1 Jesu wakazwa aawo mpawo wakaya kunyika yakulimbabo; abasikwiiya bakwe bakamutobela. 2 Mpawo muSabata wakatalika kuyiisya muchikombelo; alimwi bantu bayiingi bakamumvwa bakagamba, kabaamba kuti,

"Ooyu mwaalumi wakazijana kuli zintu zyoonse eezi? Mbusongoonzi mbwapedwe? Mulimu mupati ulibuyeni uchitwa amaboko akwe! 3 Tee nguumubezi na ooyu, teensi mwana waMeri na alimwi tee mukulana waJakkobbu aJozefu aJudasi aSayimoni, bachizi bakwe tee aabo mbitulaabo aano na?" Mpawo bakamupa mulandu.

4 Alimwi Jesu wakati kulimbaabo, "Musinsimi takwe bulemu muchisi chakwe, akati kanzubo zyakwe, abaŋanda yakwe." 5 Takwe kuyookonzya pe kuchita mulimi mupati, kunze kwakubika maboko atala abantu bache bachiswa akubaponiya. 6 Alimwi wakagamba nkaambo kakubula lusyomo kwabo.

Alimwi wakali kuya buyiisya mumyuunzi. 7 Mpawo wakayita kulinguwe balikkumi ababili, mpawo wakatalika kubatuma babilibabili, mpawo wakabapa nguzu atala myuuya mibi. 8 Wakabalayilila kuti batabwezi chintu mulweendo lwabo; peepe chakulya, nikuba chikwama, nikuba mali mumikumba yabo, kunze amusako; 9 pesi amusame nsangu alimwi mutabwezi zisamo zibili. 10 Mpawo wakati kulimbaabo, "Oomo mumuyoonjila muŋanda, mukakkale mumo mane mukazwe dolopo oobo. 11 Alimwi naa busena tee bwamutambula pe nikuba kuleka kumumvwa, nimutakuzwe, mukakunkumune lusuko luli kumawulu aanu bukabe bukamboni alimbabo."

12 Aboobo bakazwa mpawo baakukambawuka kuti bantu beelede kusanduka. 13 Alimwi bakatanda basikazwa bayiingi, mpawo bakabananika bayiingi mafuta aabo bakalikuchiswa alimwi bakabaponiya.

14 Mwami Herodi wakamvwa atala acheechi; nkaambo izina lyaJesu lyakali lyazibikana. Bamwi bakati, "Joni muBbapatizyi wabusigwa kuzwa kubafu; nkikaako nguzu eezi zilikubeleka mulinguwe."

15 Pesi bamwi bakati, "NguElayija."

Alimwi bamwi bakati, "Musinsimi, mbuli uumwi wabasinsimi bachiindi."

16 Pesi Herodi naakachimvwa eechi wakati, "Joni, ooyo ngundakadyunkula mutwe, wakabusigwa kuzwa bafu!" 17 Nkaambo Herodi wakali watuma kuti bajate Joni, alimwi bakamwaanga bamubikka muntolongo nkaambo kaHerodiyasi, mwanakazi wamukulana wakwe Filipu; nkaambo wakali wamukwata. 18 Nkaambo Joni wakali wati kuli Herodi, "Tachili mumulawu pe kuti ukwate mwanakazi wamukulana wako!"

19 Aboobo Herodiyasi wakali antiili anguwe, alimwi wakali kuyanda kumujeya. Pesi tee wakakonzya pe, 20 nkaambo Herodi wakali kuyoowa Joni nkaambo wakalizi kuti muntu ululeme kali musalali, alimwi wakamubaamba kabotu. Naakamumvwa, wakapengana, alimwi kali wakamumvwa chakukondwa.

21 Pesi mweenya wakaba aawo Herodi naakachita pobwe lyakuzyalwa kwakwe kubapati babeendelezi abasilutwe babasilumamba, abazulwidi babantu muGalili. 22 Aawo mwana musimbi waHerodiyasi naakanjila mpawo wazyana, wakabotezya Herodi abeenzu bakwe;

mpawo mwami wakati kumusimbi, "Ndikumbile kufumbwa nchuyanda, alimwi ndilakupa nchicho." 23 Mpawo wakamusyomezya achikonke wati, "Kufumbwa nchuyoondikumbila, ndiyookupa, nikuba chisela chabwaami bwangu!"

24 Alimwi wakeenda, mpawo waakuti kuli banyina, "Ndikakumbileenzi?"

Mpawo wakavwiila wati, "Mutwe waJoni muBbapatizi."

