1 Chifumofumo, bapayizi bapati abaalu, abayiisyi bamulawu ankuta yoonse bakachita mabambe aabo. Mpawo bakamwaanga Jesu bamutola akuyoomupeda kuli Payileti. 2 Payileti wakamubuzya kuti,"Uli Mwami waba Juda na?"

Jesu wakavwiila wati, "Kuli mbuli mbwaamba."

3 Bapayizi bapati bakamutamikizya Jesu twaambo twiingi. 4 Lino Payileti wakamubuzya lubo wati, "Tusanduli na? Laanga twavula twaambo ntubaliikukutamikizya."

5 Pesi Jesu taakwe naakamuvwiila pe, mpawo Payileti wakagamba.

6 Lino chakali chiyanza chaPayileti kuti kuchiindi chaPobwe lyaKwiindilila kwaangununa mwaange muntolongo ngubakanoonga bamukumbila. 7 Mwaalumi utegwa Bbarabbasi wakali muntolongo, kali antoomwe abamwi bakali amilandu wabupapi, bakajaya bantu muchiindi chakupapa. 8 Makamu abantu akasika kuli Payileti akumumukumbila kuti achite mbuli mbaanoonga kachita. 9 Payileti wakababuzya kuti, "Muyanda kuti ndimwaangunwide Mwami waJuda naa?" 10 Payileti nkaazi kale kuti lyakalibbivwe lyabapati babapayizi nchibakeeta Jesu kulinguwe.

11 Pesi bapayizi bapati bakayunga makamu abantu kuti Payileti aangunune Bbarabbasi. 12 Payileti wakababuzya lubo wati, "Ndichite biyeni, kuli ooyu ngumuti Mwami wabaJuda?"

13 Bakoompolola bati, "Ngagankaminwe!"

14 Payileti wakabuzya kuti, "Nkaamboonzi? Wakachita mulanduunzi?"

Pesi boonse bakoompolola bati, "Ngagankaminwe!"

15 Payileti wakabaangunwida Bbarabbasi kuzwa muntolongo, kayanda kubotezya bantu, wakalayilila basilumamba kuti bakwipuule Jesu, akubazumizya kuti bakamugankamine.

16 Basilumamba bakatola Jesu kulubuwa lwaŋanda yamweendelezi, alimwi bakayita nkamu yoonse yabasilumamba nyina. 17 Bakamusamika chisamo chakamoomvwe, mpawo bamusamika musini wamaamvwa ngibakazambilila kuba nkata. 18 Alimwi bakatalika kumujuzya chakumuwela kabati, "Bulemeku kulinduwe, nuMwami wabaJuda!" 19 Bakali kwiindulula kabamuuma amutwe amusako, kabamuswida mate. Kabafugeme amazwi aabo, bakakotamika mitwe yabo chakweenena kumulemeka. 20 Alimwi nibakamana kumuniyaka, bakamuzuununa chisamo chakamoomvwe akumusamika zisamo zyakwe. Eelyo bakamugwisya aanze bamutola kuti bakamugankamina.

21 Umwi mwaalumi uzwa kuSayirini, utegwa Sayimoni, wisi waAlekizanda aLufasi, wakali kuyabwiinda kazwa mumyuunzi kaya muchisi, mpawo basilumamba bakamwaangila kuti anyampule chiingano. 22 Eelyo Jesu bakamweeta kubusena butegwa Gologota "chaamba kuti Busena bwaChoompo." 23 Alimwi bakamupa wayini isweenene amusamu utegwa mili, pesi taakayinywa pe. 24 Mpawo bakamugankamina, , bakawuma nkakata kuti babone naa uumwi awumwi ulabweza chili alimwi bakaabana zyakusama zyakwe. 25 Kwakali achikasalizi chazuba nibakamugankamina. 26 Bulembwi bwamulandu wakwe bwakali lembedwe boobu, "MWAMI WABAJUDA." 27 Jesu bakamugankamina aamwi ababbi babili, umwi kululyo lwakwe uumwi kulumwesi lwakwe. 28 Mpawo malembe akazuzikizigwa aamba kuti, "Uyoobalwa aamwi a basizibi."*

29 Aabo bakali kwiinda awo mpaakagankamidwe bakali kumutukila. Bakali kutikiniya mitwe yabo kabaamba kuti, "Iwe, nuyoomwaya ŋanda yaLeza akwiiyaka mumazuba aatatu, 30 seluka kuzwa achiingano ulifutule!"

31 Abalabo bamwi bapayizi bapati abalembi bakamuwela kabaambilana kuti, "Wakali kufutula bamwi pesi wakachilwa kulifutula! 32 Mumuleke Kkirisitu ooyu, Mwami waIzirayeli, aseluke lino kuzwa achiingano, kuti tubone, alimwi tusyome."

Abalabo mbaakagankaminwa aabo, bakamutukila.

33 Kuchiindi chakalanga bweeseme kwakaba mudima mupati munyika yoonse kuyoosika nilyakakunama. 34 Mpawo kuchiindi eecho Jesu wakoompolola ajwi pati wati, "Eloyi, Eloyi, lama sabbakkitani?" nkukuti, "Leza wangu, Leza wangu, wandisiyilaanzi?"*

35 Eelyo kuli bamwi bakaliimvwi afwiifwi nibakamvwa boobo, bakaamba kuti, "Amuswiilile, ulikwiita Elayija." 36 Umwi mwaalumi wakachijaana, waakunika nsinsa muwayini waangilila akasamu kalamfu, mpawo wapa Jesu kuti anywe. Wakati, "Lino amumusiye aliikke tubone na Elayija ulasika kuzoomuselusya."

37 Alimwi Jesu wakoompolola ajwi pati, mpawo wafwa.

38 Mpawo aawo mudabba wakusitikizya akuganuna muŋanda yaLeza wakadeluka kuzwa kujulu kuyoosika aansi. 39 Eelyo silutwe wamwaanda wabasilumamba, wakaliimvwi kunembo lyaJesu, wakamvwa koompolola kwakwe akubona mbwaakafwa, wakaamba kuti, "Choonzyo ooyu mwaalumi waliMwana waLeza!"

40 Bamwi banakazi bakali kulangilizya kabali kulekule. Akati kabo kwakali Meri wakuMagadala, Salome aMeri banyina aJakkobbu muniini aJozefu. 41 Muchiindi eecho Jesu naakali muGalili banakazi aaba bakamutobela akumukutawukila. Abamwi banakazi bayiingi bakatansya aawe kuJerusalema bakaliwo.

42 Bwakali buzuba bwakulibambila, (nkukuti, buzuba butegwa Sabata kabutanaatalika). Nikwakaba goko, 43 Jozefu waku Arimatiya, umwi wabasilutwe Basinkuta Mpati wakala ampuwo, wakali kulindila bwami bwaLeza, wakalipeda kwiinka kuli Payileti kuyookumbila mutunta waJesu. 44 Payileti wakagamba kumvwa kuti Jesu wakali wafwa kale. Wakayita silutwe wamwaanda wabasilumamba, wakabuzya kuti Jesu wafwa kale naa. 45 Naakamvwa kuli silutwe wamwaanda kuti mbukubede, wakazumizya Jozefu kuti akabweze mutunta. 46 Lino Jozefu wakawula mudabba uuntetema, mpawo wakuuselusya mutunta, wawuputila mulinguwo, akuubikka muchibunda chakasyidwe mubbwe pati. Mpawo bakakunkulisya bbwe bajala mulyango wa achibunda. 47 Meri wakuMagadala aMeri banyina aJozefu bakabona mpaakalazikwa.