1 Ni mu buuna, me ndi mu upfuula: Nzambi baatu ba nde hanyasula? Naana, ubila ve! Me mwakulu muutu hu Isereli me ndi, wu imbisa hya Abrahami, wa buli la Benyamini. 2 Nzambi a hanyasula baatu ba nde hamiitswamina uyaaba ve✝. Yibuhalaani moonyi mu Mabasonehe ma Ngidi, ma mali mu ngu musamu wu mumbihuli Eliya ali mu unyongele Isereli ŋa busu bwa Nzambi: 3 «Pfumu, bo bamiiduba mimbihuli mya we, bamiitsala madiiku ma we ma bungodu. Na me amiitsaala siha vii. Na bo baka mu usaha umaasa muvumu a me.» 4 Ka mono mvutu yi Nzambi haviidi nde: «Me amaasili me mwakulu biveeve tsambu (7 000) bi babahala ba bavelikongemene ŋa busu bwa nzambi a Baale.»* 5 Ni bumosi kaka mu taangu a loloyi, hwasaala mwa litangu la baatu ba Nzambi hasoolo mu hyese hya nde. 6 Nde hasoolo bo mu hyese hya nde, ka a mu tooni mavaanga ma bo ve. Tso a buuna ve, hyese hya Nzambi a hisaali hyese ve.

7 Ka hima? Baatu ba Isereli a babaha hi bo bakasaha ve. Ka ndulu ba nde hasoolo bayaki hi bo bakasaha. Ka uto ti bakima, bamiikondosono bo utsikaha, 8 we bu huli Mabasonehe: «Nzambi aviidi bo livupu bibaayaka butsuudu, nde adibuhi bo miisu mana bavelemono, na matswi mana baveleyuha natee loloyi.» 9 Mutumi Davidi kaka bibaayaka mu uleele bunuubu:

«Nyaha mikungi mya bo mi udya mikituha mweto huli bo, siinga, baku,

nzila yi uyaka tsyembili yi yayelemene mu bo.

10 Nyaha miisu mya bo miba piipidi,

mu iteesi hyubwevelemono.

Hodemese bo mungoongo hwanzyeni*».

11 Ni mu buuna, me ndi mu upfuula: ŋa bisu Isereli bakubi baku, bo nzyeni babwidi? Peleve naana! Ka mu tooni a mbwili a bo mu ma mabi, bangoyi bayaki liyobolo, mana bisu Isereli bamono nyengi. 12 Na tso mbwili Bayudaayo mu ma mabi yaabeedi dyambu lilibwe bibaayaka linene mu toto yoosi, na ubwa hwa bo hwaviidi busina bu livupu huli bangoyi, ki pila bunene bwa dyambu bibaayaka libwe luuba mu pfutihili a bo yi yakuha hu liyobolo!

13 Me ndeele huli benu ba laavele Bayudaayo: Me wu ndi iluumbi hya ba bavele Bayudaayo, me ndi mu unzuusa isalu hya me, 14 mana tso me twali, me tsimbalala nyengi a baatu ba me, mana bakima ŋa hati la bo bayoboho. 15 Mu tooni ati, tso uvengolo hu Bayudaayo hwaba ni unongese hwa tsi na Nzambi, buni huuba mu taangu yi buubweyaka bo? Sa huba pfutihili a lipfu hu moonyi.

16 Tso kabu latsomi bibaayaka lipa bali mu uva huli Nzambi, kabu lina bibaayaka limiisaala lili kaka la nde. Tso manganzi ma muti baviidi huli Nzambi, bitabi kaka bili bya nde. 17 Isereli hili we muti a olive wu Nzambi amiikese bitabi bikima. Ŋa mbuha a byo, bamiikatisa we, we wu avele Muyudaayo. Baamiikatisa we, we itabi hi muti a olive wa piinda. Bunuubu, we ka mu ubahila mu malimbu ma mali mu ukuma mu linganzi bibaayaka muti a olive. 18 Ni mu buuna, we a harokolo bitabi bi bakese. Buni we utwala usyenolo mapapanga? A ni we ubahwadisa linganzi ve, ka ni linganzi libahwadisa we.

