1 Matalikilo amakani mabotu aJesu Kkirisitu, Mwana waLeza. 2 Mbuli mbukulembedwe mubbuku lyaAyizaya musinsimi kuti,

Leza wakati, ‘Ndiyootuma mutumwa wangu kunembo lyako,

uyoobamba nzila yako.’

3 Ijwi lya ooyo woompolola munkanda kaliti;

‘Amubambe nzila yaMwami,

mululamike nzila zyakwe!’ "*

4 Joni mubbapatizyi wakaliboniya munkanda, kakambawuka lubbapatizyo lwakusanduka kwakulekelelwa kwazibi. 5 Alimwi bantu boonse bamuchilikiti chaJudiya abaantu boonse bamuJerusalem bakayiinka kulinguwe, kabalukuzumina zibi zyabo; mpawo John wakabbapatizigwa mumulonga waJorodani.

6 Joni wakali kusama zisamo zyaboya bwankamela, amukumba wachikwiye muchibuno chakwe, alimwi walikulya nsozi abuchi bwamugani. 7 Alimwi wakakambawuka, kaliikuti, "Musule lyangu kuzoosika umwi ulaanguzu kwiinda ndime, ooyu ulaansangu nzinditeeleli kutuntumanina akwaangununa. 8 Ndamubbapatizya ameenda, pesi uyoomubbapatizya aMuuya Usalala."

9 Mumazuba aayo Jesu wakaza kazwa kuNazareta yakuGalili alimwi wakabbapatizigwa aJoni mumulonga Jorodani. 10 Alimwi aawo naakazwa mumeenda, mpawawo wakabona ijulu kalijulikide aMuuya kuuselukila alinguwe mbuli nziba. 11 Alimwi ijwi lyakasika kuzwa kujulu kaliti, "Uli Mwana wangu ngundiyandisya; anduwe ndibotelwa loko."

12 Mpawawo Muuya wakamutola munkanda. 13 Alimwi wakali munkanda kwamazuba alimakumi aane, kaliikusunkwa aSatani, alimwi wakali aamwi abanyama bamusokwe; alimwi baangelo bakamukutawukila.

14 Lino Joni kali waangwa, Jesu wakaza muGalili, kakambawuka makani mabotu aLeza, 15 mpawo kalookuti, "Chiindi chazuzikizigwa, alimwi bwami bwaLeza buli afwiifwi; amusanduke alimwi musyome mumakani mabotu!"

16 Alimwi Jesu naakalikweenda kumbali alwizi lwakuGalili, wakabona Sayimoni mukulana wakwe Enduru kabali kuwaala nsabwe mulwizi; nkaambo bakali bazubi babaswi. 17 Mpawo Jesu wakati kulimbabo, "Munditobele ndiyoomuchita basikuzuba bantu." 18 Mpawawo bakasiya nsabwe zyabo alimwi bamutobela.

19 Alimwi naakaya kunembo buniini, wakabona Jakkobbu mwana waZebbedi aJoni mwanike wakwe, bakali mubwaato bwabo kababamba nsabwe zyabo. 20 Mpawawo wakabayita, mpawo bakasiya wisi Zebbedi mubwaato abalanda, mpawo bamutobela.

21 Mpawo Jesu abasikwiiya bakwe bakaya muKkapenawumi; alimwi muzuba bwasabata nibwakasika Jesu wakanjila muchikombelo mpawo wayiisya. 22 Alimwi bantu bakamumvwa bakagamba kukuyiisya kwakwe, nkaambo wakabayiisya mbuli umwi wakalijisi ulabweendelezi, alimwi peepe mbuli bayiisyi bamulawu.

23 Eelyo kwakali mwaalumi muchikombelo chabo ooyo wakalinjidwe muuya mubi, 24 alimwi wakoompolola wati, "Uyandaanzi kuli ndiswe, Jesu waNazareti? Sa wazida kutunyonyoona na? Ndilizi kuti nduweni, Usalala waLeza!"

25 Pesi Jesu wakamukalalila, kati, "Umuna, alimwi zwa mulinguwe!"

26 Mpawo muuya mubi, wakamuzazamya changuzu alimwi kakwiila ajwi pati, wazwa mulinguwe. 27 Alimwi boonse bakagamba, mane bakabuzyaniya akati kabo kabati, "Niinzi eechi? Injiisyo mpya! Anguzu ulalayilila nikuba myuuya mibi, alimwi ilamuswiilila!"

28 Alimwi impuwo yakwe yakazulila chakufwambana koonsekoonse kumasena woonse azyungulukide Galili.

29 Alimwi mpawawo Jesu abasikwiiya bakwe aamwi aJakkobbu aJoni nibakazwa muchikombelo, mpawo bakanjila kuŋanda yaSayimoni aEnduru. 30 Lino banyinazyala aSayimoni bakalilede bakali kukasala mubili, alimwi mpawawo Jesu bakamwaambila atala ambabo. 31 Alimwi wakaza, mpawo wabakajata aluboko, wabagwasya kunyampuka, kukasala kwamubili kwakamana, mpawo bakatalika kubakutawukila.

32 Goko eelyo, nilyakabbila zuba, bakamweetela boonse bakali kuchiswa nikuba bakalinjidwe abasikazwa. 33 Alimwi chisi choonse chakali bungene aamwi kunembo lyamulyango waŋanda. 34 Alimwi wakasilika bayingi bakali amalwazi asiyenesiyene, akutanda basikazwa bayiingi; alimwi taakali kuzumizya basikazwa kuti baambuule, nkaambo bakalimuzi.

35 Alimwi chifumofumo, Jesu wakabuka wazwa muŋanda mpawo waya kubusena mbwaakakuba aliikke, alimwi ooko nkwakukomba. 36 Mpawo Sayimoni abaabo mbakalaabo bakazwa bakuyanduula Jesu, 37 alimwi bakamujana, mpawo bakati kulinguwe, "Boonse balookukuyanduula."

38 Mpawo wakati kulimbabo, "Atwiinke kumyuunzi imwi izyungulukide, kuti tukakambawuke alako; nkaambo nchichicho nchindakazida."

39 Alimwi wakayinka muGalili yoonse, kali kukambawuka muzikombelo zyabo akutanda basikazwa.

40 Alimwi sichipele wakasika kuli Jesu wamukumbila, alimwi kafugeme wakati kulinguwe, "Na koyanda, ulakonzya kundisalazya."

41 Mpawo Jesu kazwide aluse, wakatandabika luboko lyakwe mpawo wamuguma, mpawo wati kulinguwe, "Ndilayanda, kusalala!" 42 Alimwi mpawawo chipele chakamana, mpawo wakasalazigwa. 43 Alimwi wakamulayilila chakusinizya, mpawawo wakeenda, 44 mpawo Jesu wakati kulinguwe, "Ubone kuti taakwe kufumbwa nguwaambila pe, pesi kuya, ukalitondeezye kumupayizi, alimwi ukape chipayizyo eecho Mozesi nchakalayilila, mbuli bukamboni kubantu."

45 Pesi wakayinka mpawo wakatalika kubaambila kawangunukide, alimwi akumwaya milumbe, mane Jesu taakachili kukonzya pe kunjila mudolopo zili antanganana, pesi wakali kunze mumasena atakwe bantu; nikuboobo bantu bakaza kulinguwe kuzwa koonsekoonse.