1 Lino kwakali kwachaala mazuba abili kuti kuchitwe Pobwe lyaKwiindilila aPobwe lyaChinkwa chitakwe Bumena. Aboobo bapayizi bapati abayiisyi bamulawu bakali kuyanduula nzila yakwaanga Jesu mukavwindi akumujeya. 2 Pesi bakati, "Kutabi muchiindi chaPobwe nkaambo bantu ngabalanyongana."

3 Jesu naakachili muBbetani muŋanda yamwaalumi uzibikene kuti Sayimoni wakali achipele kakkede aansi kayeeme atebuli, kwakasika mwanakazi kajisi kankuli kamafuta amuulo udula anunkilila akachitidwe amuunde. Wakapwasula kankuli kamafuta akwaatila amutwe waJesu.

4 Bamwi babo bakaliwo aawo bakaambilana chamoyo uuchisa kuti, "Mafuta aaya anyonywedwaanzi? 5 Mafuta aaya aleelede kuuzigwa amuulo wiinda mpindu yamubelesi njeleede kujana mumunyaka woonse mpawo mali ipegwe bachete." Bakakalalila mwanakazi ooyu chaluuni.

6 Jesu wakaamba kuti, "Ngamumuleke, mukatazizyaanzi? Wandichitila chintu chibotu. 7 Bachete munooli aabo alimwi muyobagwasya kuchiindi nimuyanda. Pesi tamukwe kuyooba andime pe chiindi choonse. 8 Wachita nzyaakonzya; watila mafuta amubili wangu kubambila kuzikkwa kwangu. 9 Ndamwaambila kasimpe kuti eezi nzyaachita mwanakazi ooyu uyooyibalukilwa nzizyo munyika yoonse kufumbwa makani mabotu nkwaayo kambawukwa."

10 Eelyo Judasi Isikkariyoti umwi wabasikwiiya balikkumi ababili, wakayinka kubapayizi bapati uyoowaba Jesu kuli mbabo. 11 Bakakondwa nibakamvwa eechi, bakamusyomezya kumupa mali. Kuzwa aawo wakalanguula mweenya wakumuumwaba.

12 Lino bwakali buzuba butaanzi bwaPobwe lyaChinkwa chitakwe Bumena, mbuli chiyanza chabo, aawo nibakali kupayila kabelele kaPobwe lyaKwiindilila. Basikwiiya bakwe Jesu bakamubuzya bati, "Nkukuuli nkuyanda kuti twiinke tukabambe Pobwe lyaKwiindilila ukalye?"

13 Eelyo Jesu wakatuma bamwi babasikwiiya bakwe babili, wabaambila kuti, "Ngamwiinke mugunzi alimwi muyooswanana amwaalumi unyampwide nongo yameenda, mukamutobele. 14 Nayoonjila muŋanda mukaambe kuli muna aŋanda kuti, ‘Muyiisi ubuzya kuti, muumuli muŋanda yabweenzu bwangu mundikonzya kuyoolida Pobwe lyaKwiindilila abasikwiiya bangu? 15 Alimwi uyoomutondeezya muŋanda yamujulu mpati ibambikene kale, mukatubambile mumo."

16 Basikwiiya bakazwa, bakayinka muchisi bakakujana zintu mbuli mbubonya mbuli Jesu mbwaakabaambila. Eelyo bakabamba Pobwe lyaKwiindilila.

17 Lino nilyakaba goko, Jesu wakasika abasikwiiya bakwe balikkumi ababili. 18 Alimwi kabachiyeeme atebuli kabaliikulya, Jesu wakaamba kuti, "Ndamwaambila kasimpe, umwi wanu uyoondaaba, ooyo ngundilya aamwi anguwe."

19 Eelyo bakawusa akwaamba uumwi awumwi kulinguwe kuti, "Kasimpe teendime naa?"

20 Jesu wakabavwiila wati, "Nguumwi wanu inywe nimulikkumi ababili, usunsa aamwi andime mundido. 21 Mwana waMuntu uyooyinka mbubonya mbuuli mbukulembedwe atala anguwe. Pesi maawee kuli ooyo waaba Mwana waMuntu! Chakali kuba mbubo naatakazyalwa pe!"

