1 Samweli 24

Dafidi e wura osele wololɛ Sawulo mɔ en wolo wɔ

1 Gɛtɛ Sawulo ɛ ma kpà ma Filisiti bete e were fɔ, e biri ɛ ba, gɛ bɛ dɔ̀ wɔ alan, <<Dafidi ɛ̀ sa En Gedi wotonkuma waanɩ.>> 2 Okoro Sawulo e tiri Isareli bɩtà bʋʋ bɛtàlɛ nkpɩn bisiyee (3,000), gɛ ɛ da ɛ̀ ma bugiti Dafidi ma wɔ bɩtà bʋʋ bɛtàlɛ gɛtɛ bɛ̀ sa dɩfa dii begbebi bɔɔ dɩtaa-fwe daanɩ fɔ. 3 E be gyu kpanan difwe gɛtɛ dɩ̀ gbɛma bɛyɛran baadʋrɔkʋn fɔ gɛ Sawulo e gyu daanɩ ɛ̀ɛ̀ san mosele. Fɔ ɛn nyɩ̀ alɛ Dafidi ma wɔ bɩtà bʋʋ bɛtàlɛ mɔ bè bu kpanan difwe dɩtɔkɔ ke daanɩ. 4 Ɛwʋ gɛ Dafidi bɛnɩ fɔ bɛ dɔ̀ wɔ alan, <<Ǹdò n di duwi gɛtɛ Yahwe ɛ tɩ̀ dɔ̀ wɔ alɛ, <Nan ka aakyʋnlɛ n sa aalɔ yaanɩ àà mɛ wɔ anlɛ gɛtɛ àà len fɔ.> >> Okoro Dafidi ɛ pɛtɩ gɛ e ma kebi Sawulo bɩtà bʋʋ gɛgba giinyun bɛrɛɛ. 5 Mɔ wʋʋ gama fɔ, Dafidi woturu wʋ gbɛrɛ wɔ, yema gɛtɛ e kebi Sawulo bɩtà bʋʋ gɛgba bɛrɛɛ fɔ. 6 Ɛwʋ gɛ Dafidi ɛ dɔ̀ wɔ bɛnɩ fɔ alan, <<Yahwe ɛ ka ɛ san ɔfɔ, gɛtɛ nan mɛ miinfonte gɛtɛ Yahwe ɛ sʋrʋ wɔ bʋnɔ fɔ ade-kpen ɩkɩ, abɛɛ nan tiri gʋlɔ wo koro, yema Yahwe ɛ sʋrʋ wɔ bʋnɔ.>> 7 Okoro Dafidi e yela ade fɔ yii koro ɛ fa wɔ bɛnɩ fɔ gɛ ɛn yɛ bɛ bàà ma kpà ma Sawulo. Gɛ Sawulo ɛ tɔ e ye dɩtaa-fwe fɔ daanɩ ɛ da.

