1 Tiyoofilus Duuruunay!

Gwida dehay Wꞌankwana geeboon ikwaaseeb eemtaal sootiib jarrabiyaan. 2 Baliin wꞌawwalii hadiriyaaniit toona tutikeet rhiyaan Ukwaasanaay ibhaliyi shagaamana sooyaaneeteen teena, baraah iktibna. 3 Aflaay Ani uknaayu tibadootee kasseeh een eemtaal daayiib ashibib. Yaa Tiyoofilus whamooysama, ani han een bareeh daayiit hayꞌaatii dehook akantiibeet toona niyaaman. 4 Aflaay teena tisoomamtaneet usidkooh isdil hook miyaadiib dehook akantiib.

5 Heeroodis Yahuudaay whaashi hadꞌa iiktiyeeb udamaaniib, Abiiyaayt tudirriyaaytii iikti fagiiri Sakariyaab iidni iifi. Tutakatuuh Iliisaabaat iidneet han Haaruuniit tudirriyaaytii tiikti. 6 Aan baraah mhallaah Ukwaasanaay suurii daayiiba. Wꞌankwanaayt tiwaseewwa whagwa kasseeh winneet isniikarna. 7 Laakiin Iliisaabaat giduudiitu, aree baraah mhallaah eegrimaabayt, ar kiibariin.

8 Door gaal Sakariya ufagiiriit waajibtooh idꞌi, aree baruuh Ukwaasanaay suurii ifagiiramti shagaayooh shagaamiya. 9 Ifagiiriya iidꞌaneet tꞌaadaateeb, tugurꞌa bariiyooh dehaay dhibta. Baruuh Wꞌankwanaay oogaw beeti giigiit oolbaan iiliw iikti. 10 Oolbaan hooy iiliwneet tuusꞌa eetanihoob, uudehay isiileeliin kassaah barraab siileeliin.

11 Malya Wꞌankwanaay malak bariiyooh dehaay lawiya. Oolbaaniit karaamaati mhiini umaygwadiib gadee lawiya. 12 Sakariya umalak rhiyanihoob, akra mirkwaay irkwi. 13 Laakiin umalak bariiyooh dehaay, "Sakariya, baarakwiya! Tusiileeltuuk titmassaaw. Tutakatuuk Iliisaabaat nikwiitiit, oor ifaar tindi. Oon wꞌoor Yuuhannaab iisim tindiya. 14 Baruuh firhaatwa mimdheedhtwa dehook iikti indi. Baruuh itfariyeeb oodoor, gwida dehay han afirhi iyadna. 15 Baruuh Wꞌankwanaay suurii win tak iikti indi. Haab gwꞌi kiidi tari naat askirsitiniit gwꞌi kiidi. Toondeeti yaamiib haayee Eeshuuk Imugaddasa iitab indi. 16 Yꞌisraaꞌiilaayi dehayiib gwidaab Wꞌankwana Ukwaasanaayoohna dehaay yꞌigir indi. 17 Baruuh Wꞌankwanaay suurii Eelyaay ishuukeewwa yꞌakrireewwa saki indi. Ibaaba yꞌareehna areesi indi. Ukwaasana baasinaakiir oodehay eeshbooneet fagarandi beeti yꞌigir indi. Wꞌankwanaay dehaay amar dehay iikwasi indi." idi.

18 Sakariya umalak raatiya, "Aneebwa tutakatuuwwa eegrimaaba, een ibhali usidkooh kak akteen?" idi.

19 Umalak igwibi, "Ani Jibriili. Ukwaasanaay suurii angadi, aree barook anfariidi jillaaywa oon usakana udaayiib sootiyook jillaaywa diigwatamaabi. 20 Baruuk aniib ibhali aamanaab kittaayayt, gilluusiib iikti tindiya, aree tuun tuuna tikatiyeeb hadiit whadiidti adgiri kitdiya. Baliin aniib ibhali udooriyooh sidik iikti iyadna." idi.

