1 Samweli 16

Samweli ɛ sʋrʋ Dafidi bʋnʋn

1 Yahwe ɛ dɔ̀ Samweli alan, <<Aà yɩyɛ a tɛ Sawulo ka ma sere ɔya mɔmɔ? Na terema gɛtɛ èè di bugyu Isareli. Nya, yɔla bʋnɔ aa diyela fɔ daanɩ fɔ àà kya osele. N tɛ sa wɔ̀ Betelem-te Yese wakʋn, yema na tiri wo bebi-tenibi fɔ baanɩ ɛkɩ gɛtɛ ɛ̀ɛ̀ mɛ egyu-dɩrɛ.>>

2 Mɔ Samweli ɛ dɔ̀ alan, <<Lan gɛ nan talɩ n san? Sawulo ɛɛ̀ nʋn ade fɔ, gɛ eè wolo mɩ.>>

Gɛ Yahwe ɛ dɔ̀ wɔ alan, <<Ka dɩkwɔ-tan-nanɩ fɩya, fɔ àà dɔ̀ alan, <Na ba nan bɛ tɛ Yahwe gedi.> 3 Fɩna gʋlɔ kpèlè Yese gedi gɩɩ gɛtɛ̀ fɔ gɩɩpɩ, fɔ nan wùlà wɔ̀ anlɛ gɛtɛ aà mɛ. Wù di gɛtɛ àà sʋrʋ ɛnɩ gɛtɛ nan wùlà wɔ fɔ bʋnɔ.>>

4 Samweli ɛ mɛ anlɛ gɛtɛ Yahwe ɛ dɔ̀ wɔ fɔ. Gɛtɛ ɛ ma gyu Betelem fɔ, koro gɩ gbɛrɛ ditele fɔ dɩɩ bɛndɩrɛ gɛtɛ bɛ ma tuma wɔ fɔ. Gɛ be lila wɔ alan, <<A ba ɔsɛ waanɩ?>>

5 Samweli e tiri wuunyun alan, <<Ɩɩn, Na ba ɔsɛ waanɩ, na ba nan bɛ tɛ Yahwe gedi. Ɩ kpa koro dɩdɩɩ, fɔ yàà ba tàà tɛ gedi.>> Gɛ Samweli ɛ kpa Yese ma wo bebi-tenibi dɩdɩɩ, gɛ e kpèlè bɛ ɛ ba gedi gɩɩ gɛtɛ̀kʋn fɔ gɩɩpɩ.

6 Gɛtɛ be gyu gɛ Samweli e we Eliyaba fɔ, ɛ sa amɩnlɛ alan, <<Gbagbaagba fɔ, nyawɔ gɛ Yahwe ɛɛ̀ sʋrʋ bʋnɔ.>>

7 Mɔ Yahwe ɛ dɔ̀ Samweli alan, <<Kara nya wɔmɩrɩ, abɛɛ wabo, yema na terema wɔ. Nmɩ Yahwe mɩn taa nya ade anlɛ gɛtɛ bɛnɩ nyalɛ bɛɛ nya fɔ, ɛnɩ nyalɛ ɛɛ nya gɛ koro-kpaba, mɔ Yahwe ɛɛ nya gɛ oturu waanɩ.>>

8 Ɛwʋ gɛ Yese e kpèlè Abinadabi gɛ ɛ yɛ wɔ ɛ bɛ dama Samweli bʋnʋn. Mɔ Samweli ɛ dɔ̀ alan, <<Yahwe en tiri nyawɔ mɔ ke.>> 9 Gɛ Yese ɛ yɛ Sama ɛ bɛ da, mɔ Samweli alan, <<Yahwe en tiri nyawɔ mɔ ke.>> 10 Yese ɛ yɛ wo bebi-tenibi kwarankɩ fɔ bɛ bɛ dama Samweli bʋnʋn, mɔ ɛ dɔ̀ Yese alan, <<Yahwe en tiri baanɩ ɛkɩ.>> 11 Okoro Samweli e lila Yese alan, <<Aa bebi-tenibi fɔ powu bɛ lɛ?>>

Gɛ e tiri wuunyun alan, <<Wu kuruma etiti fɔ, mɔ ɛwɔ ɛɛ nya bɛyɛran boo koro.>>

Gɛ Samweli ɛ dɔ̀ Yese alan, <<Sa ɛnɩ, ɛ̀ɛ̀ ma ka wɔ ɛ ba, yema tɩn nan waran tɩ sara, ma ye gɛtɛ èè bè gyu.>> 12 Gɛ ɛ sa ɛnɩ ɛ ma ka wɔ ɛ ba. Ɛ̀ sɩna, gɛ wo koro kpaba gɩ̀ ba ɔmɩrɩ, gɛ e ye gɩsaranyan.

