1 Samweli 18

Sawulo bʋnʋn bʋ sɩna Dafidi wo koro

1 Gɛtɛ Dafidi ɛ tabʋrʋ ma Sawulo e were fɔ, Dafidi wade ɩ kya Yonatan woturu, gɛ e len wade anlɛ ɛwɔ gbagba wo koro. 2 Ye duwi dɩtɔkɔ fɔ Sawulo ɛ yɛ Dafidi ɛ wɔ wakʋn, gɛ ɛn mɩnɩ yɛ wɔ ɛ̀ɛ̀ san wote dɩkpaara. 3 Gɛ Yonatan ɛ tà dikola ma Dafidi, yema e len wɔ anlɛ ɛwɔ gbagba wo koro. 4 Yonatan e tiri wɔ gɛgba wurukyaa gɛtɛ ɛ̀ sa fɔ ɛ tɛ Dafidi, fɩya ma wɔ gɛgba serelɛ, ma wɔ tata, ma wɔ gyangarɩ, ma wolilɛ.

5 Gɩnyan-kamasɛ gɛtɛ Sawulo ɛ sa Dafidi alɛ ɛ mɛ fɔ, ɛɛ mɛ wʋ gepepe. Wuu koro Sawulo ɛ mɛ wɔ ɛndɩrɛ wɔ bɩtà bʋʋ bɛtàlɛ fɔ powu baanɩ. Gɛlɛ gaade nyayɩ ii di bɛnɩ fɔ powu ma Sawulo wɔ bɛndɩrɛ gʋnʋn.

6 Ɔya gɛtɛ Dafidi e wolo Filisiti-te fɔ, gɛ bɩtà bʋʋ bɛtàlɛ fɔ be biri bɛɛ ba ditele fɔ, bɛnanɩ fɔ be gbɛrɛ be ye Isareli atele fɔ powu yaanɩ bè be tuma egyu-dɩrɛ Sawulo ma ɩnʋn, ma gelèn, ma ɔsɛ wʋʋ-ɩnʋn, ma akyaka, ma adʋlɛ ɛbɛ. 7 Ɔya gɛtɛ bee lèn fɔ, bɛ nʋma ɔnʋn alan, <<Sawulo e wolo bɛnɩ nkpɩn ton-ton, gɛ Dafidi mɔ e wolo bɛnɩ ɩgbaa ton-ton.>>

8 Okoro Sawulo ɛ ka owurufa, yema ɔnʋn gɛtɛ bɛɛ nʋma fɔ wuu koro. Gɛ Sawulo ɛ dɔ̀ alan, <<Be sila Dafidi alan, e wolo ɩgbaa ton-ton fɔ, gɛ nmɩ na wolo nkpɩn ton-ton. Anʋn na nɩ kuruma gɛtɛ ɛ̀ɛ̀ mɛ egyu-dɩrɛ?>> 9 Gɛ boo ye duwi dɩtɔkɔ fɔ, Sawulo ɛ ka gʋnʋn-kyʋn ɛ gyaga Dafidi wo koro.

10 Duwi-nyɔɔfɛ fɔ, Yahwe ɛ yɛ afiye-kpen ɩ ba Sawulo wo koro ma ɔkɛma. Gɛ e gyu gɛtabʋrʋ wɔ dɩkpaara daanɩ, fɔ Dafidi ɛɛ ta adʋlɛ anlɛ gɛtɛ ɛ̀ fʋrʋma ɛɛ ta fɔ. Fɔ Sawulo è de gɩtʋrʋnyan ma gʋlɔ. 11 Ɛwʋ gɛ e fun gɩsɩnta fɔ, gɛ ɛ dɔ̀ alan, <<Nan sere Dafidi n marama ɔpɔrɩ.>> Mɔ Dafidi e ye waanɩ disere dɩnyɔɔ. 12 Nkele Sawulo è serenti Dafidi, yema Yahwe ɛ̀ fɩya ma Dafidi, mɔ Yahwe e kere Sawulo ɛ ya. 13 Gɛlɛ wuu koro Sawulo e tiri Dafidi e ye wɔ dɩkpaara daanɩ, gɛ ɛ mɛ wɔ egyegeyelɛ bɩtà bʋʋ bɛtàlɛ nkpɩn ton boo koro. Gɛ Dafidi e gyegeye ma bɛnɩ fɔ, gɛ bɛ da bɩtà baanɩ. 14 Gɩnyan-kamasɛ gɛtɛ ɛ̀ mɛ fɔ, wʋʋ san gepepe wʋ tɛ wɔ, yema Yahwe ɛ̀ fɩya ma ɛwɔ. 15 Gɛtɛ Sawulo e we anlɛ gɛtɛ, ade ɩɩ san gepe ɩ tɛ Dafidi fɔ, e serenti wɔ. 16 Mɔ Isareli ma Yuda bete powu be len Dafidi wade, yema e gyegeye bɔɔ bʋnʋn ɛ ka bɛ ɛ san bɩtà, gɛ e biri ma bɛ ɛ ba.

