1 Bunuubu, boosi ba babaambana na Yisu Kristo a bubweyaka tsyembili ve. 2 Mu tooni ati, mukele a Livupu la Ngidi wu ubava moonyi mu likumbasa la Yisu Kristo, amiiva me bunyanga ŋa busu bu mukele lisumu na lipfu. 3 Mambu ma Mikele mya Moose myakaveletwala uvanga, mu tooni ikolili hi bumuutu, Nzambi avangi mo. Nde atsindihi Mwana a nde mu uba moonyi mu linyutu bibaayaka musunya, mana nde amaasa mukele lisumu, na uva lisumu tsyembili mutso a nyutu. 4 Nzambi hasiidi buuna, mana nde akuhasa mambu moosi ma butsiitsa ma Mikele mili mu utuma bisu. Mambu mo maana, maafwana uvangama mu bisu ba laabweveledyata mu matsimi ma imuutu, ka ba lili mu udyata mu Livupu la Ngidi. 5 Eye, ba bali mu udyata mu matsimi ma imuutu, bo bubaasalila manzala ma musunya, ka ba bali moonyi mu Livupu la Ngidi, bali mu usalila manzala ma Livupu. 6 Manzala ma musunya mubabita hu lipfu. Ka usalila manzala ma Livupu, hubava moonyi na hyenze. 7 Boosi ba bali hu tsina lituma bibaayaka manzala ma imuutu, bali baboho ba Nzambi. Mu tooni ati, bo a bubasiingala Mikele mya Nzambi ve, na a bubatwala tso hoole ve. 8 Ni mu buuna, ba bali hu tsina lituma bibaayaka musunya, utwala umweese Nzambi kinya ve.

9 Ka benu, benu a lili mu udyata hu tsina lituma bibaayaka musunya ve. Benu lili mu udyata mu Livupu la Nzambi, mu tooni ati, Livupu la Nzambi lili mu benu. Muutu wu avele na Livupu la Kristo, a hali wa nde ve. 10 Tso Kristo bibaayaka mu benu, nyutu a benu sa yikwa hwa yo mu tooni masumu, ka Livupu lili mu uva benu moonyi, mu tooni ati, bamiikitusa benu ba tsiitsa ŋa busu bwa Nzambi. 11 Tso Livupu la Nzambi, wuuna wu asuula Yisu ŋa hati la babakwa lili mu benu, Nzambi wuuna wu asuula Kristo ŋa hati la babakwa, sa ava kaka moonyi huli nyutu a benu yi yukwa mu Livupu la nde bibaayaka lili mu benu.

12 Ni mu buuna bana ba ngu, bisu a benu lili na mukanu. Ka a hali mukanu manzala ma linyutu mu udyata mu imuutu ve. 13 Mu tooni ati, tso benu lidyati mu manzala ma benu ma imuutu, benu sa likwa. Ka mu likumbasa bibaayaka Livupu la Ngidi, tso benu lidubi mavaanga ma mabi ma benu libasa mu nyutu a benu, benu sa liba moonyi. 14 Ni mu buuna, baatu boosi ba Livupu la Nzambi libaasuungaha, bali bana ba Nzambi. 15 Mu mbuli, Livupu bibaayaka benu laayaka, a lili livupu bibaayaka luukitusa benu baviha na bibaayaka luubweluusa benu mu boomo ve. Ka ni Livupu la Ngidi bibaayaka libamweese ti benu aka baana ba Nzambi, na bibaayaka libava bisu muswa mu ufulaha huli Nzambi: «Aba!» Mbindulili ti «Taata!» 16 Livupu la Ngidi libata imbangi lo mwakulu huli livupu la bisu ti, bisu lili baana ba Nzambi. 17 Eye, tso bisu lili baana ba Nzambi, bisu kaka ni babyalili ba mukobe! Eye! Babyalili ba mukobe a Nzambi. Mukobe wu luukabasana itwadi na Kristo. Ka tso bisu lili mu umono mapasi itwadi na Kristo, bisu kaka sa liba itwadi hutso muyusu a nde.

