Marcos 11

Jesu Watambulwa mu Jelusalemu Cobulemu

1 Jesu abasikwiiya bakwe nibakaswena afwiifwi o Jelusalemu, kumbali omuunzi wa Betifage owa Bbetaniya a Cilundu ca Oliva*11:1 Ooyu musyobo wecisamu cizyala mucelo wa oliva. Mucelo wa oliva muniini ulimbuli ntumbulwa uleenseke ziyumu. Mucelo wa oliva walimucelo walikuyandika loko mumazuba eciindi. Walikusinwa okupanga mafuta ookujisya ookubelesya mubukombi busiyene-siyene. Mafuta ateni alikubeleka muma lampi omumisamu yokusilisya ape okubotya mubili. , Jesu wakatuma bobile ali basikwiiya bakwe 2 kuteeti, "Kamuya kumuunzi ulaanembo. Muciyoosika feela, muyoojana mbongolo yaangidwe acisamu itana beleka. Mukayaangunune mpoonyina muyeete kuno. 3 Na umwi amubuzye kuteeti, ‘Ino niinzi nemucita namu?’ Mumwaambile kuteeti, ‘Mwami ulaiyanda. Kono ulaipilusya inawa.’"

4 Mpoonyina bakainka okuyoojana mbongolo munzila kayaangilidwe kumanjililo engʼanda. Nibali kuyaangununa, 5 bamwi balikwiimvwi aawo bakababuzya kuteeti, "Ino mucita nzi? Ino muyaangunwida nzi mbongolo?"

6 Bakabataba mboonyina mbwaakabaambilide Jesu. Mpoonyina aabo bantu bakabazumizya kuteeti baitole. 7 Bakayeeta kuli Jesu, okuyala zizwaato zyabo amunsana wayo, mpoonyina wakatanta fateni. 8 Bantu banji balikuyoobuyala zizwaato zyabo munzila bamwi kabatyola ntabi zyamalala mumyuunda okuziyala munzila. 9 ✝11:9 Intembauzyo 118:25-26.Bantu bali kunembo lyakwe abali kuyoobumucilila musule, bakatalika koongoolola kuteeti, "Hosana!*11:9 Hosana ndibbala lyomuci Hibbulu lyaamba kuteeti, "Tufutule" Libelesegwa banoongolola kulumbaizya Leza. Ulilelekedwe ooyo uza muzina lyo Mwami! 10 Bulilelekedwe Bwami buza bwa tata Deveti, sikale wesu. Hosana kuli uuli kujulu lyamajulu!"

11 Jesu wakanjila mu Jelusalemu okwiinka mulabba lye ngʼanda ya Leza, wakalanga-langa zintu zyoonse. Mukuteeti nako yaliinkide, wakainka ku Bbetaniya abasikwiiya bakwe bali kumi abobile.