Dafidi e to Sawulo wobi Mikali gɩna

17 Gɛ Sawulo ɛ dɔ̀ Dafidi alan, <<Nya miinbi-nanɩbi ɛndɩrɛ Merabi. Nan ka wɔ n tɛ wɔ̀ àà to gɩna, awɔ bɛ sʋma mɩ ma aakɛma powu fɔ àà kpà Yahwe akpa fɔ.>> Fɔ Sawulo wamɩnlɛ ɩɩ dɔ̀ wɔ alan, <<Nmɩ, mɩn nan ka mɩɩn gʋlɔ n kya wɔ, mɔ Filisiti bete nan mɛ wʋʋ gʋtʋn.>> 18 Mɔ Dafidi ɛ dɔ̀ Sawulo alan, <<Ɛnyan n di mɩ? Gɛ ɛnyan n di mɩɩn bɛfʋrɩ, abɛɛ miinte dɩkpaara Isareli gɛtʋnkwaa gaanɩ, gɛtɛ nan mɛ egyu-dɩrɛ wolete?>> 19 Okoro gɛtɛ ɔya wʋ nɩma gɛtɛ Sawulo wobi Merabi ɛ̀ɛ̀ kpà Dafidi fɔ, bɛ ka wɔ bɛ tɛ Mehola-te Adirile gɩna.

20 Fɔ Sawulo wobi Mikali ee len Dafidi gepepe. Gɛtɛ bɛ dɔ̀ Sawulo ade fɔ, wʋ mɛ wɔ ɔsɛ. 21 Sawulo ɛ mɛ wɔ dɩmɩnlɛ alan, <<Nan ka miinbi fɔ n tɛ wɔ, fɔ ɛ̀ɛ̀ mɛ anlɛ ɔdʋ-tenlɛ ɛ tɛ wɔ, fɔ èè wura nʋ̀n Filisiti bete bɔɔ gʋlɔ gaanɩ.>> Okoro Sawulo ɛ dɔ̀ Dafidi alan, <<Nkele a biri a wura osele gɛtɛ àà biligi miinlote.>>

22 Ɛwʋ gɛ Sawulo ɛ dɔ̀ wɔ bɛndɩrɛ fɔ alan, <<I kpèlè Dafidi gɩlan, fɔ yàà dɔ̀ wɔ alan, <Nya, aade ɩ̀ ba egyu-dɩrɛ ɔmɩrɩ, gɛ wɔ bɛsaranyan powu bee len aade. Wuu koro wʋ kɔlɔ gɛtɛ àà mɛ wolote.> >>

23 Gɛ Sawulo bɛndɩrɛ fɔ be biri bɛ tabʋrʋ ade fɔ bɛ tɛ Dafidi, gɛ Dafidi ɛ dɔ̀ bɛ alan, <<Ɩ̀ nyɩ̀ alɛ wù di gɛ onyun waanɩ gɛtɛ àà biligi egyu-dɩrɛ wolote? Nmɩ bɩrɛ, ǹ di gɛ eyenpu, gɛ bɛnɩ bɛn nyɩ̀ mɩ.>>

24 Gɛtɛ Sawulo bɛndɩrɛ fɔ bɛ dɔ̀ wɔ ade gɛtɛ Dafidi ɛ dɔ̀ fɔ, 25 Sawulo ɛ dɔ̀ bɛ alan, <<Ɩ dɔ̀ Dafidi alan, <Egyu-dɩrɛ ɛn taa len getiri-koro gaanyan ɩkɩ fɩya ma Filisiti bɩtà bʋʋ bɛtàlɛ bɔɔ bɩsan baakpa-kpen akpilin ton, gɛtɛ ɛ̀ɛ̀ ka le wɔ bɛkyʋnlɛ gutoro.> >> Yema Sawulo ɛɛ mɛ dɩmɩnlɛ alɛ, <<Dafidi ɛɛ̀ nʋ̀n Filisiti bete baalɔ yaanɩ.>> 26 Okoro gɛtɛ egyu-dɩrɛ bɛndɩrɛ fɔ bɛ bɛ dɔ̀ Dafidi ade nyayɩ fɔ, wʋ mɛ wɔ ɔsɛ, gɛtɛ eè biligi egyu-dɩrɛ wolete. Pɛgɛ gɛ ɔya gɛtɛ egyu-dɩrɛ ɛ sɩ̀ fɔ wàà nɩma fɔ, 27 Dafidi ma wɔ bɩtà bʋʋ bɛtàlɛ bɛ san bɛ ma wolo Filisiti bete gɛkpɩn (200). Gɛ Dafidi ɛ ka bɔɔ bɩsan baakpa-kpen fɔ ɛ ma wùlà egyu-dɩrɛ anlɛ gɛtɛ e lila fɔ, fɔ èè wura biligi egyu-dɩrɛ wolote. Gɛ Sawulo ɛ ka wobi-nanɩbi Mikali ɛ tɛ wɔ gɩna. 28 Gɛtɛ Sawulo e we alɛ, Yahwe ɛ̀ fɩya ma Dafidi, gɛ wobi-nanɩbi Mikali è len wɔ fɔ, 29 Sawulo e biri e serenti Dafidi ɛ fɩya, gɛ Dafidi e biligi wɔkyʋnlɛ gakpaakpa.

30 Filisiti bɩtà bʋʋ bɛtàlɛ bɔɔ bɛndɩrɛ bee ti ye bɛ san bɩtà, mɔ ɔya-kamasɛ gɛtɛ bɛɛ san fɔ, Dafidi ee di boo koro gʋsɔ ɛ da Sawulo bɩtà bʋʋ bɛtàlɛ fɔ bʋʋ bɛndɩrɛ-kurumakyɛɛ fɔ. Okoro Dafidi e di diyere gepepe.