22 Alimwi Jesu abasikwiiya bakwe nibakali kulya, Jesu wakabweza chinkwa, walumba akuchikwamuna mpawo wakapa basikwiiya bakwe, wakati, "Ooyu ngumubili wangu, amuulye."

23 Eelyo wakabweza kanywido, walumba akubapa, alimwi boonse bakanywa kuli nkako.

24 Wakati kulimbabo, "Oobu mbuubulowa bwangu bwachizuminano, oobo butililwa bayiingi. 25 Ndamwaambila kasimpe, tandikwe kuyoonywa lubo kumcheelo wamasansa kuyoosika mubuzuba oobo mbundiyoonywa wayini mupya Mubwami bwaLeza."

26 Eelyo bakayimba lwiimbo, akuzwa bayinka kuChilundu chamaOlivu.

27 Jesu wakabaambila kuti, "Moonse muyoondichija, nkaambo kulilembedwe kuti, ‘Ndiyoowuma mweembeli, alimwi mbelele ziyoomwayika.’* 28 Pesi nindakubuka, ndiyooyinka kunembo lyanu kuGalili."

29 Pita wakati, "Nikuba kuti bamwi boonse bakuchija, ime tandiyookuchija pe."

30 Jesu wakavwiila kati, "Ndakwaambila kasimpe, iiyi sunu, mansiku mukuku kutakunalila tubili iwe lwako Pita uyoonditama tutatu."

31 Pesi Pita wakasungwaala kwaamba kuti, "Nikuba kandeelede kufwa aamwi anduwe, tandikwe kuyookutama pe."

Alimwi boonse bakaamba mbubonya.

32 Eelyo Jesu abasikwiiya bakwe bakayinka kuchilili chakalikutegwa Getisemani, alimwi Jesu wakati kuli basikwiiya bakwe, "Ngamukkale ano, ndichiya kuyookomba." 33 Wakabweza Pita, Jakkobbu aJoni weenda aabo, alimwi wakatalika kulemenwa mumoyo akuusa. 34 Wakaamba kuti kulimbabo, "Muuya wangu walemenwa, ndawusila kufwa. Mukkale aawa akulindila."

35 Nakeenda kasinzo, wakavundama aansi akukomba kuti naa kachikonzeka, eechi chiindi chimwiinde. 36 Alimwi wakati, "Abba, Taata zyoonse zintu zilakonzeka kulinduwe. Gwisya kanywido aaka kuzwa kulindime. Nikuba boobo kutabi kuyanda kwangu, pesi akube kuyanda kwako."

37 Eelyo wakabweeda kuli basikwiiya bakwe alimwi wakabajana balokoona. "Mpawo wakaamba kuti kuli Pita, "Sayimoni, ulikoona na? Wakachilwa na kulindila kwahola limwi biyo? 38 Alimwi wakati kulimbabo, "Amulindile akukomba kuti mutawidi mumisunko. Muuya ulayanda pesi mubili tuukwe nguzu."

39 Alimwi wakayinka waakukomba, wakwiiindulula majwi ngaakakombede kale. 40 Naakaboola kuli mbabo, wakajana baliikoona lubo, nkaambo zyakabazunda ŋonzi. Bakiibula nsandulo yakumupa.

41 Naakabweeda kachitatu, wakabaambila kuti, "Sena muchilede akulyookezya? Kwazulila! Chiindi chasika. Amulange, Mwana waMuntu waabwa mumaanza abasizibi. 42 Amubuke! Tweende! Sikundaaba waba afwiifwi!"

43 Aawo Jesu naakachili kwaambuula, Judasi, umwi wabalikkumi ababili, wakaliboniya. Wakali abantu bayingi bakali amapanga amakoli, bakatumidwe abapayizi bapati, abayiisyi bamulawu abaalu babantu. 44 Lino sikumwaaba wakalibambide kale chitondeezyo ambabo chakuti, "Ooyo mwaalumi ngundiyoojuzya ngunguwe; mumwaange akumutola chakumulinda."

45 Naakayinka kuli Jesu, Judasi wakaamba kuti, "Muyiisi!" mpawawo wakamujuzya. 46 Mpawawo bantu bakajata Jesu akumwaanga. 47 Mpawo umwi wabaabo bakaliimvwi afwiifwi wakasomona panga lyakwe, wakkwapula kutwi kwamulanda wamupayizi mupati. 48 Jesu wakati kulimbabo, "Sena ndilimupapi, nimuza amapanga amakoli kuzoondijata? 49 Mazuba woonse ndakali andinywe kandiliyiisya muŋanda yaLeza, tamukwe nimwakandanga pe. Pesi Malembe ayelede kuzuzikizigwa."

