1 Nibwakamana buzuba bwaSabata, Meri wakuMagadala, Meri banyina Jakkobbu, aSalome bakawula butopozyo kuti bayiinke kuyoonanika mutunta waJesu. 2 Chifumofumo mubuzuba butaanzi bwamviki, zuba mbulyakapasula biyo bakayinka kuchibunda. 3 Alimwi bakabuzyaniya uumwi awumwi kuti, "Ngwani utaakatukunkulisizye bbwe kuzwa kumulyango wachibunda?" 4 Pesi nibakalanga, bakabona bbwe pati kalili lyakunkulisigwa. Eeli bbwe lyakali pati loko. 5 Aboobo nibakanjila muchibunda, bakabona mwaalumi mukubusi, kasamide chisamo chituba ulikkede kulubazu lwakululyo, mpawo bakagamba.

6 Wakati, "Mutagambi, mulanguula Jesu muNazareti, wakagankaminwa achiingano. Wabuka, Tawo pe aano! Amulange abusena mpubakamubikide. 7 Pesi kamuya, mukaambile basikwiiya bakwe, aamwi aPita kuti ulookwiinda kunembo lyanu kuya kuGalili. Nkukooko muyoomubona, mbuli mbwaakamwaambila.’ "

8 Banakazi bakazwa muchibunda kabagambide akukankama, bakachija. Taakwe nikuba uumwi ngubakaambila pe, nkaambo bakaliyoowede.

9 Eelyo Jesu naakabuka chifumo mumazuba butaanzi bwamviki, wakatanguna kulitondeezya lutaanzi kuli Meri wakuMagadala, uulya wakali amyuuya mibi iili musanu ayibili eeyo njaakaanda. 10 Meri wakayinka akuyoowambila bakali aaJesu, aabo bakali koomoka akulila. 11 Eelyo nibakamvwa kuti Jesu muumi, alimwi kuti Meri wamubona, teebazisyoma pe.

12 Kuzwa aawo Jesu wakalitondeezya muchiimo chimbi kuli bamwi babasikwiiya babili nibakali kuya kumuunzi. 13 Aaba babili bakabweeda alimwi bakwaambila bamwi; pesi tabakwe nibakabasyoma pe.

14 Musule lyaaya Jesu wakaliboniya kuli balikkumi awumwi nibakali kulya, wakabakalalila nkaambo kakubula lusyomo abusichinguni bwabo bwakukaka kusyoma aabo bakamubona kuzwa kuchiindi naakabuka. 15 Wakaamba kuti kulimbabo, "Kamuya munyika yoonse alimwi mukakambawuke makani mabotu kuzilengwa zyoonse. 16 Kufumbwa uusyoma alimwi wabbapatizigwa uyoofutulwa, pesi kufumbwa uutasyomi uyoobasimulandu. 17 Alimwi zitondeezyo eezi ziyoobatobela boonse basyoma, alimwi muzina lyangu bayoowanda myuuya mibi; bayoowambuula myaambo mipya; 18 bayoobweza inzoka amaboko aabo; alimwi nibayoonywa zijeya, tazikwe kuyoobachisa pe; bayoobika maboko aabo abachiswa, eelyo bachiswa bayoopona."

19 Mwami Jesu naakamana kubaambila, wakatolwa kujulu mpawo wakakukkala kuluboko lwalulyo lwaLeza. 20 Eelyo basikwiiya bakazwa baya kuyookambawuka koonsekoonse, eelyo Mwami wakabeleka ambabo mukusinizya ijwi lyakwe azitondeezyo zyakalikubatobela.