasa bibaayaka me ndi mu umbitala bo, mu mutima mumosi. 32 Buuna, tso Nzambi tondi, me tsa nza huli benu na kinya yindahi mu mutima. Na me tsa polo mwana taangu mu uvuuma na benu. 33 Nyaha Nzambi wu ubava hyenze, aba na benu boosi. Ameni!