50 Alimwi basikwiiya bakwe boonse bakamusiya mpawo bakachija.

51 Mwaaluumi mukubusi wakalisamide chisamo chinteetema luzutu alakwe wakali kutobela Jesu. Nibakamujata, 52 wakachija kalichintanda, wakasiya mudabba.

53 Eelyo Jesu bamukatola kumupayizi mupati, akuba abapati babapayizi boonse, baalu abayiisyi bamulawu bakabungana aamwi. 54 Pita wakamutobela kali kule, kuyoosika kulubuwa lwaŋanda yamupayizi mupati. Nkukonya wakakkala abalindizi alimwi wakayota mulilo. 55 Lino bapayizi bapati ankamu yoonse yaBasinkuta mpati iitegwa Sanihedilini bakalikuyanduula bukamboni atala aJesu kuti bamujaye, pesi taakwe nibakabujana pe. 56 Bayingi bakapa bukamboni bwakubeja atala anguwe, pesi twaambo twabo tetwakali kweendelana pe.

57 Eelyo bamwi bakayimikila bapa bukamboni bwakubeja atala anguwe bakati, 58 "Twakamumvwa kaamba kuti, ‘Ndiyoomweya ŋanda yaLeza eeyi yakachitwa amaboko abantu, mpawo mumazuba aatatu ndiyooyaka iimbi, itayakwi amaboko abantu pe.’ " 59 Pesi bukamboni bwabo teebwakeendelana pe.

60 Mpawo mupayizi mupati wakayimikila kunembo lyabo akubuzya Jesu, "Sena tukwe nsandulo? Oobu bukamboni mbwanzi, aaba bantu mbubaliikupa atala anduwe?"

61 Pesi Jesu wakawumuna alimwi tapede nsandulo pe. Mupayizi Mupati wakamubuzya lubo, "Sena nduwe Kkirisitu, Mwana waLeza Ulongezezegwe?"

62 Jesu wakati, "Ndime, alimwi uyoobona Mwana waMuntu kakkede kuluboko lwalulyo lwaSinguzu akuboola mumayoba amujulu."

63 Mupayizi Mupati wakadeluula zisamo zyakwe mpawo wati, "Nkaamboonzi nituchiyanda bakamboni bambi? 64 Mwamumvwa mbwasampawula. Mutyeni?"

Boonse bakamupa mulandu weelede lufu. 65 Eelyo bamwi bakatalika kumuswida mate; bamuvumba kubusyu, bamuuma antuku zyabo, akwaamba kuti "Aamba!" Mpawo balindizi bakamubweza bakamumata mabayi.

66 Pita naakachili mulubuwa lwaŋanda yamupayizi, umwi musimbi, mulanda waMupayizi Mupati wakasika. 67 Naakabona Pita kayota mulilo, wakamuzilikila wakati, "Ayebo mwakali aamwi ayooyu Jesu muna Nazareti."

68 Pesi wakaka. Wati, "Taakwe nchindizi pe nikuba kumvwisisisya atala anchulookwaamba," mpawo wakazwa weenda waya kumulyango walubuwa.

69 Aawo mulanda musimbi naakamubona, wakaamba lubo kulibaabo boonse bakali muzyungulukide, "Alakwe ooyu muntu nguumwi wabo." 70 Pesi wakakaka lubo.

Nikwakayinda kayindi kaniini, aabo bakaliimvwi afwiifwi bakaamba kuti kuli Pita, "Kasimpe uli uumwi wabo, nkaambo uli muna Galili."

71 Eelyo Pita wakati, "Pesi ndikonka kuti ndaamba kasimpe! Leza andipe chisubulo kuti kandili ndime! Tandimwizi pe ooyo mwaalumi ngumwaambuula atala anguwe!"

72 Mpawawo mukuku wakalila kachibili. Eelyo Pita wakayeeya majwi Jesu wakakokolika wamwaambila: "Mukombwe katanaakukokolika tubili uyoonditama tutatu." Alimwi wakawusa akulila.