1 Alimwi wakati kulimbabo, "Ndamwaambila kasimpe, bamwi bayiimvwi aano tabakoyoofwa kabatana kubona Bwami bwaLeza kabuza anguzu."

2 Nikwakayinda mazuba alimusanu alimwi Jesu wakabweza Pita, Jakkobbu aJoni wayiinka aabo kuchilundu chilamfu, ooko nkubakali abaliikke. Nibakali nkuko Jesu wakasanduka kunembo lyabo, 3 zisamo zyakwe zyakanjenjema kazituba buu, taakwe sikusapa waansi aano ukonzya kuzitubya mbubo pe. 4 Mpawawo kwakaliboniya anembo lyabo Elayija aMozesi, kabali kwaambuula aJesu. 5 Pita wakati kuli Jesu, "Muyiisyi, nchibotu kuti tube aano. Ngatuyake zitumba zitatu, chimwi chako, chimwi chaMozesi achaElayija." 6 Pita wakabula zyakwaamba, nkaambo bakali baankamana.

7 Eelyo joba lyakabavumba, ijwi lyakazwa mujoba kaliti, "Ooyu Mwana wangu, ngundiyanda. Amumuswiilile!" 8 Mpawawo, nibakalangalanga, taakwe uumbi ngubakabona wakalaabo kunze kwaJesu luzutu.

9 Nibakali kuseluka kuzwa kuchilundu, Jesu wakabalayilila kuti bataambili nikuba uumwi muntu eezyo nzibakabona mane Mwana waMuntu akabuke kubafu. 10 Bakakasisa kaambo mumyoyo yabo, kababuzyaniya kuti, "Kubuka kubafu chaambayi?" 11 Eelyo bakabuzya kulinguwe bati, "Nkaamboonzi bayiisyi bamulawu nibamba kuti Elayija uleelede kutalika kuza?"

12 Jesu wakavwiila wati, "Ninchoonzyo, Elayija uyootalika kuza, alimwi azoobweedezye zintu mbuli mbuzyakabede. Nkaamboonzi nikulembedwe kuti Mwana waMuntu weelede kuti apenzegwe akutakatwa? 13 Pesi ndamwaambila kuti, Elayija wakasika kale, bakachita zyoonse nzibakalikuyanda, mbuli mbukulembedwe atala anguwe."

14 Alimwi Jesu, Pita, aJakkobbu, aJoni nibakasika kuli bamwi babasikwiiya, bakabona nkamu mpati yabantu kiibazyungulukide, abayiisyi bamulawu kabaliikukazyaniya ambabo. 15 Muchiindi bantu nibakaboona Jesu, bakagamba chakwiindilila, bakamuchijaanina kuyoomujuzya. 16 Wakababuzya wati, "Niinzi nchimuliikukazyaniya ambabo?"

17 Mwaalumi wakali munkamu yabantu wakavwiila wati, "Muyiisi, ndakweetela mwanaangu, uujiswi muuya wasyataambi uchita kuti ataambuli pe. 18 Naa zyamubukila mwanaangu, nga wamusuntula. Umugwisya fulo kumulomo, akuluma ntwinyo mpawo ingawayuma chwa. Ndabakumbila basikwiiya bako kuti buutande muuya pesi taakwe nibakonzya pe."

19 Jesu wakavwiila wati, "Inywee nimulizyalane litasyomi, ndeelede kukkala chiindi chilamfu biyeni anywebo? Kuyooba lili kandimuchitila moyo mulamfu. Mweete mulombe ooyo kulindime." 20 Lino bakamweeta kuliJesu.

Muuya nuwakabona Jesu, mpawawo wakasuntula mulombe wamuzazamya chabukali. Wakawida aansi wabumbuluka, wazwa fulo mumulomo. 21 Jesu wakabuzya kuliwisi wamulombe wati, "Wabaachiindi chilibiyeni kaliboobu?

Wakasandula wati, Kuzwa kubuniini bwakwe," 22 "Chiindi chiingi ukkala kuumuwisizya mumulilo nikuba mumeenda kuuyanda kumujeya. Kuti kukonzya kuchita chintu, kutufwida luse utugwasye!"