25 Mpawaawo wakanjila chakufwambaana kumwami akukumbila, kati, "Ndiyanda kuti undipe mutwe waJoni linoobu mundido!"

26 Mpawo mwami wakawusa chakwiindilila; nkaambo kachikonke chakwe abeenzu bakwe teewakayanda kutyola chizuminano chakwe pe. 27 Alimwi mpawaawo mwami wakatuma mulindizi wabasilumamba mpawo wamulayilila kuti akeete mutwe waJoni. Wakayinka mpawo waakumudunsula mutwe muntolongo; 28 mpawo wakeeta mutwe waJoni mundido, alimwi wakapa musimbi; mpawo musimbi wakapa bayina. 29 Basikwiiya baJoni nibakamvwa atala anchicho, bakaza mpawo babweza mutunta wakwe, alimwi bakubamba muchibunda.

30 Batumwa bakabweeda kuli Jesu mpawo bamwaambila zyoonse nzibakachita akuyiisya. 31 Nkaambo bayingi bakalikuza alimwi kabeenda, mpawo wakati kulimbabo, "Amweende kubusena busitikide, mpawo mukalyookezye buniini." nkaambo teebakali achiindi chakulyookezya pe nikuba kulya.

32 Aboobo bakanjila mubwaato bazubuka baya kubusena busitikide abaliikke. 33 Pesi bantu bayingi bakababona kabeenda, alimwi bakali bazi, mpawo bakachijaana amawulu kuzwa mumadolopo woonse, alimwi bakabayindila kusika kubusena oobo. 34 Jesu kachiya bweenda kunkomwe wakabona nkamu mpati yabantu, wakabafwida luzyalo, nkaambo bakali mbuli mbelele zitakwe mweembeli. Mpawo wakatanguna kubayiisya zintu zyiingi.

35 Lino muchiindi eechi lyakali lyabagoko, eelyo basikwiiya bakwe bakaza kulinguwe. Bakati, "Okuno mbusena busitikide, alubo lyamba kubbila kale. 36 Mwayiisya bantu aaba baye mumyuunzi izyungulukide nyika eeyi bakalyulile chakulya."

37 Pesi Jesu wakabavwiila wati, "Mubape chintu chimwi chakulya."

Bakati kulinguwe, "Ziyanda makkobili alimyaanda iibili yamali!* Tubelesye mali iilibobu na kuti tuule chakulya tubape balye?"

38 Wakababuzya wati, "Mujisi zinkwa zingee? mwiinke mukalange."

Nibakalanguula bakati, "Tujisi zinkwa zilimusanu abaswi babili."

39 Eelyo Jesu wakalayilila basikwiiya kuti baambile bantu boonse kuti bakkale muzibunga zibunga abwizu butete. 40 Mpawo bakakkala aansi muzibunga zyamyaanda azibunga zyamakumi musanu 41 Jesu wakabweza zinkwa zilimusanu abaswi babili mpawo wakalanga kujulu, wakapa kulumba eelyo wakakwamuna zinkwa, mpawo wakapa basikwiiya bakwe kuti baabile bantu. 42 Bakalya boonse mpawo bakkuta, 43 alimwi basikwiiya bakabwezelela bufwefwelenga bwazinkwa abaswi bwakachala bazuzya zisuwo zilikkumi azibili 44 Imweelwe wabaluumi bakalya wakali kusika kuzyuulu zili musanu.

45 Mpawawo Jesu wakaambila basikwiiya bakwe kuti banjile mubwaato batunge nembo kukuya mutala alwizi kuBbetisayida, naakachala kali wakamwayisa bantu. 46 Eelyo naakabalaya, wakaya kuchilundu kuti akakombe.

47 Lino nilyakaba goko, abwaato bwakali akati kalwizi, mpawo wakachaala alikke kunze alwizi. 48 Wakabona basikwiiya kabalokuzundaana chabuyumuyumu kukuyamba abwaato, nkaambo muuwo wakabalwanisya. Achiindi chakubuchedo wakeenda atala ameenda, kaya kulimbabo. Wakali waamba kubayinda kumbali. 49 Pesi nibakamubona keenda atala alwizi, bakayeeya anga ncheelo, bakakwiila, 50 nkaambo boonse nibakamubona bakayoowa.

Mpawawo Jesu wakati kulimbabo, "Mujate moyo! Ndime, mutayoowi pe." 51 Eelyo wakanjila mubwaato ambabo, mpawo muuwo wakamana. Bakagamba loko, 52 mbukunga teebakamvwisisisya pe atala amalele azinkwa; nkaambo mizeezo yabo yakali kujatila kule.

53 Jesu aBasikwiiya nibakazubukila lwizi, bakasika kunyika kuGenesareti ooko kubakanga bwaato kunkomwe yalwizi. 54 Nibakachili kuzwa biyo mubwaato bantu bakamuziba Jesu mpawawo. 55 Bakachijaana muchisi choonse alimwi bakanyampula bachiswa abuyalagwe akubatola ooko kufumbwa nkubakamvwa kuti nkwabede. 56 kufumbwa kumyuunzi nkwakali kuya, kumadolopo akumasena oonse, bakali kubikka bachiswa kuzisambalilo. Bakamukumbila kuti bagume moombe wachisamo chakwe, alimwi kufumbwa boonse bakaguma bakaponesegwa.