1 Ni mu buuna, bu bisu laaka ba tsiitsa mu imiinu, bisu lili mu hyenze na Nzambi mu likumbasa la Pfumu a bisu Yisu Kristo. 2 Mu tooni imiinu hya bisu mu nde, bisu lili na muswa mu ubaha hyese hi bisu luukwilala ba bavangama mu hyo. Na bisu lili na kinya, bu bisu lili na hiitu mu ukabasana muyusu a Nzambi. 3 Ŋa yulu a ŋaana, bisu lili mu kinya mutso minyongi, bu liyaabi ti minyongi mibabuta mukonono, 4 mukonono ubabuta kwadisili mutso malobese, na kwadisili yibabuta hiitu. 5 Hiitu a hibapfuta ve mu tooni ati, Nzambi ayitili litondo la nde mutso mitima mya bisu, mu likumbasa bibaayaka Livupu la Ngidi bibaayaka nde haviidi bisu.

6 Ni mu buuna, bu bisu laaba kini mifudi ve, Kristo akwidi mu tooni a bisu banga masumu, mu taangu yi Nzambi hakese. 7 Hu bibaayaka pasi mu usiinga ukwa mu tooni a muutu wu asungama! Peleve muutu utwala uba na ibahala, mu ukwa mu tooni a muutu wu mubwe. 8 Ka mono buni Nzambi hamweesi bunene bu litondo la nde mu bisu: ŋa bisu laaba kini banga masumu, Kristo akwidi mu tooni a bisu.

9 Tso ni mbuli bisu laaka ba bakuha mu makila ma Kristo, ni ti nde ufuuhasa bisu kaka mu kesi a Nzambi. 10 Bu bisu laaba baboho ba Nzambi, nde anoongi na bisu mu lipfu la mwana a nde. Tandisini a buunubu bu bisu limiinoongo na Nzambi, buni nde huvelefuhasa bisu mu moonyi a mwana a nde? 11 Titswene, bisu lili na kinya ŋa busu bwa Nzambi, mu tooni a Pfumu a bisu Yisu Kristo, wu miinongese bisu loloyi na Nzambi.

12 Ni mu buuna, lisumu laakoti mu tsi mu tooni a muutu mumosi, na lo laabehi lipfu. Ni bumosi kaka, lipfu laakotilili baatu boosi, mu tooni ati boosi basumihi. 13 Tehele Nzambi ava Mikele mya nde huli Moose, masumu maatswamini mu tsi. Ka bu Mikele myaba kini myove, mu taangu mo yiina, Nzambi a hakataanga masumu ve. 14 Ka lipfu laakasasa umata taangu a Adami natee ya Moose. Lipfu laakasasa naapa mu baatu ba bakavelesa masumu we ma Adami, wu avelikiinza ma Nzambi haleeli nde. Adami ni ifwafwani hya nde wuuna wu akiiya.

15 Ka lisumu la Adami, a luuyelemese na hyese hi Nzambi ubava mu bungodu ve. Mu mbuli, baatu ba balahi bamiikwa mu tooni bubi bwa muutu mumosi. Ka bubwe bu Nzambi ubamweese mu baatu, bwafulala iteesi. Na bi nde ubava bi bungodu huli baatu ba balahi mu likumbasa la muutu mumosi, Yisu Kristo, byamiisinzafulala. 16 Na bi Nzambi ubava, a byuyelemese na lisumu la muutu mumosi ve. Tsundusu a Nzambi mu tooni lisumu la muutu mumosi, Adami, yaabiti baatu hu tsyembili. Ka bungodu bwa hyese hya Nzambi, bwabiti baatu mu uba bunyanga, tso yuhili bubi bwa bo bu bwafulala. 17 Mu mbuli, lipfu laamweesi matwala ma lo mu lisumu la muutu mumosi. Ka mu Yisu Kristo siha, bisu laamiiyaka bi bilahi: boosi ba bali mu uyaka hyese hi hyafulala hya Nzambi, na bungodu bu butsiitsa bwa nde, buuba moonyi na buuba batumi na Yisu Kristo.

18 Ni ŋaana, lisumu la muutu mumosi, Adami, laabiti baatu boosi mu kondaayi. Ni bumosi kaka, vanga la tsiitsa limosi la Yisu Kristo, luubita baatu boosi mu uba bunyanga na uva bo moonyi. 19 We mu kene a muutu mumosi, baatu ba balahi basumihi. Ni bumosi kaka, mu lisiingala la muutu mumosi, baatu ba balahi baka bunyanga ŋa busu bwa Nzambi.

20 Mikele myayidi mu umweese baatu masumu ma bo, na masumu maafulili bulahi. Ka huuna hu masumu maafulili, hyese hya Nzambi hyabwesinzafulala. 21 We bu lisumu laamweesi matwala mu uduba baatu, ni bumosi kaka, hyese hya Nzambi hyumweese matwala ma hyo mu butsiitsa, mu ubita baatu hu moonyi wu bilima na bilima mu Yisu Kristo Pfumu a bisu.