19 We sa leele me: «Baakesi bitabi mo biina, mu unamiha me ŋa mbuha a byo.» 20 Ni buuna hwa nde. Baakesi byo, mu tooni ati, byo a byaba na imiinu ve. Na baminamiha we, mu tooni imiinu hya we. Ka a hasa nyeme! Homo ba na boomo! 21 Ka tso Nzambi avengolo Bayudaayo ba bali bitabi bi muti a mbuli, kele hwa we! We wu bibaayaka itabi hi banamiha, mana nde a havengolo we kaka. 22 Ni mu buuna, tsikaha bubwe bwa Nzambi na bunono bwa nde: nde bibaayaka mu umweese bunono bwa nde huli ba bamiibwa, na bubwe bwa nde mu we, tso we kwilili mu bubwe mo buuna. Tso a buuna ve, sa bakese we kaka we bitabi bikima. 23 Ka tso Bayudaayo bayafutaha na basiidi imiinu, Nzambi sa abwekatisa bo kaka ŋa mbuha yi bo babeedi tsomi. Buuna Nzambi na matwala ma ubwekatisa bo. 24 Ni mu buuna, we itabi hi muti a olive wa mu piinda, Nzambi akesi we na akatisi we mu muti a Olive wu bakuna, na wu bibaayaka na lisobosono na muti wu baamaasi we. Ka uto ti Bayudaayo, bo bali bitabi bya mbuli bi muti a Olive wa mbuli: Ni mu buuna, Nzambi ubwekatisa bo mu muti wu bo babeedi tsomi.

25 Baana ba ngu, me tondi ti benu liyaaba matswehi ma Nzambi mo maniima, mana benu a libamonehele we bangeele: kabu limosi la baatu ba Isereli sa likwilala hutso a dungili, natee bu boosi ba bali bangoyi buuyaka liyobolo. 26 Ni buuna, buli bibaayaka Isereli loosi luuyoboho, we bu Mabasonehe ma Ngidi mali mu uleele:

«Muyobili sa amata hu isyelo hya Syoni,

nde umaasa bubi bu imbisa hya Yakobi.

27 Yiina ni nzuhisini a me yi me utsa na bo,

ŋa me umaasa masumu ma bo.✝»

28 Tso limoni ubisa hwa bo hu Musamu wu Mubwe, bo baka bambene ba Nzambi mu libwe la benu. Ka tso litelimi ŋa busu bwa tsolili a Nzambi, nde kini mu utondo bo, mu tooni bakaaha ba bo. 29 Ka Nzambi a hubapatula hi nde hamiikwava ve. Na nde a hubasobo matsimi ŋa busu bwa ba nde hamiiteele ve. 30 Mu taangu a tsomi, benu laabisili Nzambi. Ka bunuubu, Nzambi amiikwila benu lingebe, mu tooni ati Bayudaayo babisili nde. 31 Ni bumosi kaka, kene a bo mu taangu mo yiniiyi yili mu usa ti benu liyaka kwili lingebe ya Nzambi, na mana bo kaka bayaka kwili lingebe mo yiina✝. 32 Mu tooni ati, Nzambi amiikangimasa baatu boosi hutso a kene, mana nde amweese kwili lingebe a nde huli boosi.

33 Ki pila bunene bu busina bwa Nzambi! Ki pila idoongi hi buyedi na nzaabili a nde! Na utwala ubindula makesili ma nde? Na utwala utsikaha malahi ma nde? 34 We bu Mabasonehe ma Ngidi mali mu uyabisa:

«Na yaabi matsimi ma Pfumu?

Na utwala uba muviidi a nde wu mandoongi?

35 Na atswamini uva nde isiha,

mana nde akeele uyaka pfuta hu mbisa✝?»

36 Byosi bibamata huli Nzambi, mu nde, na byo bili bya nde.

Nyaha muyusu aba huli Nzambi mu bilima na bilima! Amen!