21 Been oodoor uudehay Sakariyaab yhigitna. Baruuh Wꞌankwanaay ugawiib idleeleet toonaatiib ajjabamiin. 22 Sakariya ifirꞌihoob, ibhaliyi hadiidti adgiriib akaab kiiki. Uudehay baruuh Ukwaasanaay ugawiib naat rhi rhaab ikatiyeet toona ikanna. Sakariya oodehayii dehaay wꞌayiisooh tuuli. Laakiin whadiidti adgiraab kiiki.

23 Wꞌankwanaay ugawiib ishagaamtiib damaneeh faayisiyanihoob, baruuh ugawooh ibi. 24 Beenaay harꞌii tutakatuuh Iliisaabaat tinkwi. Batuuh ay tirga oogaw hasamaat kitti. 25 Batuuh "Wꞌankwana anii dehaay toon idꞌi. Een eembꞌi baruuh tudaayiinaaytooh rhisiyaheeb aree udehayiisu bitikii yꞌeeba hoosu giigisiya." tidi.

26 Wꞌasagwira tirgiib, Ukwaasana umalak Jibriil Jaliileeb whaashiib tiifiit tumadiina Naasiraab beeti diigwatiya. 27 Daawidiit tudirriyaaytii iiktiib Yuusif iidni takii dehaay daasamaat aagirtii dehaay diigwatiya. Tꞌaagir Maryam iidna. 28 Umalak Maryamii dehaay shuumiyaayt, "Kwatiituwii? Wꞌankwana geebook eefi. Batuuk winneet baarakamaatuwii." idi.

29 Maryam umalaki bhaliyeeb winneet gwirhaamta, aree uun naa salaamti iiktiyeeb ajjabista. 30 Laakiin umalak batiiyooh dehaay, "Maryam, biirakwii! Ukwaasanaayt nꞌima timrii. 31 Inaakw tindii aree oor ifaar tindii. Barooh Yasuuꞌaab iisim tindii. 32 Uun wꞌoor win tak iikti indi. Winneet Utageegaay Wꞌoor ituusim indi. Wꞌankwana Ukwaasana barooh whooba Daawidiit tehadꞌaayi iyaaw indi. 33 Malya baruuh diimaab Yaaguubiit tudirriyaayti kehii hadꞌaab iikti indi. Tehadꞌaayeetuuh door han ingid kitdi." idi.

34 Maryam umalakii dehaay, "Tuun kak iikti tindi, ani aagirt akatiyeek?" tidi.

35 Umalak igwibi, "Aashuuk Imugaddasa hook daayi iyadna. Winneet Utageegaay akrir kehook daayi iyadna. Aflaay been umugaddas batiisook itfariib Ukwaasanaay oor ituusim indi. 36 Beet tꞌayaay takatuuk Iliisaabaat han tꞌeegrimaaytiyooh oor ifaar tindi. Beet suur giduudiit tittiyuud oontꞌa asagwir tirgaayi nakw tibari. 37 Ukwaasana biikwaasiyeena kitehaay." idi.

38 Maryam tigwibi, "Ani Wꞌankwanaayt kishiyaati. Baruuk tindiyeet batiikti!" tidi. Malya umalak batooh yꞌish giigiya.

39 Beenhoob Maryam timaraayt willa Yahuudaay irbaayi haashiib tiifiit madiina tibi. 40 Sakariyaay oogaw shuumtaayt Iliisaabaat shoobta. 41 Iliisaabaat Maryamiit tusalaam timaasiwihoob, wꞌoor batiiyooh uyaamiib irgas. Aree Iliisaabaat Eeshuuk Imugaddasa titab. 42 Batuuh tageegi hissii Maryamii dehaay: "Batuuk timꞌateeb baarakamakaatuwii, uyaamiyook eefeeb unisrik han baarakamaabi. 43 Laakiin ani aabtuuyt, Wꞌankwanaayiitu tuundi eetniheeb? 44 Batiiyook tusalaamti hiss willa amaasiwihoob, wꞌoor firhaatee uyaamiyu irgas. 45 Wꞌankwana uwaadiyaayooh iitkwikw indiyeet toona aamantaayayt, batuuk baarakamaatuwii." tidi.

