1 Alimwi Jesu naakali kuzwa muŋanda yaLeza, umwi wabasikwiiya bakwe wakati kulinguwe, "Muyiisi, laanga! Mabwe meebesi amaanda meebesi!"

2 Jesu wakavwiila wati, "Ulaabwene na maanda mapati woonse aaya? Takwe pe bbwe niliba limwi liyoochaala kalili aatala alimwi; woonse ayoowalilwa aansi."

3 Jesu naakakkede aChilundu chamaOliva chilangene aŋanda yaLeza, Pita, Jakkobbu, aJoni aEnduru bakamubuzya kavwiindi bakati, 4 "Twaambile, ndiilili niziyoochitika zintu eezi? Alubo nzeezili zitondeezyo nzituyoobona aazyo kuti zyaamba kuzuzikizigwa?"

5 Jesu wakabaambila kuti, "Amuchenjele kuti kutabi umwi umweeni. 6 Mbayingi bayooza muzina lyangu, kabalyaamba kuti, ‘Ndiindime Kkirisitu!’ eelyo bayooyena bayingi. 7 Mwayoomvwa aatala ankondo ampuwo zyankondo, mutakayoowi. Eezyo zintu zyeelede kuchitika, pesi mamanino achiyobuza. 8 alimwi nyika iyoobukilana anyika nyina, alubo bwami abwaminyina. kuyooba iyooteketa kwanyika mumabbazu asiyenesiyene, alubo kuyooba bbalangwe. Eezi ziyooba mbuli kumyongwa kutaanzi kwamwanakazi uyanda kutumbuka.

9 Mweelede kukkala kamulibambilide. Muyoowabwa kubeendelezi bamyuunzi akuumwa muzikombelo. Nkaambo kangu muyoyima kunembo lyabasilutwe bazilikiti abami mbuli bakamboni kulimbabo. 10 Mpawo makani mabotu ayeelede kuyookambawukwa kumikowa yoonse. 11 Kufumbwa mpumuyoowangwa akutolwa kukubetekwa, mutakalikataazyi kuti muyoowamba kamutyeni. Mukaambe biyo eezyo nzimutanooli mwapegwa kuli cheecho chiindi, nkaambo tamunooli ndinywe batanoowambule, pesi unooli nguMuuya USalala. 12 Bana bamuntu uumwi bayoowuzyaniya kulufu, alubo wisi uyoochita mbubo kumwanaakwe. Bana bayoolwana abazyali babo mane bakabajazye. 13 Bantu boonse bayoomusula nkaambo kandime, pesi ooyo uyookakatila mane kumamanino uyoovunwa.

14 "Mwaakubona chisesemyo chalunyonyooko chiima aabusena mpuchiteelede, (mubali akumvwisisisya) mpawo abalabo bali muJudiya bakachijile muzilundu. 15 Ooyo uli achiluli ataseluki naa kunjila muŋanda kuyoogwisya chimwi chintu. 16 Uyoojanwa kumuunda atakabooli kuŋanda kuyoobweza nsasiko yakwe. 17 Kuyooba kufwaba kupati kuli aayo mazuba kubanakazi bamitide abanyonsya. 18 Kamukomba kuli Leza kuti eezi zitakachitiki muchiindi chamupeyo. 19 Nkaambo ayooba mazuba amapenzi mapati kwiindilila bantu ngibakaswene kuzwa kutamatalikilo, aawo Leza naakalenga nyika kusika sunu, alubo mapenzi aali boobu takoyoochitika limbi pe. 20 kuti Mwami taakafwiinsya mazuba aayo, nikunga taakwe wali kuyoopona pe. Pesi ankaambo kabantu bakwe mbaakasala uyoowafwiinsya.

21 Kuchiindi eecho naa umwi waamba kuti, ‘Mulange, ngooyu Kkirisitu!’ na kalikwaamba kuti ‘Mulange, nguulya nkwabede!’ tamweelede kusyoma pe. 22 Nkaambo kuyooyubunuka baKkirisitu babeji abasinsimi babeji alimwi bayoochita zigambyo amalele kuti bakeenene nikuba basale baLeza, naa kazikonzeka. 23 Aboobo amukakkale kamulibambilide nkaambo ndamwaambila kazitanakusika pe.

24 Pesi mumazuba aayo, mapenzi aayo nayoomana, izuba liyoobola, kuyooba mudima mupati, amweezi uyoobola. 25 Nyenyeezi alazyo ziyooloka, nkaambo julu liyooteketa.

26 "Muchiindi eecho bantu bayoobona Mwana waMuntu kazwida mumayoba anguzu mpati abulemu. 27 Alubo uyootuma baangelo bakwe kuti bakabunganiye basale baLeza kuzwa kumabazu aane, kuzwa nkwiimanina nyika kuyoosika kumamanino ajulu.

28 "Lino amwiiye chiiyo kuzwa kumukuyu, aawo mitabi yawo niitalika kutunga ndelema amatu naasyuuka ngamwaziba kuti mayiinza abaafwiifwi. 29 Mbubonya oobo, mwaakuzibona zintu eezi kazichitika, mukazibe kuti chiindi chaba afwiifwi, chaba amulyango. 30 Ndamwaambila kasimpe, izyalane eeli talikuyooyinda mane zintu zyoonse eezi zikakuchitike. 31 Julu anyika ziyooyinda, pesi majwi aangu taakoyooyinda.

32 Jesu wakati, "Taakwe naba uumwi uuzi eelyo zuba nichiba chiindi, nibaba baangelo balikujulu nikuba Mwana waMuntu, pesi Taata alike nguuzi. 33 Mulibambilile, muchenjele, nkaambo tamuchizi chiindi eecho nichiyoosika. 34 Chili mbuli muntu wakeenda lweendo, wakasiya ŋanda yakwe wapa balanda bakwe nguzu, akubaabila umwi awumwi milimu yakuchita mpawo wakaambila mulindizi waamulyango kuti akkale kalangide. 35 "Nkikaako mukkale kamulibambilide nkaambo tamuchizi chiindi naboola muna aŋanda, naakuti linoli goko, nikuba aakati kamansiku, kubuchedo naakuti chifumofumo. 36 Kuti waboola chakufwambaana, mutazumini kuti mujanike kamulikoona pe. 37 Eezi nzindili kwaamba kulindinywe, ndiikwaambila bantu boonse: ‘Amulibambile!’ "