Atos 2

Pita Wakambooka Apentekositi

14 Mpoonyina Pita antoomwi abaapositola bali kumi aomwi bakanyamuka. Amane Pita wakatalika kwaamboola kubbunga ataleejwi lyakwe kateeti, "No Majuda ma, andinywe noonse nomukala mu Jelusalemu, amundiswiilizye ndimupandulwide cecaambeeci. 15 Aaba bantu tabakoledwe mbuli mbomuyeeya. Ino inga bakolwa buti kucili kuseni? Iino ninako yewoola lyefuka. 16 Kono eeci cemubwene cecico cakaambwa omusinsimi Joweli,

17 ✝ 2:17 Joeli 2:28-32. Leza wakateeti, ‘Kumazuba aamamanino,

ndiyootila Muuya wangu kubantu boonse.

Mpoonyina bana benu basyimani abasimbi bayoosinsima.

Bakubusyi bayoobona zilengaano,

abo madaala bayoolota ziloto.

18 Mumazuba aayo, ndiyootila Muuya wangu okubabelesi bangu boonse baalumi abanakazi, mpoonyina bayoosinsima.

19 Ndiyoocita zikomosya kujulu ezitondezyo zyamaleele aano ansi.

Kunooli gazi, mulilo a mayoba oobusi.

20 Izuba liyoosiya,

awo mweezi uyoosalala mbuli gazi.

Ziyoocitika buzuba bo Mwami bupati ape bobulemu kabutanaza.

21 Mpoonyina kufumbwa wiita Mwami kuteegwa amugwasye uyoofutulwa.’"

22 Mpoonyina Pita wakazumanana kateeti, "Nobana Izilaili amuswiilizye majwaaya! Jesu woku Nazaleta, wali mwaalumi Leza ngwaakatuma kulindinywe. Eeci Leza wakacitondezya mumisebezi mipati, maleele ape ezitondezyo zyaakacita kwiindila muli Jesu. Nywebo lwenu mulizizi eezi kaambo zyakacitikila akati kenu. 23 ✝2:23 Mateyo 27:35; Maako 15:24; Luka 23:33; Joni 19:18.Ooyu Jesu wakaabwa kono Leza walizi kuteeti eeci ciyoocitika kaambo walizikanzide kale ciindi. Mwakamujaya kwiindila mukuzumizya baalumi basizibi kuteeti bamukankamine aciingano. 24 ✝2:24 Mateyo 28:5-6; Maako 16:6; Luka 24:5.Kono Leza wakamubusya kuzwa kulufu, wakamulukulula kuzwa mukucisa kolufu kaambo taakwe nicalikukonzeka kuteeti abe mwaange wolufu. 25 ✝2:25 Intembauzyo 16:8-11.Tulicizi eeci kuteeti cenconzyo kaambo Deveti wakaamba fateni aalinguwe kateeti,

‘Ndakabona Mwami kali kunembo lyangu nako yoonse.

Kaambo kokuteeti ulaafwiifwi amebo tandiyoopenzegwi.

26 Kaambo keeci moyo wangu uliboteledwe,

amajwaangu ngokusekelela.

Nekuteegwa mubube bwangu ndilimuntu feela,

kono ndinookede okulangila,

27 kaambo toyoondilekelezyi munyika yabafu.

Ape toyoocizumizyi kuteeti Uusalala wako akabole mucuumbwe.

28 Wanditondezya nzila zitola kubuumi,

ape uyoondibotezya loko nako njonoolaandime.’"

29 Pita wakazwidaanembo okuteeti, "Nobazyalwama, ndiyanda kuteeti mumvwisisisye! Deveti sikale wesu taakwe naalikulyaamba lwakwe naakaamba aaya majwi ngindaamba, kaambo wakafwa okuzikwa, ecuumbwe cakwe kocili akati kesu kusikila sunu. 30 ✝2:30 Intembauzyo 132:11; 2 Samuele 7:12-13.Kono wali musinsimi, ape walizi kuteegwa Leza wakasyomezya okukonka kuteeti umwi wolunyungu lwa Deveti uyookala acibbula cobwami bwa Deveti. 31 Deveti wakazibona zintu Leza zyaalikuyanda kucita kunembo, mpoonyina wakaamba kujatikizya kubuka kwa Mesiya kuteeti,

‘Taakwe naakalekelezegwa munyika yabafu,

naanga mubili wakwe kubola.’

32 Leza wakabusya ooyu Jesu kuzwa kubafu ape toonse tulibakamboni beeci. 33 Mpoonyina Leza wakamusumpula ejanza lyakwe lyolulyo.*2:33 Busanduluzi bunji bwaamba kuteeti, "kujanza lyolulyo lwa Leza". Kono twakasala busanduluzi bwaamba kuteeti "Ejanza lya Leza lyolulyo" kaambo Mucizuminano Ceciindi cilaambidwe ziindi zinji. Ape aaka kancali mu Cigiliki taakwe pokaamba kuteeti "kujanza lyolulyo" mu Cizuminano Cipya. Mpoonyina Leza Isi wakamupa Muuya Uusalala mbuli mbwaakasyomezya. Iino Jesu watila ooyu Muuya Uusalala alindiswe mbuli mbomubona okumvwa. 34 ✝2:34 Intembauzyo 110:1.Ede Deveti taakwe naakainka kujulu, kono we lwakwe wakateeti,

‘Mwami wakaambila Mwami wangu kuteeti

kala kubbazu lyolulyo lwangu lyobulemu 35 kusikila mane ndibike basinkondonyoko kunsi ezituta zyako*2:35 Citondezya kuteeti Leza uzoozunda basikondonyina bo Mwami wa Deveti mpoonyina banoendelezegwa ooyo muntu..’"

36 Mpoonyina mukumanizya Pita wakateeti, "Iino kaambo keeci, nobana Izilaili noonse muzibe nconzyo kuteeti ooyu Jesu ngubakakankamina aciingano ngonguwe Leza ngwaakabika kuteeti abe Mwami ape ngo Mesiya!"

37 Iino bantu nibakamvwa namu, bakayaswa mumyoyo yabo, mpoonyina bakabuzya Pita abamwi maapositolanyina kuteeti, "Nobazyalwama, ino tucite buti?"

38 Pita wakateeti, "Umwi oumwi eempwe kuzibi zyakwe okubbabbatizigwa muzina lya Jesu Mesiya kuteeti zibi zyeenu zijatilwe. Kuzwaawo mulatambula Muuya Uusalala, cipego cizwa kuli Leza. 39 Amucite namu kaambo eeci cisyomezyo cicenu abana benu, aabo balikule boonse. Nconzyo cisyomezyo ca boonse mbaita kulinguwe Mwami Leza wesu."

40 Mpoonyina Pita wakazwidaanembo kukambooka okukombelezya bantu kateeti, "Amulifutule lwenu kuzwa kucisubulo ciza alaaba bantu basimucitazibi!" 41 Mpoonyina aabo bakasyoma zyakaamba Pita bakabbabbatizigwa. Mubuzuba oobo bakayungizigwa kumbungano batikasike zyuulu zyotatwe.