Looma 13

Batumi bali mu usalila Nzambi

1 Pasi muutu afwana uba hu tsina lituma bibaayaka babyalisa. Mu tooni ati, pasi lituma ubamata huli Nzambi. Ni Nzambi ubabyalisa baatumi boosi. 2 Ni mu buuna, woosi wu ubabisala lituma, nde bibaayaka mu ubisala lituma la Nzambi. Ba bali mu utelemene lituma, bo bali mu uteele tsundusu ŋa yulu a bo mwakulu. 3 Bunuubu, ba bali mu uvanga ma mabwe, utwala ubata boomo bu banzonzi ve, ka ni ba bali mu uvanga ma mabi. Ka tso we a tondi uba na boomo bu baatumi ve, buuna vanga ma mabwe. Lituma sa lisilasa we. 4 Ka lituma lili mu usalila Nzambi mu libwe la we. Ka tso we bibaayaka mu uvanga bibaayaka libi, ba na boomo. Mu tooni ati, a mu pu baatumi bali na matwala ma usyembe ve. Lituma lili mu usalila Nzambi, mu umweese kesi a lo huli muutu wu bibaayaka mu uvanga bubi. 5 Ni mu buuna, hwafwana mu uba hu tsina lituma bibaayaka baatumi, a ndulu mu ubata kesi a Nzambi ve, ka na mu tooni a tumili yi yili mu umata mu mutima.

6 Ni mu buuna kaka, benu libafuta limandu. Mu tooni ati, bakambi ba limandu bali hu tsina lituma la Nzambi mu uvangimasa bu hwafwana iteesi mo hiina. 7 Futalaani huli pasi muutu hi hyahwama na nde: futaani limandu huli wu benu laafwana ufuta lo, na makesili makima ma lituma libakamba, huli wu benu laafwana ufuta mo, muyusu huli wu benu laafwana uva muyusu, likiinzu huli wu benu laafwana uva likiinzu✝13.7 Mat 22.17-21; Mlk 12.17; Luk 20.25.