18 Me ndi mu utsima ti, utwala uyelemese mapasi ma taangu mo yiniiyi na muyusu a hu busu, wu Nzambi humweese bisu paayalala ve. 19 Ka byosi bi Nzambi havanga, bili mu ukeele na lehemene, taangu yi Nzambi humweese muyusu a baana ba nde. 20 Buuna byosi bi nzambi havanga, byaaka hu tsina matwala ma mifudi mi myavele a kaluha. Byo byaaka buuna, a ni mu litondo la byo mwakulu ve, ka mu litondo la Nzambi. Ka hiitu hili hwa hyo. 21 Hiitu ni ti, ilumbu Nzambi uva bunyanga mu bi nde havanga, mu buviha bu matwala ma mutsali a byo. Na byo sa bibaha muyusu wu bunyanga bwa baana ba Nzambi. 22 Ka, bisu liyaabi ti natee loloyi, byosi bi Nzambi havanga, bili mu ubima na umono pasi, we mukaasu nga misoongo. 23 Ka ndulu a byosi bi Nzambi havanga bili mu ubima ve. Bisu kaka laaka na Livupu la Ngidi, we kabu latsomi bibaayaka bungodu bu Livupu bu Nzambi hasiidi lahi. Bisu kaka lili mu ubima hutso mitima, tswamina Nzambi akitusa bisu baana ba nde na uva bunyanga mu nyutu a bisu mu mapasi. 24 Ka bisu lamiiyoboho ndulu mu hiitu. Bi muutu ali mu umono, utwala ubweba hiitu ve. Bi bali mu umono, utwala ubwesa hiitu mu byo? 25 Ka tso bisu libasa hiitu mu bi laavelemono, bisu libakeele byo na isuusi hyoosi.

26 Bumosi kaka, Livupu la Ngidi libaya mu ukumbasa bisu, mu tooni ati, bisu lili na ikolili. Buuna, bisu a liyaabi usambila we bu hwafwana ve. Ka Livupu lo mwakulu libasambila Nzambi mu tooni a bisu, na nzayiini yi pasi muutu huveletwala uyabisa. 27 Na Nzambi wu ubafundala idongi hi mitima, ubabangula ma Livupu la Ngidi ubatondo uvondo. Mu tooni ati, Livupu libasambila mu ba nde, we bu Nzambi ubatondo.

28 Bisu liyaabi ti, pasi bisiha bibavangama mu libwe la ba batondo Nzambi, na ba nde hateele we bu huli kesili a nde. 29 Buuna, mu baatu ba Nzambi hatswamini usoolo, nde atswamini uvolo kesili mu ufwanisa bo na Mwana a nde, mana nde aba pasa-bibelo ŋa hati la baana ba ngu ba balahi. 30 Baatu ba Nzambi hatswamini usoolo, nde ateeli kaka bo. Ba nde haateeli, nde akitusi bo kaka ba butsiitsa ŋa busu bwa nde, ba nde hakitusi ba butsiitsa, nde aviidi bo kabu bibaayaka muyusu a nde.

31 Buuna hima lubwelelaani?

Tso Nzambi bibaayaka wa bisu,

na utwala uvanga bisu bibaayaka libi?

32 Nde wu avelitahula Mwana a nde mwakulu,

ka nde ayehuli nde mu bisu boosi,

buni nde huveleva bisu byosi itwadi na Mwana a nde?

33 Na uyakese ba Nzambi hasoolo?

Muutu ve! Mu tooni ati, Nzambi bibaayaka mu ukitusa bo ba butsiitsa.

34 Ka na utwala usyembe bo?

Muutu ve, mu tooni ati, Yisu Kristo miikwa,

titswene nde miisuuha, nde bibaayaka ŋa mbahala a Nzambi.

Na nde bibaayaka mu usambila mu bisu!

35 Na utwala utahula bisu na litondo la Kristo?

Mapasi, minyongi, mbingisili, nzala, pene, busisu vo lipfu?

36 We bu Mabasonehe mali mu uleele:

«Mu tooni a we, bali mu uyeholo bisu mu lipfu pasi ilumbu,

bali mu uvolo bisu we mandombo ma bali mu ubita hu uhehe✝.»

37 Ka mu mambu mo maana moosi, bisu laafulala mbiingili mu tooni a nde wuuna wu atondo bisu.

38 Eye, me ndi na tadi ti,

a hu bibaayaka na dyambu tso limosi,

bibaayaka luutwala utahula bisu na litondo la nde ve:

tso lipfu, tso moonyi,

tso bapofi, tso bipfumu,

tso taangu a loloyi,

tso taangu yi yili mu uya,

tso matwala ma pila mu pila,

39 tso matwala ma hu yulu, tso ma ŋa toto,

tso pasi iloho hi Nzambi havanga.

Isiha tso imosi utwala utahula bisu na litondo,

bibaayaka Nzambi hamweesi bisu mu Yisu Kristo Pfumu a bisu ve.