1 Yakaani muutu wu bibaayaka wu akolo mu imiinu, hwavele usobosono munywa mu matsimi ma nde✝. 2 Ni mu buuna, imiinu hya muutu mumosi hibabita nde mu udya byosi bi bubadya. Ka mukima wu akolo mu imiinu, ubadya ndulu musooso. 3 Nyaha wu ubadya byosi avelesyebe wu aveledya nyama, na wu aveledya nyama, uveletsundasa wu ubadya byosi. Mu tooni ati Nzambi ayaka nde kaka. 4 We na bibaayaka, we wu bibaayaka mu utsundasa musalili a wuna? Tso nde bibaayaka wu abama mu isalu, tso nde bwidi, liina lili mu utala pfumu a nde. Ka nde ukwilala wu abama, mu tooni ati Pfumu bibaayaka na matwala ma usika nde.

5 Muutu mumosi ubatsima ti, bilumbu byafulala bina tsoongo. Ka muutu mukima ubatsima ti, bilumbu a bili na lisobosono ve*. Muutu muutu afwana uba na tadi mu ma nde ali mu utsima. 6 Woosi wu ubasa lisobosono bibaayaka bilumbu, bibaayaka mu usa buuna mu ukiinza Pfumu. Woosi wu ubadya byosi, bibaayaka mu udya kaka mu ukiinza Pfumu. Mu tooni ati nde ubafutala matondo huli Nzambi mu byudya bya nde. Na woosi wu ubaveledya byosi bibaayaka mu usa kaka buuna mu ukiinza Pfumu. Mu tooni ati, nde kaka ubafutala matondo huli Nzambi. 7 A hu bibaayaka na muutu ŋa hati la bisu a benu, wu bibaayaka moonyi mu tooni a nde mwakulu ve. Na, a hu bibaayaka kaka na muutu wu bibaayaka mu ukwa mu nde mwakulu ve. 8 Tso bisu a benu lili moonyi, bisu lili moonyi mu tooni a Pfumu. Na tso likwidi, bisu luukwa mu tooni a Pfumu. Ni mu buuna, tso laaba moonyi buuve tso laakwa, bisu lili ba Pfumu habaha. 9 Mu tooni ati Kristo amiikwa, na nde amiisuuha ŋa hati la ba bakwa, mu uba Mutumi ŋa yulu a babakwa na ba bali moonyi. 10 Ka we, mu hima we bibaayaka mu utsundasa mwana a ngu a we? Na we, mu hima bibaayaka mu upenye kedi a we? Bisu boosi sa liteleme ŋa busu bwa Nzambi, mu uyaka tsundusu a nde. 11 Mu tooni ati Mabasonehe ma Ngidi mali mu uleele bunuubu:

«Me Pfumu wu bibaayaka moonyi ndi mu undeele bunuubu:

Baatu boosi sa batsokomo ŋa busu bwa me,

na boosi sa basiinga Nzambi ŋa misu ma baatu✝.»

12 Ni mu buuna, pasi muutu mu bisu afwana uva ikuumbu huli Nzambi, mu mavaanga ma nde mwakulu.

13 Ni mu buuna, linyahaani utsundasa bana na bana.

Volwaani kesili yi uvelebita wuna mu udunga nzila a Nzambi buuve yi imiinu. 14 Mu Pfumu Yisu, me nzaabi mu tsiki yoosi ti a hu bibaayaka na isiha hi basa ngidi mu hyo mwakulu ve. Ka tso muutu tsimi ti hu bibaayaka na isiha hi basa ngidi, buuna hyo hili hi basa ngidi mu nde. 15 Tso we bibaayaka mu ukwamisa mwana a ngu a we mu bi we bibaayaka mu udya, we a hasaali dyata mu litondo ve. Mu tooni a byudya, a hanyambasana mwana a ngu a we, wu Kristo haakwidi mu nde ve. 16 Mambu ma mali ma mabwe huli we, a makituha huli baatu bakima mambu ma makusa ve. 17 Eye, Ipfumu hya Nzambi a hili dyambu la byudya, buuve la byunywa ve. Ka hyo hyakangama mu butsiitsa, hyenze na kinya, bi Livupu la Ngidi libava. 18 Ni buuna, woosi wu ubaasalila Kristo mu biteesi mo biina, bibaayaka wu mubwe ŋa busu bwa Nzambi, na baatu bubasilasa nde.

19 Ni mu buuna, nyaha lisahaani bi bibabehe hyenze na bi bibava bisu muswa mu ukumbasana mu ukula mu imiinu. 20 A haduba isalu hya Nzambi mu tooni a byudya. Eye, byudya byosi bili bi byatsyeme. Ka ni bubi huli muutu, tso nde diidi isiha hi hyudungasa mwana a ngu nzila a Nzambi buuve yi imiinu. 21 Dyambu bibaayaka laafwana ni mu uveledya nyama, mu uvelenywa malamu, na mu ubisa byosi bi byutwala ubwisa mwana a ngu mu lisumu. 22 Imiinu hya we mu dyambu mo linili, keelese hyo mu we mwakulu ŋa busu bwa Nzambi. Kinya yili na muutu wuuna wu aveletsundana mu tooni makesili ma nde! 23 Ka wu bibaayaka na matsika mu byudya, Nzambi amiisyembe nde. Mu tooni ati, mbiili a nde a yaayelemene na imiinu hya nde ve. Na liyaabi ti, mambu moosi ma muutu ubaavaanga, maveleyelemene na imiinu hya nde, mali masumu.