1 Samuel 15

Yahwe e terema Sawulo buugyu

1 Samweli ɛ dɔ̀ Sawulo alan, <<Nmɩ gɛ Yahwe ɛ sa na sʋrʋ wɔ̀ bʋnɔ na sere bugyu na tɛ Isareli bete. Wuu koro nkele nʋn Yahwe wɔtʋn. 2 Ade gɛtɛ Yahwe-Kpatakpɩrɩ ɛ dɔ̀ fɔ n tɛ ba lɛ, <Nan tiira Amaleki bete giten, yema ade gɛtɛ bɛ mɛ Isareli fɔ yii koro. Bɛn tɛ bɛ osele ɔya gɛtɛ be ye Egyipiti bɛɛ ba fɔ. 3 Okoro san ma kpà ma Amaleki bete, fɔ àà muru bɔɔ gɩnyankɩ-kamasɛ. Kara kere gɩnyankɩ ya. Wolo beteni ma bɛnanɩ, bebi ma bɛkyʋkyʋʋ, bɛkwɔ ma bɛyɛran, akpɔŋɔ ma akpɔŋɔ-tɩtɩɩ.> >>

4 Okoro Sawulo e kpèlè beteni fɔ e tuma, gɛ ɛ kalan bɛ Telami ditele daanɩ. Bɛ̀ ba bɩtà bʋʋ bɛtàlɛ asepekyi fwo (200,000), ma bɩtà bʋʋ bɛtàlɛ ɩgbaa ton gɛtɛ be ye Yuda wofoli waanɩ (10,000). 5 Ɛwʋ gɛ Sawulo ma wɔ bɩtà bʋʋ bɛtàlɛ fɔ bɛ san bɛ ma bu gifoobi giikere gbɛma Amaleki bete boo ditele gɛtɛ bàà tà bɛ bɩtà. 6 Sawulo ɛ dɔ̀ Keni bete alan, <<Ɩ san, ɩ tɔ i ye Amaleki bete baanɩ, fɔ n kara be muru bɛ ma ɛyɩ powu, yema i tiri yɩɩ gɩnɩ-len i wùlà Isareli bete powu ɔkʋnan gɛtɛ be ye Egyipiti bɛ ba fɔ.>> Okoro Keni bete fɔ be tɔ be ye Amaleki bete fɔ baanɩ.

7 Gɛ Sawulo ɛ tà bɩtà ma Amaleki bete fɔ, ye Awila wosele ma sere Suri, gɛtɛ wʋ̀ sa Egyipiti wofila wʋʋ gɛtàkʋn fɔ. 8 Sawulo e gye Amaleki bete boogyu Agagi gʋnʋn-ŋɔrɔ gɛ e wolo wɔ bɛnɩ powu. 9 Mɔ Sawulo ma wɔ bɩtà bʋʋ bɛtàlɛ fɔ be kere Agagi ma bɛyɛran-kpara ma bɛkwɔ-kpara, ma akwɔbi gɛtɛ ɩ̀ ba ayo, ma ayɛranbi, ma gɩnyan-kamasɛ gɛtɛ gì di gɩnyan-kpara fɔ powu bɛ ya bɛ tɛ koro. Ben wolo yɩtɔkɔ. Mɔ anyan gɛtɛ ɩn ma tɔnɔ tɛ bɛ powu fɔ bɩrɛ, be muru yɩ.

10 Ɛwʋ gɛ Yahwe ɛ tabʋrʋ ma Samweli alan, 11 <<Na nu koro gɛtɛ na sɩ̀ Sawulo bugyu, yema e fi gama e ten mɩ gɛ ɛn taa di maade wùlàlɛ fɔ yii koro.>> Ade fɔ ɩ taga Samweli, gɛ e wula e kpèlè Yahwe odente wʋtɔkɔ powu.

