9 Eelyo Jesu naakabuka chifumo mumazuba butaanzi bwamviki, wakatanguna kulitondeezya lutaanzi kuli Meri wakuMagadala, uulya wakali amyuuya mibi iili musanu ayibili eeyo njaakaanda. 10 Meri wakayinka akuyoowambila bakali aaJesu, aabo bakali koomoka akulila. 11 Eelyo nibakamvwa kuti Jesu muumi, alimwi kuti Meri wamubona, teebazisyoma pe.
Jesu Uliboniya Kuli Basikwiiya Babili
(Lukku 24:13-35)
12 Kuzwa aawo Jesu wakalitondeezya muchiimo chimbi kuli bamwi babasikwiiya babili nibakali kuya kumuunzi. 13 Aaba babili bakabweeda alimwi bakwaambila bamwi; pesi tabakwe nibakabasyoma pe.
Jesu Uliboniya Kuli BaliKkumi Awumwi
(Mateyu 28:16-20; Lukku 24:36-49; Joni 20:19-23; Inchito 1:6-8)
14 Musule lyaaya Jesu wakaliboniya kuli balikkumi awumwi nibakali kulya, wakabakalalila nkaambo kakubula lusyomo abusichinguni bwabo bwakukaka kusyoma aabo bakamubona kuzwa kuchiindi naakabuka. 15 Wakaamba kuti kulimbabo, "Kamuya munyika yoonse alimwi mukakambawuke makani mabotu kuzilengwa zyoonse. 16 Kufumbwa uusyoma alimwi wabbapatizigwa uyoofutulwa, pesi kufumbwa uutasyomi uyoobasimulandu. 17 Alimwi zitondeezyo eezi ziyoobatobela boonse basyoma, alimwi muzina lyangu bayoowanda myuuya mibi; bayoowambuula myaambo mipya; 18 bayoobweza inzoka amaboko aabo; alimwi nibayoonywa zijeya, tazikwe kuyoobachisa pe; bayoobika maboko aabo abachiswa, eelyo bachiswa bayoopona."
Jesu Utolwa Kujulu
(Lukku 24:50-53; Inchito 1:9-11)
19 Mwami Jesu naakamana kubaambila, wakatolwa kujulu mpawo wakakukkala kuluboko lwalulyo lwaLeza. 20 Eelyo basikwiiya bakazwa baya kuyookambawuka koonsekoonse, eelyo Mwami wakabeleka ambabo mukusinizya ijwi lyakwe azitondeezyo zyakalikubatobela.