1 Alimwi Jesu abasikwiiya bakwe nibakaamba kunjila muJerusalemu kumyuunzi itegwa Betipeji aBbetani iili afwiifwi aChilundu chama Oliva, Jesu wakatuma basikwiiya bakwe babili kunembo lyakwe. 2 Jesu wakati kulimbabo, "Ngamwiinke kumuunzi ulikunembo lyanu, mbumutakanjile biyo, muyojana mwana wambongolo waangidwe nkuko, utanatantwa nikuba muntu uumwi. Mukamwaangunune mumweete okuno. 3 Kuti umwi waakumubuzya wati, ‘Muchitilaanzi eechi?’ Mukamwaambile kuti, ‘Mwami nguulikumuyanda alimwi ulamuboozya aano muchiindi chifwiifwi.’ "

4 Basikwiiya bakayinka bakamujana mwana wambongolo kaangilidwe mukazila kumulyango. Nibakali kumwaangununa, 5 bamwi bantu bakayiimvwi mpawo bakabuzya kuti, "Muchitaanzi, nimwaangununa mwana wambongolo ooyu?"

6 Bakavwiila mbuli Jesu mbaakabalayilila, mpawo bantu bakabazumizya kuti beende. 7 Nibakamweeta mwana wambongolo kuli Jesu bakayala nsasiko amusana wambongolo, eelyo Jesu wakakkala alinguwe. 8 Bantu bayingi bakayala nsasiko zyabo mumugwagwa, bamwi bakayala matabi ngibakatemede mumyuunda. 9 Bakazula abakali musule lyaJesu bakoompolola kabati, "Hosanna! Ulilongezezegwe ooyo uza muzina lyaMwami!* 10 Bulilongezezegwe bwami bwataata wesu Devidi buyoobuza! Hosanna mujulu lyamajulu!"

11 Jesu wakanjila mu Jelusalema akwiinka muŋanda yaLeza. Wakalangalanga zintu zyoonse, pesi nkaambo kakuti lyakali lyabagoko, wakayinka kuBbetani abalikkumi ababili.

12 Mubuzuba butobela Jesu abasikwiiya bakwe nibakazwa muBbetani, Jesu wakaba anzala. 13 Mukubona mukuyu amatu aawo chakule, wakayiinka kuti akabone kuti ulamichelo na. Naakasika mpawo wakajana matu luzutu, kakutakwe michelo, nkaambo teensi chakali chiindi chankuyu pe. 14 Eelyo Jesu wakaambila mukuyu kuti, "Kutazoobi nikuba uumwi uzoolya michelo kulinduwe lubo."

Basikwiiya bakamumvwa kaamba makani aayo.

15 Jesu abasikwiiya bakwe nibakkasika muJelusalema, Jesu wakanjila muŋanda yaLeza mpawo wakabatanda bakali kuula akuuzya oomo. Wakatonta matebuli abasikubbindawuka mali azyuuno zyabaabo bakalikuuzya nkwilimba. 16 Mpawo taakwe naakazumizya nikuba uumwi kuti abweze zyakalikuuzigwa mulubuwa lwaŋanda yaLeza. 17 Mpawo wakabayiisya wati, "Takulembedwe na kuti, ŋanda yangu iyootegwa niŋanda yakukombela kwamanyika woonse?’* Pesi nywebo mwayichita chifuko chabasikubba."*

18 Bapayizi bapati abayiisyi bamulawu bakaamvwa makani aaya eelyo bakayanduula inzila zyakumujaya aazyo, mukuti bakali kumuyoowa, nkaambo bantu boonse bakaba akugamba kunjiisyo yakwe.

19 Nilyakaba goko, Jesu abasikwiiya bakwe bakazwa muchisi.

20 Jesu abasikwiiya bakwe chifumo, nkabayoobubweenda, bakabona mukuyu wakayuma kuzwa kumiyanda. 21 Pita wakayeeya mpawo wakati kuli Jesu, "Muyiisi, laanga! Mukuyu nguwakatuka wakayuma!"

22 Jesu wakavwiila kuti, "Amube alusyomo muli Leza. 23 Ndamwaambila kasimpe kuti, naa umwi wati kuchilundu eechi, ‘Kuya ukaliwaalile mulwizi,’ mpawo katadooneki mumoyo wakwe pesi kasyoma kuti eezyo nzyawamba ziyochitika, ziyoomuchitikila mbubo. 24 Nkikaako ndamwaambila kuti, kufumbwa nchimuyookumbila mukukomba, amusyome kuti mwachijana, mpawo chiyooba chanu. 25 Mpawo naa wayimikila kulikukomba, na kuwangilide umwi moyo, mulekelele, kuchitila kuti Wuso uulikujulu akulekelele zibi zyako." 26 Pesi kuti inywe kamutalekeleli bantu bali amilandu kulindinywe, alakwe Wuso uulikujulu takoyoomulekelela milandu yanu."

27 Jesu abasikwiiya bakwe bakasika lubo kuJerusalemu, eelyo Jesu naakayobweenda mulubuwa lwaŋanda yaLeza, bapayizi bapati, abayiisyi bamulawu abaalu bambungano bakaza kulinguwe. 28 Bakabuzya bati, "Mubwendeelezi buli mbuchita zintu ziliboobu? Alimwi ngwani ukupa bweendelezi bwakuchita zintu eezi?"

29 Jesu wakabavwiila wati, "Ndiyoobuzya mubuzyo uumwi. Mundivwiile, eelyo ndiyoomwaambila kuti mubweendelezi bwani mundiilikuchita zintu eezi. 30 Kubbapatizya kwaJoni, kwakali kuzwa kujulu na, naakuti kwakazwa kubantu? Mundaambile!"

31 Bakakazyaniya akati kabo atala amakani aaya mpawo bakati, "Twaamba kuti, ‘Kuzwa kujulu,’ ulatubuzya kuti, ‘Nkaamboonzi nimwakatamusyoma?’ 32 Pesi twaamba kuti, ‘Kuzwa kubantu.’ " (bakayoowa nkamu yabantu nkaambo boonse wakalizi kuti Joni musinsimi mwinimwini.) 33 Alimwi bakamuvwiila Jesu kabati, "Tatuzi pe."

Jesu wakabaambila kuti, "Aboobo nsikoomwaambila pe kuti mbweendeleziinzi nziindi chitaazyo."