Gɛ Yahwe ɛ dɔ̀ alan, <<Tɔ fɔ àà sʋrʋ wɔ bʋnɔ, yema ɛwɔlɛ.>> 13 Gɛ Samweli ɛ ka bʋnɔ ma diyela fɔ e lù wɔ̀ duyu, wɔdɩrɛ ɛbɛ bɔɔ bʋnʋn baanɩ. Gɛ boo ye duwi dɩtɔkɔ fɔ, Yahwe wo Gifiye gɩ bɛ gyu Dafidi wanɩ ɔkɛma waanɩ. Wʋʋ gama fɔ, Samweli ɛ tɔ ɛ da Rama ditele daanɩ.

Dafidi ɛ sʋma Sawulo wo digyukpaara daanɩ

14 Nkele Yahwe Gifiye gi ye Sawulo wanɩ, gɛ Yahwe ɛ yɛ gifiye-kpen gɩ bɛ nyanla wɔ.

15 Gɛ Sawulo wɔ bɛsaranyan bɛ dɔ̀ wɔ alan, <<Nya, Wurubwarɛ ɛ tɛ afiye-kpen osele gɛ ɩ bɛ ɩɩ nyanla wɔ̀. 16 Tiifonte yɛ tɩ taà ma bugiti ɛnɩ ɛkɩ gɛtɛ ɛɛ̀ tɩ tà adʋlɛ ɛ tɛ wɔ. Ɛɛ̀ tɩ tà wʋ ɔya gɛtɛ afiye-kpen fɔ ɩ̀ ba aa koro fɔ, fɔ àà koro gàà nʋ̀n wɔ̀.>>

17 Okoro Sawulo ɛ dɔ̀ wɔ bɛsaranyan fɔ alan, <<Ɩ ma bugiti ɛnɩ gɛtɛ ɛ nyɩ̀ adʋlɛ gɛtà gepepe, fɔ yàà ka wɔ ɩ mɔmɔ mɩ.>>

18 Wɔ bɛsaranyanbi fɔ baanɩ ɛkɩ ɛ dɔ̀ wɔ alan, <<Nya, na we Betelem-te Yese wobi-tenibi fɔ ɛkɩ, gɛtɛ ɛ̀ nyɩ̀ gɛtà gepepe. Ɛ̀ ba oturu, gɛ è di bɩtà bʋʋtàlɛ. Ɛ̀ nyɩ̀ gɛtabʋrʋ, gɛ e ye gɩsaranyan, gɛ Yahwe ɛ̀ fɩya ma ɛwɔ.>>

19 Ɛwʋ gɛ Sawulo ɛ sa bɛnɩ Yese akʋn alan, <<Yɛ aabi Dafidi, gɛtɛ ɛɛ nya bɛyɛran boo koro fɔ, ɛ̀ɛ̀ ba maakʋn.>> 20 Okoro Yese ɛ ka boroboro, ma wayɩn bʋkan, ma digbebibi ɛ gyaga dɩkpɔŋɔ-tɩtɩɩ dii koro, gɛ e tiri wobi Dafidi osele ɛ da Sawulo wakʋn.

21 Dafidi ɛ ba Sawulo wakʋn, gɛ ɛ kya gʋtʋn gɩɩ gɛmɛ ɛ tɛ Sawulo. Sawulo e len Dafidi wade gepepe. Gɛ Dafidi ɛ bɛ mɛ wakpanyan yii betolalɛ fɔ baanɩ ɛkɩ. 22 Ɛwʋ gɛ Sawulo ɛ sa Yese ɔtʋn alan, <<Yɛ Dafidi ɛ̀ sara mɩɩn dɩkpaara ɛ̀ɛ̀ mɛ mɩɩn saranyan, yema wade ii di mɩ gʋnʋn.>>

23 Okoro ɔya-kamasɛ gɛtɛ afiye-kpen gɛtɛ Wurubwarɛ ɛ tɛ osele fɔ ɩ̀ ba Sawulo wo koro fɔ, Dafidi ɛɛ tɩ ka adʋlɛ fɔ ɛ tà. Fɔ Sawulo wo koro gɩ nʋ̀n wɔ, fɔ afiye-kpen fɔ ɩ tɔ wo koro.