8 Dʋkɔ gɛ Dafidi e ye dɩtaa-fwe fɔ daanɩ gɛ ɛ gbɛrɛ afala e kpèlè Sawulo alan, <<Miinfonte egyu-dɩrɛ!>> Gɛtɛ Sawulo e fi ɛ nya wɔ gama fɔ, e we gɛtɛ Dafidi ɛ waran e kura gɛ ɛ ka wɔ bʋnʋn e tin gɛtʋnkwaa. 9 Ɛwʋ gɛ Dafidi ɛ dɔ̀ Sawulo alan, <<Anʋn yii koro gɛ aa nʋn bɛnɩ gɛtɛ bɛɛ dɔ̀ alɛ <Nmɩ Dafidi ǹ ba amɩnlɛ-kpen aa koro?> 10 Awɔ gbagba a we gɛtɛ ǹdò Yahwe ɛ ka wɔ̀ ɛ sa mɩɩn gʋlɔ dɩtaa-fwe fɔ daanɩ. Bɛkɩ bɛ fʋba bɛ sa mɩ alɛ, n wolo wɔ̀, mɔ na kere wɔ̀ na ya. Yema na dɔ̀ alɛ, <Mɩn nan ka mɩɩn gʋlɔ n kya miinfonte kpakpaakpa, yema è di egyu-dɩrɛ gɛtɛ Yahwe ɛ sʋrʋ bʋnɔ.> 11 Miinte, nya aa gɛgba wurukyaa fɔ giinyun mɩɩn gʋlɔ gaanɩ. Na kebi aa gɛgba wurukyaa fɔ giinyun mɔ miin wolo wɔ̀. Nkele nʋn fɔ àà nyɩnla alɛ n ma aa koro gaamɩnlɛ kpen ɩkɩ, gɛ mɩn tɔ yela aa koro. Mɩn mɛ wɔ̀ ade-kpen ɩkɩ, mɔ aa fan mɩ gɛtɛ àà wolo mɩ. 12 Yahwe nan dɔ̀ ɛtɩ ma awɔ tɩɩ gɛdɔ̀. Fɔ èè le wɔ̀ ade-kpen gɛtɛ a mɛ mɩ fɔ powu yii gutoro, mɔ nmɩ bɩrɛ, mɩn nan ka mɩɩn gʋlɔ n kya wɔ̀. 13 Anlɛ gɛtɛ bɛndɩrɛ bɛ gbɛrɛ dɩkpalɩ alɛ, <Bɛnɩ-kpen n tɛ mɛ ade-kpen> fɔ, okoro mɩɩn gʋlɔ gɩ nan kya wɔ̀. 14 <<Ɛnyan gɛ Isareli wogyu-dɩrɛ ee len èè wolo? Ɛnyan gɛ à serenti à berema? Ɛkpɛɛ-kulɛ? Abɛɛ dɩbaaba? 15 Yahwe eè gyu taade yaanɩ, ɛɛ̀ dɔ̀ ɛtɩ ma awɔ tɩɩ gɛdɔ̀. Eè to maade ɛ sa fɔ èè tiri mɩ e ye aalɔ yaanɩ.>> 16 Gɛtɛ Dafidi ɛ tabʋrʋ e were fɔ, Sawulo e lila alan, <<Miinbi Dafidi, awɔ n tɛ tabʋrʋ lɛ?>> Gɛ e gbena ɛ sa gewula. 17 Ɛwʋ gɛ ɛ dɔ̀ Dafidi alan, <<Ayo wʋ̀ ba aten, yema alɛ a mɛ mɩ gepe, mɔ nmɩ bɩrɛ na mɛ wɔ̀ ade-kpen. 18 Gɛ ǹdò a tiri aa gɩnɩ-kpara a wùlà mɩ, yema Yahwe ɛ ka mɩ ɛ sa aa gʋlɔ gaanɩ, mɔ an wolo mɩ. 19 Gengyi ɛnɩ ɛkɩ è wura wɔkyʋnlɛ fɔ, ee kere wɔ ɛ ya ɛ̀ɛ̀ da tuntun? Ade gɛtɛ a mɛ a tɛ mɩ ǹdò lɛ wuu koro, Yahwe ɛ ka ade-kpara e le wɔ̀ gutoro. 20 Ǹ nyɩ̀ gɛtɛ aa nyɩ a ba mɛ egyu-dɩrɛ gɛ Isareli bugyu baà sere wɔ̀ gepe. 21 Nkele kan ntam Yahwe diyere daanɩ tɛ mɩ alɛ a nan wolo miindu waanɩ wʋʋ bɛnɩ abɛɛ a nan kpa miin diyere a ye miinte bɛfʋrɩ baanɩ.>> 22 Okoro Dafidi ɛ kan ntam ɛ tɛ Sawulo. Dʋkɔ gɛ Sawulo e biri ɛ da dɩkpaara, mɔ Dafidi ma wɔ bɛnɩ be biri bɛ da boo gebukʋn.