23 Jesu wakati, "Waambaanzi, kuti nkuti kukonzya kuchita chintu? Zyoonse zilakonzeka naa kusyoma."

24 Mpawawo wisi wamulombe wakoompolola wati, "Ndasyoma; ndigwasye ndizunde kutasyoma kwangu!"

25 Jesu naakabona nkamu yabantu kabalookuchijanina kuli ooyu mulombe, wakulayilila muuya mubi, wakati, "Iwe nomuuya wakutamvwa asyataambi, ndakulayilila, ndati zwaa mulinguwe utabooli lubo."

26 Muuya wakakwiila, wakamuzazamya changuzu wazwa. Mwana mulombe wakalangika anga mutunta zyakuti bantu bayiingi bakati, "Wafwa." 27 Pesi Jesu wakamujata kuboko wamwiimikizya amawulu aakwe, mpawo mulombe wakayiimikila.

28 Jesu naakanjila muŋanda, basikwiiya bakwe bakamubuzya chakumbali bati, "Nkaamboonzi nitwakachilwa kuutanda muuya mubi?"

29 Wakabavwiila wati, "Musyobo wamuuya uliboobu uzwa akukomba luzutu."

30 Jesu abasikwiiya bakwe bakazwa kubusena oobo mpawo bayinda mumunzi waGalili. Jesu takayanda kuti kube nikuba uumwi uziba eechi, 31 nkaambo wakali kuyiisya basikwiiya bakwe. Wakati kulimbabo, "Mwana waMuntu uyoowabwa mumaanza abantu. Bayoomujeya, nikwakwiinda mazuba ataatu uyoobuka kubafu."

32 Pesi taakwe nibakamvwisisisya nzyaakalikwaamba pe alimwi bakayoowa kubuzya atala anzizyo.

33 Jesu abasikwiiya bakwe bakasika kubusena butegwa Kkapenawumi. Naakanjila muŋanda wakabuzya wati, "Niinzi nzimwali kukazyaniya atala anzizyo munzila?"

34 Pesi bakawumuna nkaambo munzila bakali kukazyaniya atala akuti ngwani mupati akati kabo. 35 Nibakakkala aansi, Jesu wakayita basikwiiya bakwe balikkumi ababili wati, "Naa umwi kayanda kuba mutaanzi, weelede kuba wakumamaninizyo, kali mulanda waboonse." 36 Wakabweza mwana muniini wamwiimikizya akati kabo. Wakamubukata mumaanza aakwe, wakati kulimbabo, 37 "Kufumbwa ooyo utambula umwi wabana baniini muzina lyangu watambula ndime; eelyo kufumbwa utambula ndime tatambuli ndime pesi ooyo wakandituma."

38 Joni wakati, "Muyiisyi, twabona mwaluumi katanda myuuya mibi muzina lyako mpawo twamwaambila kuti aleke nkaambo teewesu pe."

39 Jesu wakavwiila wati, "Mutamukasyi pe, taakwe uuchita chigambyo muzina lyangu mpawo aambuule bubi atala andime. 40 Nkaambo ooyo utalwani aswebo ulaaswebo. 41 Ndimwaambila kasimpe, kufumbwa uyoomupa meenda akunywa muzina lyangu nkaambo muli bangu takoyoosweekelwa bulumbu bwakwe pe.

42 "Kufumbwa muntu uuchita kuti umwi wabaaba baniini basyoma kulindime babisye, chili mbubo kuti aangwe ziyo munsingo yakwe mpawo awaalilwe mulwizi. 43 Naakuti kuboko kwako kukupa kuti ubisye, kugonke. Chili mbubo kuti ukanjile mubuumi butamani kutakwaako kwiinda kuti ube amaboko abili ukaye kubbila lyamulilo litamani, 44 * 45 Alimwi na chituta chako kachikupa kuti ubisye, chigonke. Chili mbubo kuti ukanjile mubuumi butamani kolemene kwiinda kuti ube azituta zibili ukawaalilwe mubbila lyamulilo, 46 * 47 Na iliso lyako kalikupa kuti ubisye, linonkole. Chili mbubo kuti ukanjile kubwaami bwaLeza kulaaliso limwi kwiinda kuti ube ameso abili alimwi ukawaalilwe mubbila lyamulilo, 48 ooko mvwinyu zyabo nkuzitafwi.*

49 Muntu woonse uyoosunkwa amulilo.

50 "Munyo mubotu, pesi kuti wasampuka, kujana wuuchita buti kuti ube amuya lubo?

"Amube munyo mulindinywe, alimwi mube aluumuno akati kanu."