1 Ni mu buuna, pasi wu we bibaayaka, we wu ubatsundasa bana, we utwala uleele ve ti we a hayaabi ve. Bu we ubatsundasa bana, we bibaayaka mu usyembe we mwakulu. Mu tooni ati, we wu ubatsundasa bana, we kaka ubaavaanga ma mabi we bo.✝ 2 Bisu liyaabi ti Nzambi ubatsundasa mu imbuli hyoosi, baatu ba bubaavaanga ma pila yiina. 3 We wu bibaayaka mu utsundasa ba bubaavaanga ma mabi, ka we bibaayaka mu uvanga bumosi we bo! Mu we ti we upeke tsundusu a Nzambi? 4 Buuve, we bubwe bu bunene bwa Nzambi ubapenye, mu mukami a nde na bunene bu mutima a nde? We a hayabi ve ti bubwe bwa Nzambi buli mu ubita we hu usobo mbiili?✝ 5 Ka mu tooni a kamini mutima a we, we a hasobo mbiili ve. Buuna, we bibaayaka mu ukuukaha ŋa yulu a we mwakulu kesi yinene, mu ilumbu hi Nzambi humweese kesi a nde, na tsundusu a nde ya tsiitsa. 6 Ilumbu mo hiina, Nzambi usyende muutu muutu we bu huli mavaanga ma nde.✝ 7 Nzambi uva moonyi wu bilima na bilima huli ba bali na mukonono wu ubaavaanga mambu ma mabwe. Bo bali mu usaha muyusu, likiinzu na idiingu hi hyuvelekwa. 8 Ka Nzambi umweese kesi na ifwefwe hya nde, huli boosi ba bubaatunala nde na ba bubasiila nde kene. Mbiili mo yiina, yibatelemene imbuli na yibasingasala mavaanga ma mabi. 9 Mapasi na minyongi byubwila boosi ba bubaasalila bubi. Hati a tsomi Bayudaayo, titswene ba bavele Bayudaayo! 10 Ka Nzambi uva muyusu, likiinzu na hyenze huli pasi nde wu ubaasalila mavaanga ma mabwe. Hati a tsomi Bayudaayo, titswene ba bavele Bayudaayo!✝ 11 Mu tooni ati, Nzambi a hubasa buraandu mu baatu ve.

12 Boosi ba bubasumaha hwavele uyaaba Mikele mya Moose, buunyambana tso bu baveleyaaba Mikele mo miina. Ka boosi ba bayaabi Mikele na bubasumaha, buutsundasa bo mu Mikele mo miina. 13 Ni mu buuna, a ba bali mu uyuha Mikele bali ba bakuha ŋa busu bwa Nzambi ve, ka ni ba bali mu usalila myo, buuba ba bakuha. 14 Ŋa Bangoyi ba baveleyaba Mikele mya Nzambi, bubaasalila myo mu bo mwakulu, bo boosi we ba bali na myo hutso mitima mya bo, tso bu bo baveleyaba myo. 15 Mu mbiili a bo yiina, bo bali mu umweese ti mavaanga ma Mikele mili mu utuma, basonehe mutso mitima mya bo. Tsikihili a bo yi misamu, yili mu uta imbangi. Ni bumosi kaka, matsimi ma mitima mya bo, mubakese bo, buuve mubavolele bo mileembe. 16 Maana ni ma mu umonehele, ilumbu hi Nzambi huutsundasa matswehi ma pasi muutu, mu nduhi a Yisu Kristo, we bu Musamu wu Mubwe wu me ndi mu unzabisa ali mu umweese.

17 Ka we wu bibaayaka mu ubula mabyoho ti we Muyudaayo, we bibaayaka mu usiingama mu Mikele na we bibaayaka mu unyeme ti Nzambi, Nzambi a we. 18 We yaabi litondo la Nzambi, na Mikele mili mu ulongese we mu usoolo ma mabwe ma muutu huutwala uvanga. 19 We bibaayaka mu umonehele ti, we ni mubiti binzimana wu bibaayaka mu ulaha bo nzila. We bibaayaka mu umonehele ti, we ni liyalala la ba bali mu piipidi. 20 We bibaayaka mu umonehele ti, we mulongisi a ba bavele na nzaabili, muyihisi bibabana. Eye, we bibaayaka na hiitu ti hutso Mikele, we ubaha nzaabili na imbuli! 21 Ni mu buuna, we wu bibaayaka mu ulongese bakima, mu hima we avelelongese we mwakulu? We wu bibaayaka mu uyabisa bana ti uyiba ve, mu hima we bibaayaka mu uyiba? 22 We wu bibaayaka mu uleele ti mayamba usa ve, mu hima we bibaayaka mu usa mayamba? We wu bibaayaka mu ubelele bifwita, mu hima we bibaayaka mu uyiba bisiha bi bili mu manzo ma nzambi ma bifwita? 23 We wu bibaayaka mu ubinuha ti we na Mikele mya Moose, we bibaayaka mu umweese Nzambi tsonyi mu tooni ati, we bibaayaka mu uvanga ma maasobono na ma Mikele mili mu utuma! 24 Ni mu buuna, Mabasonehe mali mu uleele: «Ni mu tooni a benu Bayudaayo, bangoyi bali mu ukwede nduhi a Nzambi.»✝

25 Mu mbuli, ketili yili na tsongo mu we, tso we bibaayaka mu usalila Mikele. Ka tso we bibaayaka mu utsoopolo Mikele, hu bibaayaka mu umweese ti we kini a bakete ve. 26 Tso muutu wu bavelekete bibaayaka mu usalila Mikele mya Nzambi, Nzambi utwala usiinga nde we muutu wu bamiikete ve? 27 Muutu wu bavelekete mu musunya, ka ubasiingala Mikele, utsundasa we, we wu bibaayaka mu usumana Mikele, tso bu we ayaaba mikele mibasonehe tso bu we bibaayaka wu bakete. 28 Ni mu buuna, Muyudaayo wa mbuli, a ni wu ubamonehele ŋa miisu ma baatu ti nde Muyudaayo ve, na wu bibaayaka na iliimbu hya ketili mu musunya a nde ve. 29 Ka Muyudaayo wa mbuli ni wu bibaayaka wa mu tswehi, wu bakete hutso mutima, mu ketili yi Livupu la Nzambi, kini a yi basonehe mu Mikele ve. Muyudaayo wa mbuli, ni nde wuuna wu ubayaka muyusu wu ubamata huli Nzambi, ka a huli baatu ve.✝