Atos 16

Paulu o Sailasi Basowelwa Muntolongo

16 Bumwi buzuba katuyoobuya kucibaka cokukombela twakaswanwa o musimbi muzike wakanjilidwe muuya mubi walikumupa kusonda. Walikujanina basimalelaakwe mali manji kwiindila mukusonda kwakwe. 17 Walikuyoobucilizya Paulu aswibo kayooboongolola kuteeti, "Aaba baalumi mbazike ba Leza Sijulu lya Majulu, baambilizya mbomunga mwafutuka." 18 Walikucita namu kwama zuba manji. Kono Paulu wakasesemwa okucebukila musule okwaambila muuya mubi kuteeti, "Muzina lya Jesu Kilisitu zwa mulinguwe!" Muuya wakazwa mulinguwe mpoonya-mpoonya. 19 Basimalelaakwe nibakabona kuteeti musimbi ooyu tacinoobajanini mali, bakajata Paulu o Sailasi okubakwelela kubeendelezi benkuta ankanzo ye taindi. 20 Nibakabeeta kubeendelezi benkuta ye taindi pati bakateeti, "Aaba baalumi Majuda, balimukuyunga taindi lyesu. 21 Balimukwiisya zizo ziteendelani e milawo yesu, swebo to Maloma tatukonzya kuzitambula naanga kuzicita." 22 Kuzwaawo dwi lya bantu lyakabukila Paulu o Sailasi.

Mpoonyina beendelezi benkuta bakayawoola zizwato zya Paulu o Sailasi okulailila kuteeti babakwabboole. 23 Nibakamana kubakwabboola loko bakabasowela muntolongo, mpoonyina bakalailila mulindizi we ntolongo kuteeti abamamele bataloboki. 24 Naakamana kumvwa malailile aaya, mulindizi wentolongo wakanjizya Paulu o Sailasi mukati mweni yentolongo okubika maulu aabo muzitolokisi*16:24 Zitolokisi alimatanda mapati ape malemu obile aajesi zibbanga mokubikila miindi yomwaange. Matanda aaya obile alimangidwe antoomwi kuzinguluka miindi yomwaange. Mwaange talikukonzya kukweela zituta zyakwe anze ezitolokisi kaambo zibbanga zyateni zyali ziniini loko..

25 Akati kamasiku Paulu o Sailasi bali kukomba okwiimba nyimbo zyokulumbaizya Leza, baange mbibali ambabo kabaswiilizya. 26 Mpoonyinaawo nyika yakazungaana loko mane entalisyo ye ntolongo yakazungaana. Mpoonya-mpoonya milyango ye ntolongo yakajuka e nsimbi zibaangidwe baange boonse zyakaloka. 27 Mulindizi we ntolongo naakabuka okubona milyango ye ntolongo kijukide wakayeeya kuteeti baange bakazwa okucija. Mpoonyina wakasomona sabule munkomo yateni kuteegwa alijaye. 28 Kono Paulu wakazoongolola ejwi pati kateeti, "Utalijayi! Potuli toonse!"

29 Mulindizi we ntolongo wakakumbila lampi okuzuzila mwateni okuyoolifusila afwiifwi amaulu a Paulu o Sailasi katuntuma. 30 Mpoonyina wakabatola anze okubuzya kuteeti, "Nobasimalelaangu! Ino ndeelede kucita nzi kuteegwa ndifutulwe?"

31 Bakamutaba kuteeti, "Syoma mu Mwami Jesu, mpoonyina ulafutulwa yebo abengʼanda yako." 32 Mpoonyina bakamukambookela jwi lyo Mwami antoomwi aabo boonse balikukala mungʼanda yakwe. 33 Aliilya nako njoonya yamasiku, mulindizi we ntolongo wakababweza okubasanzya zilonda zyabo mpoonya-mpoonya we antoomwi abengʼanda yakwe bakabbabbatizigwa. 34 Mpoonyina wakabweza Paulu o Sailasi kungʼanda yakwe okuyoobapa cokulya. We antoomwi abomukwasyi wakwe bakabotelwa kaambo iino bakasyoma muli Leza.

35 Nibwakaca beendelezi benkuta bakatuma mapokola amajwi okuteeti, "Amubalukulule aabo baalumi bainke."

36 Mpoonyina mulindizi we ntolongo wakaambila Paulu kuteeti, "Beendelezi benkuta batumizya majwi okuteeti yebo o Sailasi mulukululwe. Iino inga mwazwa okwiinka muluumuno."

37 Kono Paulu wakateeti kumapokola, "Taakwe nitwakajanwa o mulandu kono bakatukwabboola antangalala okutusowela muntolongo nekuba kuteeti tuli bana Loma*16:37 Mulawo we Ciloma walikupa cisubulo cipati loko kumwaatuzi uuma muna Loma kaatazekisidwe. Aaba baatuzi balikugwisigwa musebezi wobwaatuzi cokusampoolwa antangalala, cimwi ciindi okujaigwa.. Iino bayanda kutulukulula cokusisilikizya. Nee! Abaze mbabo beendelezi benkuta, bazootulukulule."

38 Mapokola bakaambila beendelezi benkuta makani aaya. Iino nibakamvwa kuteeti Paulu o Sailasi bali bana Loma bakalikalelwa. 39 Mpoonyina bakeza okulilekelela kuli Paulu o Sailasi. Kuzwaawo bakabagwisya muntolongo okubakumbila kuteeti bazwe mu taindi. 40 Mpoonyina Paulu o Sailasi bakazwa muntolongo okwiinka kungʼanda ya Lidiya. Okuya bakakuswaanana abasyomi okubaambila majwi okubakulwaizya. Bamane bakainka.