12 Gɛtɛ kere gɩkpa gɛgyɩgyan-fuu fɔ Samweli ɛ lama ɛ tɔ ɛ san ɛ̀ɛ̀ ma tuma Sawulo. Mɔ bɛ dɔ̀ wɔ̀ alan, <<Sawulo ɛ da Kameli, ɔkʋn gɛtɛ e sere ataa ɛ ka e tiri wo koro diyere fɔ. Gɛ gɛtɛ e ye dʋkɔ fɔ, ɛ waran ɛ da Giligali ditele daanɩ.>>

13 Gɛtɛ Samweli e gyu Sawulo wakʋn fɔ, Sawulo ɛ dɔ̀ wɔ alan, <<Yahwe e hira wɔ! Yahwe wade gɛtɛ ɛ sa mɩ fɔ gɛ na mɛ.>>

14 Mɔ Samweli ɛ dɔ̀ wɔ alan, <<Gɛ anʋn yɩɩ bɛyɛran, ma bɛkwɔ boo gewula gɛ n tɛ nʋn maaten yaanɩ lɛ?

15 Sawulo e tiri wuunyun alan, <<Bɩtà bʋʋ bɛtàlɛ fɔ bɛ ka bɛ be ye Amaleki bete baakʋn. Be kere bɛyɛran-kpara, ma bɛkwɔ-kpara fɔ bɛ ya bàà ka tɛ Yahwe aa Wurubwarɛ gedi. Mɔ akurumakyɛɛ fɔ, ti muru yɩ powu.>>

16 Gɛ Samweli ɛ dɔ̀ Sawulo alan, <<Kʋn! yɛ mɩ nan dɔ̀ wɔ̀ ade gɛtɛ Yahwe ɛ dɔ̀ mɩ walan odente.>>

Gɛ Sawulo alan, <<Dɔ̀ mɩ!>>

17 Gɛ Samweli ɛ dɔ̀ wɔ alan, <<Ma gɛtɛ nafɔ aa nya aa koro alɛ an di ɛnɩ gbaa gba fɔ, nka awɔ gɛ Yahwe ɛ bɛ sɩ̀ egyu-dɩrɛ ɛ tɛ Isareli wo-ifoli fɔ? Yahwe ɛ sʋrʋ wɔ̀ bʋnɔ, gɛ ɛ sɩ̀ wɔ̀ egyu-dɩrɛ ɛ tɛ Isareli bete. 18 Gɛ Yahwe ɛ tɛ wɔ̀ gʋtʋn alan, <San ma muru Amaleki bete gɛtɛ bɛ ba duyu-kɛma fɔ, tà bɩtà ma ɛbɛ ka ma sere ɔya gɛtɛ aà kpa bɛ powu.> 19 Anʋn yii koro gɛ an bù Yahwe? Anʋn yii koro gɛ a ma kpila Amaleki bete baanyan-kpara fɔ, gɛ a mɛ ade-kpen Yahwe bʋnʋn anlɛ?>>

20 Gɛ Sawulo ɛ dɔ̀ Samweli alan, <<Na bù Yahwe, na mɛ gʋtʋn gɛtɛ ɛ sa mɩ fɔ. Na muru Amaleki fɔ powu gɛ na gye boogyu Agagi fɔ na ba. 21 Gengyi bɩtà bʋʋ bɛtàlɛ fɔ be gye Amaleki bete bɔɔ bɛyɛran, ma bɛkwɔ fɔ, bee len bàà ka tɛ gɛ Yahwe aa Wurubwarɛ gedi Giligali nfan.>>

22 Mɔ Samweli e tiri wuunyun alan,

<<Yahwe ee len gekuma gii gedi, ma gedi gɩɩ gɛtɛ̀-kurumakyɛɛ

ɛ da gɛtɛ bàà nʋn wakʋn?

Gɛnʋn Wurubwarɛ wakʋn, gɩ̀ kɔlɔ da gedi gɩɩ gɛtɛ̀,

gɛsɩ̀ giten, gɩ̀ kɔlɔ da gedi gɩɩ gɛtɛ̀.

