1 Ma me ndi mu undeele mali ma mbuli. Me a handi mu upfuta ve, mu tooni ti me ndi itwadi na Kristo. Iluunzi hya me, itwadi na Livupu la Ngidi hili mu utiila me imbangi: 2 mutima a me aluula mu lingebe bibaayaka lilahi na mu munyongo wu avelefwa. 3 Eye, hukiiba bubwe ti, me mba wu baasinga, na wu atahuha na Kristo mu tooni libwe la baana ba ngu ba me Bayudaayo. 4 Bo ni bisu Isereli: Nzambi akitusa bo baana ba nde. Nde amweese bo muyusu a nde, nde asiidi likoongo na bo, na aviidi bo Mikele, nde ayuhisini na bo buni bo bafwana ukuunda nde, na nde asiidi bo malahi✝. 5 Bo bali imbisa hi bakaaha ba bo, na Kristo mu bumuutu bwa nde bibaayaka musi ibandu hya bo. Nde ni Nzambi wu bibaayaka ŋa yulu a byosi. Nyaha ba baayuusa nde taangu yoosi. Amen!

6 Me a handi mu undeele ve ti Mambu ma Nzambi mali ma maavele na tsongo. Ka boosi ba bali imbisa hya Yakobi a bali bisu Isereli ba mbuli ve.✝ 7 Ka a baana boosi ba Abrahami bali imbisa hya nde ve. Mu tooni ati, Nzambi aleeli huli Abrahami ti: «Ni mu Isaaki we ubaha imbisa hi buuteele imbisa hi me atsi we lahi».✝ 8 Pila mosi ti, a baana boosi ba imbisa hya Abrahaami mu musunya bali baana ba Nzambi ve. Ndulu baana ba babuta we bu huli lahi, bali imbisa hya nde hya mbuli. 9 Nzambi aviidi lahi la nde bu: «Mu ilima hi hyuya me unzapfutaha. Na Sara ubuta mwana wa bahala.»✝

10 Titswene, hwaba bumosi kaka mu Lebeka wu abuti mavasa ndulu na bahala limosi Isaki, kaaha a bisu. 11 Abeedi kini ababuti baana mo baana ve, na bo kaka aba kini a bavangi dyambu bibaayaka libwe tso bibaayaka libi ve, ŋa Nzambi hayambili huli Lebeka, mana makani ma Nzambi, ma mali we bu huli tsolili a nde makwilala. 12 Makani mo maana mali tsolili a nde, mo mali mbila a nde huli baatu, ka a mu mavaanga ma bo ve. Nzambi aleeli huli Lebeka: «Mukulu usalila muheehe a nde.» 13 We bu Mabasonehe mali mu uleele: «Me atsooli Yakobi, ka me anyahi Esawu.»✝

14 Buuna, hima luuleelaani? Nzambi a hali wu akuha ve? Naana! 15 Eye, nde aleeli huli Moose: «Me tsa kwila lingebe huli pasi wu me tondi ukwila lingebe. Me umba wu mubwe huli muutu wu me tondi ubweye na nde.»✝

16 Ni buuna, bubwe bwa Nzambi a buli mu litondo la muutu, buuve mu mifudi mya nde ve. Ka ndulu huli Nzambi wu ubakwila baatu lingebe. 17 Mu Mabasonehe ma Ngidi, Nzambi bibaayaka mu uleele huli mutumi a tsi a Ngipiti: «Me atsuusi we pfumu, mana me mweese we matwala ma me, na nduhi a me yiyabahana mu toto yoosi.»✝ 18 Ni mu buuna, Nzambi ubakwila lingebe huli muutu wu nde atondi ukwila lingebe na nde ubaatumbasa woosi wu nde atondi utumbasa.

19 Peleve we sa fuula me: «Ka mu hima Nzambi ubafwengele bisu? Na utwala ubisa mambu ma Nzambi ubatondo?» 20 Homo ati, we muutu, na we bibaayaka, mu ukaakana na Nzambi? Nzungu a biinga utwala ufuula huli muyuhi a yo: «Mu hima we ayuha me bunuubu?»✝ 21 Muyuhi madiiha ubayuha mu liba, bu nde atondi uyuha. Mu liba mo liina, nde utwala uyuha itehili hya tsoongo buuve hi hyavele a tsoongo. 22 Nzambi akiitondo umweese kesi na uyabisa matwala ma nde huli bitehili bikima. Ka nde akuundi na mukami wu munene, bitehili bya kesi, bi bavangi mu utsala. 23 Eye, we lima ubweleele, tso Nzambi asiidi buuna, mu umweese busina bu muyusu a nde huli bitehili bi nde hakwili lingebe. Bitehili bi nde hatswamini uvangimasa mu tooni muyusu a nde.

24 Baatu mo ni bisu. Bisu ba nde haateeli, a ndulu ba ŋa hati bibaayaka Bayudaayo ve, ka napa ba ŋa hati la ba bavele Bayudaayo. 25 Ni mambu mo maana Nzambi ali mu uleele mu Libuuku bibaayaka mumbihuli Oseya:

«Baatu ba baba bavele ba ibandu hya me,

me tsa teele bo ibandu hya a me,

na tsi yi me akaveletondo,

me tsa teele yo tsi yi me atondo huulahi.

26 Na hu baleeli bo: "Benu a lili ibandu hya me ve",

sa bateele bo baana ba Nzambi a moonyi»*.

27 Mu mamatali baatu ba Isereli, mumbihuli Esaya bibaayaka mu uyabisa: «Ka tso bisu Isereli bali bulahi we musyeŋunyu mu muvanga mubu, ka ndulu baatu hoole ba busaala ŋa hati la bo, bu uyoboho. 28 Mambu ma Pfumu haleeli, nde sa avangimasa mo mosi mu mawasa ŋa toto.» 29 Na we bu Esaya mo hatswamini uleele:

«Tso Pfumu a tsi yoosi a haasiisi bisu mwa bateehudu ba imbisa hya benu ve,

bisu laakinyambana we musyenge a Sodoomo,

na bakisyembe bisu we musyenge a Ngomooro!»

30 Hima luleele mu taangu yi? Bunuubu: baatu ba matsi makima ba bavelesaha uba ba butsiitsa ŋa busu bwa Nzambi, baka ba butsiitsa ŋa busu bwa nde mu imiinu. 31 Ka baatu ba ibandu hya Isereli ba bakasaha uba ba butsiitsa ŋa miisu ma Nzambi mu likumbasa bibaayaka Mikele, a batwali ukiinza Mikele ve. 32 Mu ki tooni? Mu tooni ati, bo a bakasaha uba ba butsiitsa mu imiinu ve, ka mu mavaanga. Bo bayakubana manya bibaayaka libabwisa baatu, 33 we bu Mabasonehe ma Ngidi mali mu uleele:

«Me ndi mu utsusa mu musyenge a Syoni,

manya bibaayaka libakubasa baatu baku,

manya bibaayaka linene bibaayaka libabwisa baatu.

Ka pasi muutu wu usa imiinu mu nde,

a humono tsonyi ve✝.»