1 Eelyo Jesu abasikwiiya bakwe bakayiinka mutala eliya yalwizi, kunyika yabaGerasenesi. 2 Alimwi Jesu naakazwa mubwaato, wakaswaniya mwaalumi wakazwa kuzibuunda wakala muuya mubi, 3 Mwaalumi ooyu wakali kukkala kuzibumda; alimwi takukwe wakali kukonzya kumwaanga pe, nikuba anketani. 4 Chiindi chiingi wakali kunoonga waangwa anketani kumaboko akumawulu, pesi nketani walizidunsula, alimwi zyakumawulu wakali kuzidunsula; alimwi takwe wakajisi nguuzu zyakumuzunda. 5 Sikati amansiku akati kazibuunda alimwi aziluundu wakali kulila choonse chiindi, mpawo kali kuli chudulula amabwe.

6 Alimwi nakabona Jesu kulaale, wakachijana mpawo wakafugama, 7 alimwi kalokoompolola ajwi pati, wakati, "Ulaanzi atala andime, Jesu, Mwana aLeza Usumpukide? Ndakukumbila aLeza, utandipenzyi." 8 Nkaambo wakali wati kulinguwe, "Kuzwa kumwaalumi ooyu, iwe muuya mubi!"

9 Alimwi Jesu wakamubuzya wati , "Nduweni izina lyako?"

Wakavwiila wati, "Izina lyangu ndime Ligiyoni; nkaambo tuli bayiingi." 10 Alimwi Ligiyoni wakali kunoonga kakumbila Jesu kapati kuti atabatandili kunze abusena.

11 Lino butaanga lupati lwangulube lyakali kuchela kumbali achilundu, 12 alimwi yakamukumbila kuti, "Alimwi myuuya mibi yakamukumbila kuti, "Tutandile mungulube, atunjile muli nzizyo." 13 Aboobo wakazizumizya kuti zyeende. Mpawo myuuya mibi yakazwa, mpawo yanjila mungulube; alimwi butanga bwangulube bwakali kunoba zyuulu zibili, zyakakunuka chakufwambana kunkomwe yalwizi, mpawo zyanikila mulwizi.

14 Bembeli bakachija, alimwi bakwaambila bali muchisi amunyika. Alimwi bantu bakaza kukuzoboona eecho chakali chachitika. 15 Alimwi bakaza kuli Jesu, mpawo bakaboona wakali amyuuya kakkede awo, kazweete alimwi kaluleme, mwaalumi wakali aligiyoni; alimwi bakayoowa. 16 Alimwi aabo bakaziboona bakaamba zyakachitika kuli ulamyuuya mubi akungulube.

17 Alimwi bakatalika kumukumbila Jesu kuti ayeende kuzwa mubusena bwabo.

18 Mpawo nakali kunjila mubwaato, mwaalumi wakali njidwe myuuya mibi wakamukumbila kuti aabe aawe.

19 Pesi wakakaka, alimwi wakati kulinguwe, "Kuuya kuŋanda kumpuli yakulindinywe, mpawo ukabaambile eezyo Mwami nzyakuchitila, mpawo anzila njakufwida sule."

20 Alimwi wakeenda mpawo wakatalika kwaamba muDikkapolisi (Madolopo alikkumi) eezyo Jesu nzyakamuchitila aayo; alimwi bantu boonse bakagambwa.

21 Alimwi aawo Jesu kali wataluka lubo mubwaato mutala, inkamu mpati yakamuzyungulukila; alimwi wakali kumbali alwizi. 22 Eelyo kwakaza umwi mupati wachikombelo, izina lyakwe nguJayirasi; alimwi nakamubona, wakawida kumawulu aJesu, 23 alimwi wakamukumbila, kati, "Mwanaangu musimbi muniini wabaachimo chakufwa. Kuuza alimwi uzomubike maboko, kuchitila kuti aabe kabotu, mpawo apone."

24 Alimwi Jesu wakeenda aawe. Mpawo inkamu mpati yakamutobela mpawo bakamusyanikizya koonsekoonse.

25 Alimwi kwakali mwanakazi wakala kalobola kwaminyaka ilikkumi ayibili, 26 alimwi wakali wafwaaba kukuyandula kusilikwa kubasilisyi bayiingi, alimwi wakali wabelesya zyoonse zyakajisi, mpawo takwe nakapona pe pesi zyakali kwinkilila anembo. 27 Wakamvwa impuwo atala aJesu, mpawo wakaza kuzwa kusule lyakwe munkamu alimwi wakajata chisamo chaJesu. 28 Nkaambo wakati, "Kuti nindajata chisamo chakwe, ndilapona."

29 Mpawaawo kalobola kakamana; alimwi wakamvwa mumubili wakwe kuti wapona kuzwa kubulwazi oobu. 30 Alimwi Jesu wakamvwa kuti inguzu zyazwa mulinguwe, mpawawo wakachengunukila kunkamu, mpawo wati "Ngwani wajata zisamo zyaangu?"

31 Alimwi basikwiya bakwe bakati kulinguwe, "Ulibwene inkamu mbilikusyanikizyaniya alinduwe, alwimi ulikuti, ‘Ngwani wandijata?’ "

32 Alimwi wakalangalanga kaliikuyanduula kuti abone kuti ngwani wazichita.

33 Pesi mwanakazi, kazi zyakachitwa kulinguwe, wakasika mukuyoowa akukankama mpawo wawida kunembo lyakwe, alimwi wamwaambila kasimpe koonse. 34 Mpawo wakati kulinguwe, "Musimbi, lusyomo lwako lwakuponiya; kuya muluumuno mpawo upone mubulwazi bwako."

35 Naakachili kwambuula, kwakaza bazwa kuŋanda yamweendelezi wachikombelo kati, "Mwana aako musimbi wafwa. Nkaamboonzi nuchipenzya Muyiisi?"

36 Pesi taakaswiilizya pe nzibakaamba, Jesu wakati kumweendelezi wachikombelo, "Utayoowi, syoma biyo." 37 Alimwi taakwe ngwakazumizya pe kuti bamutobele kunze kwa Pita aJakkobbu aJoni mwanike waJakkobbu. 38 Nibakasika kunganda yamweendelezi wachikombelo, wakabona lupyopyongano, alimwi bantu kabalila akoomoka kupati. 39 Alimwi naakanjila, wakati kuli mbabo, "Nkaamboonzi nimulila akoomoka? Mwana tafwide pe pesi uliikoona."

40 Mpawo bakamuseka. Pesi wakabaandila aanze boonse, mpawo wakayita wisi amwana abanyina abaabo mbakali aabo, mpawo banjila omo mwana mwakalibede. 41 Naakamubweza aluboko wakati kuli nguwe, "Talita kkumi" chaamba kuti, "Kasimbi, ndati kuli nduwe, buka."

42 Alimwi mpawo aawo musimbi wakabuka mpawo weenda, (wakali aminyaka ilikkumi ayibili yakuzyalwa), alimwi bakazula kugambwa. 43 Alimwi wakabalayilila kuti kutabi umwi uziba eechi, mpawo wakabaambila kuti bamupe chakulya.