1 Baana ba ngu, mu tooni ati, Nzambi amiimweese bubwe bwa nde mu bisu, me ndi mu upondo huli benu, mu uyeholo nde nyutu a benu we bungodu bwa moonyi, bwa ngidi, bu Nzambi husilasa. Buuna, benu sa liyuusa Nzambi we bu hwafwana. 2 A liduukala bipfu bya baatu ba tsi mo yiniiyi ve. Ka nyahaani Nzambi akitusa benu na uva benu buyedi bu bunyatihi. Na benu sa litsikaha litondo la Nzambi: ma mabwe ma nde hatondo, na ma masupahana.

3 Mu tooni bungodu bu Nzambi hava me mu bubwe bwa nde, me ndi mu upondo huli pasi nde mu benu, mu uveletsima ti nde alutaala bana. Ka nyaha pasi muutu mu benu aba we bu huli iteesi hya kabu bibaayaka imiinu hi Nzambi hava nde. 4 Buuna, mu nyutu ndulu mosi, bisu lili na binama bi bilahi. Ka pasi inama na isalu hya hyo. 5 Bumosi kaka, tso lili ba balahi, bisu a benu lili nyutu ndulu mosi itwadi na Kristo, na lili itwadi bana na bana we binama bya nyutu ndulu mosi. 6 Ka bisu a benu lili na bungodu bu bwasobono we bu hu bibaayaka hyese hi Nzambi akabila muutu muutu:

Tso mumosi mu bisu a benu bibaayaka na bungodu bu ubihula,

nyaha nde abaasalila bwo we bu hu bibaayaka imiinu.

7 Tso mukima bibaayaka na bungodu bu usalila bana,

nyaha abaasalila.

Wu bibaayaka na bungodu bu ulongese,

nyaha abalongese.

8 Wu bibaayaka na bungodu bu uhwadisa bana mu mavaanga ma mabwe,

nyaha abahwadisa bo.

Wu bibaayaka na bungodu bu ukaba,

nyaha abaasalila bwo mu mutima wu mubwe.

Wu bibaayaka mu utuma,

nyaha abaatuma na lehemene loosi.

Wu bibaayaka mu ukumbasa nga puumbu,

nyaha abakumbasa na kinya.

9 Nyaha litondo liba bibaayaka laavele na muwala. Belelaani bubi, kangamaani mu ma mabwe.

10 Luulaani mu litondo bana mu bana,

we binama bya buli limosi;

Baani batsomi mu ukiinza bana.

11 Baani na lehemene mu isalu,

ka a liba babolo ve.

Salilaani Pfumu mu mutima a benu woosi.

12 Baani na kinya mu tooni a hiitu hya benu.

Baani na mukami mu taangu a pasi,

baasambilaani na mukonono.

13 Baakumbasaani banga imiinu ba bali na nzala likumbasa,

na bayakaani bubwe taangu yoosi, ba bali mu uya mu manzo ma benu.

14 Vondelaani ba bali mu utsuta benu lisyeme la Nzambi. Vondelaani bo lisyeme, ka a livondele bo musingu ve*. 15 Baani mu kinya na baatu ba bali mu kinya, na lilaani na ba bali mu ulila. 16 Baani mu hyenze ŋa hati la benu. A liba na peyu mu bi byasyenoho ve, ka baasahaani bi byavelemonehele ŋa miisu ma baatu. A limonehele we bangeele benu mwakulu ve✝.

17 A lifutala ma mabi mu ma mabi ve, ka hwadaani mu ubasa ma mabwe ŋa busu bwa baatu boosi. 18 Tso benu litwali ukuhasa buuna, mu iteesi hi hyahwama na benu, baani mu hyenze na baatu boosi. 19 Bambaahi ba litondo, a lifutala piinga huli ba bubavangila benu bubi ve, ka nyahaani Nzambi amweese kesi a nde. Mu tooni ati basonehe bunuubu: «Me ni wu ufutala piinga, me ni wu ufutala huli pasi muutu we bu hu bibaayaka mavaanga ma nde», buleeli Pfumu.

20 Na nde abweleele bunuubu: «Tso muboho a we bibaayaka na nzala, va nde byudya. Tso nde bibaayaka na peyu, va nde byunywa. Mu tooni a ŋa we bibaayaka mu usa buuna, we bibaayaka mu ukuukaha nde makala ma mbaahu ŋa yulu mutswe*.» 21 A nyaha bubi bubiingala we ve, ka nyaha we ba mubiingili a libi mu libwe.