1 Mumazuba aayo imwi nkamu mpati yakabungana. Mbukunga teebakali akulya pe, Jesu wakiita basikwiiya bakwe eelyo wakati, 2 "Ndabaaluse abantu aaba, baba amazuba aatatu kabala andime alimwi kabatakwe chakulya. 3 Kuti ndababweedezya kumyuunzi yabo anzala, bayoosuntuka munzila, nkaambo bamwi babo bazwakule."

4 Alimwi basikwiiya bakwe bakavwiila bati, "Pesi nkokuuli munkanda iloobu nkutunga tuyookonzya kujana chakulya chizulila bantu boonse aaba?"

5 Jesu wakabuzya kuti, "Mujisi zinkwa zingene?"

Bakamuvwiila bati, "Zilimusanu azibili."

6 Wakaambila makamu kuti akkale aansi. Naakabweza zinkwa zilimusanu azibili wakalumba, wakwamuuna wapa basikwiiya bakwe kuti baabile bantu, mpawo bakachita oobo. 7 Bakalaabaswi bache buyo abalo; alimwi wakalumba kuli Leza waambila basikwiiya bakwe kuti baabile bantu. 8 Eelyo bantu bakalya bakkuta. Nibakamana basikwiiya bakabwezelela zisuwo zilimusanu azibili zyabufwefwelenga bwakachaala. 9 Lino bakaliwo bakali baalumi bakalikukonzya kuba zyulu zine. Jesu wakabamwayisya 10 alimwi mpawawo wanjiila mubwaato abasikwiiya bakwe wakusika kuchilikiti chaDalamanuta.

11 Lino bamwi Bafarisi bakasika kabalikukazyaniya awe. Bakatalika kumusunka Jesu kabayanduula chitondeezyo chizwa kujulu. 12 Jesu wakawuusa kapati mpawo wati, "Nkaamboonzi zyalane eeli niliyanduula chitondeezyo? Ndamwaambila kasimpe tachiwo chitondeezyo chiyoopegwa zyalane eeli."

13 Mpawo wakabasiya, wanjila mubwaato waya mutaleeliya.

14 Basikwiiya bakwe bakali baluba kuza azinkwa, kunze achinkwa chomwe luzutu nchibakali aacho mubwaato. 15 Lino Jesu wakabachenjezya wati. "Ngamuchenjele bumena bwaBafarisi abwaHerodi."

16 Eelyo bakayiizya akati kabo kabati, "Waamba oobu nkaambo tatukwe chiinkwa pe."

17 Jesu kazi nzibakali kwiizya, wakati kulimbabo:"Nkaamboonzi nimulokwambuula ataala akubula chinkwa? Tamuna bona pe nekuba kumvwisisya? Mizeezo yanu ijatila kule na? 18 Mulijisi meso, tamuboni na? Amatwi mulijisi tamumvwi na? Alubo tamuyibalukwi na? 19 Nindakakwamuna zinkwa zilimusanu kuli balizyuulu zilimusanu, nzingee zisuwo zwabufwefwelenga nzimwaka bunganiya?"

Bakamuvwiila bati, "Ikkumi azibili,".

20 "Nindakakwamuna zilimusanu azibili kuli bali zyulu zine, nzingaana zisuwo zyabufwefwelenga nzimwaka bunganiya?"

Bakamvwiila bati, "Musanu azibili."

21 Wakati kulimbabo, "Alino tamuna mvwisisisya pe?"

22 Eelyo Jesu abasikwiiya bakwe nibakasika kuBbetisayida, alimwi bamwi bantu bakeeta mwaalumi moofu mpawo bakakumbila Jesu kuti amugume. 23 Aboobo Jesu wakabweza mwaalumi moofu aluboko wamutola anze amuunzi. Lino naakaswida mumenso amwaalumi wakabika maanza alinguwe, Jesu wakabuzya wati, "Kuli nchubwene na?"

24 Lino wakalanga kujulu wati, "Ndibwene bantu; kabali mbuli misamu yeenda."

25 Jesu wakamubika lubo maboko kumeso aakwe. Eelyo imeeso aakwe akajulika, wakabona, alimwi wakabona oobotu. 26 Jesu wakati, " Kuya kuŋanda, pesi utabwedi mumuunzi."

27 Jesu abasikwiiya bakwe bakaya kumyuunzi iili afwiifwi abusena butegwa Sizariya Filipi. Nibakali kuyoobwenda munzila wakabuzya kulibasikwiiya wati, "Bantu bati ndimeni?"

28 Bakamuvwiila bati, "Bamwi bati nduwe Joni muBbapatizyi; bamwi bati Elayija; awalo bamwi, bati uli uumwi wabasinsimi."

29 Wakati, "Anu nywebo? Muti ndiime ni?"

Pita wakavwiila wati, "Nduwe Kkirisitu."

30 Jesu wakabachenjezya wati, "Mutabuzyi bantu atala andime."

31 Eelyo Jesu wakatalika kubayiisya kuti Mwana waMuntu uyoopenzegwa muzintu zyiingi eelyo uyookakwa abaalu, abapayizi bapati abayiisyi bamulawu, nkabela weelede kuti ajeegwe, kwakwiinda mazuba aatatu akakubuke lubo. 32 Wakaambuula antanganana, atala azeezi, eelyo Pita wakamutola Jesu kumbali awalo watalika kumukalalila.

33 Aawo Jesu naakachebuka wakalanga kuli basikwiiya bakwe. Wakakalalila Pita wati, "Zwaa kusule lyangu, Satani! Tukwee muzeezo wamabaambe aLeza, pesi mizeezo yabantu!"

34 Eelyo Jesu wakayiita nkamu antoomwe abasikwiiya bakwe wati, "Na muntu kayanda kunditobela, weelede kulitakata abweze chiingano chakwe anditobele. 35 Nkaambo uyanda kuyobola buumi bwakwe bulamusweekela, pesi ooyo uusweekelwa buumi bwakwe nkaambo kangu amakani mabotu uyoobuyobola. 36 Nkaambo chigwasyaanzi kuti muntu ajane nyika yoonse, pesi wasweekelwa buumi bwakwe? 37 Nkaambo nchichiili muntu nchaakonzya kupa kuti ajane buumi bwakwe? 38 Na muntu kafwa bweeme atala andime ajwi lyangu muleeli zyalane lyabwaamu abubi, Mwana waMuntu uyomufwida bweeme nayooza mubulemu bwaWisi antoomwe abaangelo basalala."