3 Gɛtɛ gɩsaa gi ton Eliya okoro, ɛ tɔ e serenti, èè to wɔ nkpa. Gɛtɛ ɛ ma gyu Beeseba, gɛtɛ wʋ̀ sa Yuda anɩ fɔ, e kere wɔsaranyan ɛ ya dʋkɔ. 4 Mɔ ɛwɔ gbagba bɩrɛ ɛ san duwi-kɩlɩn diisele ɛ san otonkuma waanɩ. Ɛ ma sara oyon gɛtɛ bee kpèlè alɛ ɔfɩya wuuyon fɔ wʋʋ gatɩn gɛ ee tiri onyun diku daà bɛ ka wɔ. Ɛ dɔ̀ alan, <<Wʋ kʋtɩ gɛlɛ! Oo, Yahwe, nkele to mɩɩn nkpa, mɩɩn kɔlɔ da miintu ɛbɛ.>> 5 Ɛwʋ gɛ ɛ waran ɛ dʋrɔ oyon fɔ wʋʋ gatɩn gɛ ɛ fwa bʋda.
Disere-kɩlɩn fɔ, Wurubwarɛ wɔsalɛ ɛ kya wɔ, gɛ ɛ dɔ̀ wɔ alan, <<Tɔ sara àà di!>> 6 Ɛ nya fɔ, e we boroboro ma ɔtan, ma butu gubun gɛtɛ ɩ̀ dɔ wayu yaanɩ. E di, gɛ ɛ nyʋn, gɛ e biri ɛ waran ɛ dʋrɔ.
7 Yahwe wɔsalɛ fɔ e biri ɛ ba dɩnyɔɔfɛ, gɛ ɛ kya wɔ ɛ dɔ̀ alan, <<Tɔ sara fɔ àà di, yema osele wʋ̀ sangba wʋ̀ dɔ tɛ wɔ.>> 8 Okoro ɛ tɔ ɛ sara, gɛ e di, gɛ ɛ nyʋn. Anyan-dilɛ fɔ ɩ tɛ wɔ ɔkɛma gɛ ɛ san osele fɔ awi akpilin anyɔɔ, odon ma ofilibon gɛlɛɛ ma gyu Horebi, Wurubwarɛ wodon fɔ wuu koro.
9 Dʋkɔ gɛ ɛ dʋrɔ dɩtaa-fwe dɩkɩ daanɩ e kpa kere.
Yahwe e tiri koro e wùlà Eliya
Ɛwʋ gɛ Yahwe ɛ tabʋrʋ ma ɛwɔ e lila wɔ alan, <<Eliya, anʋn gɛ aa mɛ nfan?>>
10 Gɛ Eliya e tiri wuunyun alan, <<Na kpà na tɛ Yahwe, Wurubwarɛ-Kpatakpɩrɩ. Mɔ Isareli bete be furu dikola gɛtɛ a tà ma ɛbɛ fɔ gɛ be gbena aa gedi gɩɩ gaatɛ̀kʋn fɔ. Be wolo aa bɛtabʋrʋlɛ fɔ powu, miinko na kuruma, gɛ nkele bee bugiti bàà wolo nmɩ mɔ.>>
15 Ɛwʋ gɛ Yahwe ɛ dɔ̀ wɔ alan,<<Biri aa gama, ka osele gɛtɛ a ka a ba fɔ, fɔ àà san Damasiko wotonkuma waanɩ. Gengyi à gyu dʋkɔ fɔ, sʋrʋ Hasayeli bʋnɔ, fɔ èè di bugyu ɛ tɛ Aram bete. 16 Sʋrʋ Nimisi wobi Yehu mɔ bʋnɔ, fɔ èè di bugyu Isareli gɩfɩɩ gaanɩ. Fɔ àà sʋrʋ Safati wobi gɛtɛ e ye Abeli-Mehola fɔ bʋnɔ, fɔ ɛ̀ɛ̀ mɛ mɩɩntabʋrʋlɛ e sere aa gɩsɩrɩ. 18 Mɔ nan kere bɛnɩ ɩgbaa isiyee ma nkpɩn ton (7,000) n ya Isareli gɩfɩɩ gaanɩ. Bɛnɩ powu gɛtɛ ben kura ekpen Baali, gɛ bɛn kyʋkyʋ wɔ fɔ.>>