1 Nikwakayinda mazuba Jesu wakabweeda kuKkapenawumi, bantu bakamvwa kuti wakali muŋanda. 2 Alimwi bayingi bakali bungene aamwi, mane tekwakachili busena pe bwakali bwachala, nikuba afwiifwi amulyango; mpawo wakabakambawukila ijwi. 3 Mpawo baalumi bane bakasika kabanyampwide ulebukide, bakamweeta kuli Jesu. 4 Alimwi nibakakachilwa kumweeta afwiifwi anguwe nkaambo kakuvula kwankamu, bakagwisya chiluli; mpawo nibakajula, bakaselusya buyalangwe oobo mbwakalilede alimbubo ulebukide. 5 Alimwi Jesu naakabona lusyomo lwabo, wakati kuli ulebukide, "Mwanaangu, zibi zyako zyalekelelwa."

6 Lino bamwi bayiisyi bamulawu bakalikkede mpawawo, kabaliyeeya lwabo kuti, 7 "Nkaamboonzi ooyu mwaalumi naambuula oobu? Ulikusampawula! Ngwani ukonzya kulekelela zibi pesi Leza aliikke?"

8 Mpawawo Jesu, kazi muMuuya wakwe kuti eechi nchiinchicho nchibaliikuyeeya, wakati kulimbabo, "Nkaamboonzi nimuyeeya zintu ziliboobu? 9 Nchiichili chuuba, kwaambila ulebukide kuti, ‘Zibi zyako zyalekelelwa,’ nikuba kwaamba kuti, ‘Buka, bweza buyalangwe bwako mpawo weende?’ 10 Pesi kuti muzizibe kuti Mwana aMuntu ulaanguzu zyakulekelela zibi anyika." Jesu wakati kuli ulebukide, 11 "Ndakwaambila, buka, bweza buyalangwe bwako mpawo uye kuŋanda."

12 Mpawo wakabuka, wakabweza buyalangwe alimwi weenda kunembo lyabo boonse. Eechi chakabagambya boonse alimwi bakalumbayizya Leza, kabati, "Tatuna chibona pe chili mbuli eechi!"

13 Alubo Jesu wakaya kumbali alwizi lyaGalili, mpawo wakabayiisya. 14 Alimwi naakali kuyobweenda, wakabona Levi mwana waAlifasi kakkede aŋanda yabasimutelo, alimwi wakati kulinguwe, "Nditobele." Mpawo wakabuka wamutobela.

15 Alimwi naakalikkede kuliikulya muŋanda yakwe, basimutelo bayingi abasizibi bakalikkede aJesu abasikwiiya bakwe; nkaambo bakali bayingi bakamutobela. 16 Alimwi bayiisyi bamulawu bakali baFarisi, nibakabona kuti uliikulya abasizibi abasimutelo, bakati kuli basikwiiya bakwe, "Nkaamboonzi nalya abasimutelo abasizibi?"

17 Alimwi Jesu naakachimvwa eechi, wakati kulimbabo, "Aabo balikabotu tabayandi musilisi, pesi aabo bachiswa, teendakazida basalali pe, pesi basizibi."

18 Lino basikwiiya baJoni abaFarisi bakali kulyiimya; mpawo bantu bakaza kulinguwe kabati, "Nkaamboonzi basikwiiya baJoni abasikwiiya babaFarisi nibalyiimya, pesi basikwiiya bako tabalyiimyi pe?"

19 Alimwi Jesu wakati kulimbabo, "Ngabalalyiimya biyeni basikutambwa kupobwe lyakukwatana, sikukwata kabali aawe? Kufumbwa kabachili aamwi asikukwata, tabakonzyi pe kulyiimya. 20 Mazuba ayoosika, aawo sikukwata nayootolwa, alimwi eelyo bayoolyiimya mubuzuba oobo.

21 Taakwe naba umwi usuma chigamba chipya achisamo chikulukulu, kuti wachita oobo, chigamba chiladeluka kuzwa kulinchicho, chipya kuzwa kuchikulukulu, alimwi chilayindilila kudeluka. 22 Alimwi taakwe kufumbwa utila wayini mupya mumunkuli mukulukulu; kuti wachita oobo, wayini ulabbalula munkuli, mpawo wayini ulatika, alimwi wayini amunkuli ulanyonyooka; pesi wayini mupya ngwamunkuli mupya."

23 Muli imwi Sabata Jesu abasikwiiya bakwe nibakali kuyabweenda mumyuunda yamayila; basikwiiya bakwe bakatalika kupulula mayila. 24 Alimwi baFarisi bakati kulinguwe, "Laanga, nkaamboonzi basikwiiya bako nibaliikuchita zitali mumulawu musabata?"

25 Mpawo wakati kulimbaabo, "Tee mwakabala na eezyo Devidi nzyakachita, naakabula akuba aanzala, we abaabo mbaakali aabo, 26 ambakanjila muŋanda yaLeza, aawo Abbiyata nakali Mupayizi Mupati, mpawo wakalya chinkwa chisalala, chitazumizigwi kufumbwa uumwi kunze kwabapayizi kuti balye, alubo wakachipa kuli aabo mbaakali aabo."

27 Mpawo wakati kulimbaabo, "Sabata lwakachitilwa muntu, peepe muntu kuSabata; 28 aboobo Mwana aMuntu nguMwami nikuba waSabata."