23 Yema gɛtɔ-yela ɛkɩ wo koro, wù di ade-kpen anlɛ gɛsɔma,

gɛ giten-kɛma gì di ade-kpen anlɛ dikpen-sʋma.

Yema gɛtɛ a terema Yahwe wade,

wuu koro, ɛwɔ mɔ e terema aa bugyu.>>

24 Ɛwʋ gɛ Sawulo ɛ dɔ̀ Samweli alan, <<Na mɛ ade-kpen. Na nʋ̀n Yahwe wo-ise ma wade-wùlàlɛ fɔ yii koro. Na serenti bɛnɩ fɔ, wuu koro gɛ na nʋn baakʋn. 25 Okoro ǹ fɔ wɔ̀ gɛ, ka maade-kpen kyɛ mɩ, fɔ àà fɩya ma nmɩ taà biri, fɔ nàn ma sʋma Yahwe.>>

26 Mɔ Samweli ɛ dɔ̀ Sawulo alan, <<Mɩn nan biri n san ma awɔ, yema a terema Yahwe wanyun-gyebi, gɛ ɛwɔ mɔ e terema wɔ̀ gɛtɛ àà mɛ Isareli wogyu.>>

27 Gɛtɛ Samweli e fi èè kpe ye fɔ, Sawulo e gye Samweli gɛgba wurukyaa fɔ giinyun, gɛ gɩ fɛɛran. 28 Gɛ Samweli ɛ dɔ̀ wɔ alan, <<Anlɛ gɛtɛ a gye mɩɩn gɛgba a fɛɛran lɛ gɛlɛ ke gɛ Yahwe ɛ fɛɛran bugyu fɔ e ye aa koro ǹdò, gɛ ɛ ka bʋ ɛ tɛ ɛnɩ-fon gɛtɛ ɛ̀ kɔlɔ da wɔ̀. 29 Nyɩnla alɛ, ɛwɔ gɛtɛ è di Isareli gingyebi fɔ, ɛn ta di didebila abɛɛ èè foma wamɩnlɛ. Yema en di gɛ ɛnɩ-nyalɛ gɛtɛ èè foma waamɩnlɛ.>>

30 Gɛ Sawulo e biri ɛ dɔ̀ alan, <<Na mɛ ade-kpen, mɔ n fɔ wɔ gɛ sa mɩ gingyebi mɩɩn bɛnɩ bɔɔ bɛndɩrɛ, ma Isareli bʋnʋn. Biri ba ma nmɩ fɔ nàn sʋma Yahwe aa Wurubwarɛ fɔ.>> 31 Okoro Samweli e biri ɛ tɛrɛma Sawulo, gɛ Sawulo ɛ sʋma Yahwe.

32 Gɛ Samweli ɛ dɔ̀ alan, <<Ka Amaleki wogyu Agagi mɔma mɩ>>

Gɛ Agagi ɛ ba wakʋn ma bʋnʋn bʋʋ gɛgyagakʋn, gɛ ɛɛ sa amɩnlɛ alɛ gɩsaa gɛtɛ nafɔ gì de wɔ alɛ eè ku fɔ, gɩ da.

33 Mɔ Samweli ɛ dɔ̀ alan,

<<Anlɛ gɛtɛ a ka aadon a wolo bɛnɩ kpekpesi gɛ wʋ yɛ bɛnanɩ bɛn mɩnɩ ma bebi fɔ,

gɛlɛ ke gɛ aana mɔ, ɛn nan wura ebi.>>

Gɛ Samweli e wolo Agagi Yahwe bʋnʋn Giligali ditele.

34 Ɛwʋ gɛ Samweli e biri ɛ da Rama ditele, gɛ Sawulo ɛ bʋn ɛ da wɔlɛ Gibeya. 35 Samweli en mini we Sawulo kʋtʋma ɛ ka e ku, mɔ Sawulo wade ɩ taga Samweli gepepe. Gɛ wʋ taga Yahwe gɛtɛ ɛ mɛ Sawulo egyu-dɩrɛ Isareli bete boo koro.