Neemias 1

Nexemia Kayiikparama

1 Nexemia, Xakalia ɔbibirɛrɛĩ atɔ̃me i ngbe ne.

Iyi iwɛ̃ i Kislev wɔ nɖe ma Hebrise kuwa kaiwɛ̃va ame i ikɔ sinyɔva ame ne, lowe i Susa. 2 Xanani, wũ ɔnyibirɛrɛĩ ɔwɛ̃ ku marɛrɛ̃ mama ɔbɔrɛ i Yuda maba. Ne lokarɛ ma atɔ̃me i ma Yudase ma lotere maikɛlɛ kafɔrɔ̃ ame fiɛ lokarɛ ara i Yerusalem iso ana.

3 Maɣere me sɔ, "Ma Yudase ma lotere i sisande ame fiɛ makpese maba ibuiti karɔ̃ ame ne, ma ngbã ɖe inyɛwe gu kunuarɛ gbaã. Yerusalem abere ɔɔbiɛ fiɛ ɔtɔ ɔɔtsuedza ɔmagɛ̃ kuyogodɔ̃."

4 Gɔ lonɔ atɔ̃me wagbe ne, lokpase losɛ i karɔ̃ lobiɛ kaku. Lomararã so ayi awɛ̃, lonyikanya gu kayiikparama lotã kato Ɣaa. 5 Kere ne loɣɛ sɔ,

"O, Bosate, kato Ɣaa, ɔsiare gu Ɣaa wɔ nɖe ifɔ̃ra. Nwɔ nsɛ ɔmɔɛ̃ ɔ̃ kuɖɔɛ ndamu ɔla ku mma nsɛ maɖɔɛ wũ fiɛ masɛ mawarɛ ɔ̃ mmara. 6 Kã atsue, si abusi fɔ anɔmi anyɔ si anɔ fɔ ɔɖabo kayiikparama kasɛ̃ gu anɔwã i fɔ anɔ, i fɔ maɖabo Israel maturi iti. Nto loɖi bo Israel kaɖe akpi wa bobara i fɔ iso loɣere-ɔ. Wũ mɔmɔ gu wũ mawa pelepele ɔbara ikpi i fɔ iso. 7 Bobara ɔtile i fɔ iso gbaã. Boibara i fɔ mmaraisi, asɛ̃ra gu mmara ara wa atã bo iki i fɔ ɔɖabo Mose iso.

8 "Nyigi asɛra wa aɣere fɔ ɔɖabo Mose. Aɣere wũ sɔ, 'Si miiɖe ɔnukuare ne, loasamera mi lopia i nɖebi ame. 9 Ɣɛɛ si mifiriki miba i wũ kɔrɛ fiɛ mimɔɛ̃ wũ mmara mila ne, si ta karɔ̃ kawirikɔ̃ mamɔɛ̃ fɔ maturi lɛ mafɔrɔĩ makɛlɛgu dzoroo, i kuɖokpo kayirinɔ kɔraa ne, loasa ma kanya lobɔrɛgu i mmɔ, lobɔ i ngbegɔ loɖi lɛ wũ Iyere kawekɔ̃.'

10 "Fɔ maɖabo gu fɔ maturi maɖe; mma aɖigu fɔ ɔle siare gu kɔrɔ̃ teteree. 11 O, Sate, kã fɔ ɔɖabo wɔgbe kayiikparama atsue. Kã fɔ maɖabo mama ma nsɛ mana isoɣɔ i kuwarɛ ipia fɔ iyere iso atsue. Tã fɔ ɔɖabo isaruɛ nɔme i kumɛgɔ aanyɔ wũ nnya i igara wɔgbe anɔ."

Mme loɖe igara ndãkadze ku ɔwi wɔmɔ ame.