46 Maryam:

"Kassooh uginꞌiisu Wꞌankwana ahammiid.

47 Ukwaasana Wꞌishidhhiinu sabbii aniib aashuuk afirheena,

48 baruuh imshabiibheeb

aneeb tukishiyaatooh tumiskiin.

Oontꞌaanee fidnaab kassuuh uutaas tubaarakama waliikiheeb iyadna.

49 Ukwaasana Wꞌalya anii dehaay winnayt idꞌi,

aree uusmuuh mugaddas ikati.

50 Tirhamaataah baliib barooh ireekw beeti,

taas taasii ikatimna.

51 Wꞌankwana wꞌayiisooh akraanayt ikwaas.

Iginꞌaayeeb ookibir ibariib baliib ibrir idꞌi.

52 Yhadꞌa tehadꞌaayeeteesoohna tikwisiya,

laakiin imiskiina reewisiya,

53 yhargwaab daayiinaytee gabisiya,

laakiin igabaab naat anu giigisiya.

54 Ukishiyaayooh Israaꞌiil isham,

tirhama shꞌiya,

55 Ibraahiimwa, yꞌareeyooh dehaaywa diimaab

idiyeet toonaatiit hoobeeyoon dehaay han diyaabi." tidi.

56 Maryam mhay tirga Iliisaabaati geeb tehagitaayt, malya ugawooh tꞌagar.

57 Iliisaabaat ufraayuuh door eeyanihoob, oor tifri. 58 Ishawwaahwa yꞌayaydaahwa Wꞌankwana batooh tirhamaateeh tigwidaat rhisiyaneet toona imaasiwna, aree baraah batiiyooh geeb winneet afirhiyaan.

59 Baraah tooyin tꞌasimhaatiib unisriki kwishuubii dehaay eeyaan. Aree barooh ubaaba Sakariyaay dehaay iisimneet toona yhiriwna. 60 Laakiin bariituuh tuundi hadiidtaayt, "Abadan! Baruuh Yuuhannaab ituusim indi." tidi.

61 Baraah batiiyooh dehaay, "Udehayook bitik oon oosim atoosmaab gaal han kiihaay." idiin.

62 Malya ubaaba Sakariyaab beeti mitiyaayaaniit, baruuh wꞌoorooh aab iisim indiyeet toona sakanaayaan. 63 Baruuh kehii kantiibi lha raatiya. Malya baruuh, "Oosmooh Yuuhannaab ittiyoodi." idiit iktib. Uudehay kassaah winneet ajjabamiyaan. 64 Malya Sakariyaab willa uyafuuh ingal, umiidalaab ifdag, aree whadiidti badooya. Aree Ukwaasana yhamid. 65 Ishawaw kasseeh mirkwaay dehaay dhibiya. Kassooh Yahuudaay irbaayi haashiib uudehay teen teena kasteeh hadiidiyaan. 66 Een ibhali iimsawka isgiribna aree raatiina, "Uun wꞌoor naan iikti indi?" iidna. Wꞌankwana bariiyooh geeb eefiyeet toona ikanna.

67 Bariiyuuh ubaaba Sakariya Eeshuuk Imugaddasaayee itabaayt isrid:

68 "Whamaad Wꞌankwanaayu, Israaꞌiileeb Ukwaasana,

Baruuh eeyaayt udehayooh ishidhhan.

69 Baruuh midhhan iniiw akraab gaal

Daawidi dhiwaayeeb dehoon yakisiya.

70 Baruuh shꞌiika inabiyaayeeh imugaddasaayi geebii waadiyaayaabi.

71 Yꞌashooyeesoon ishidhhin hoon indi,

kasseeh baliib iroobanaayeen yꞌayee ishidhhin hoon indi.

72 Baruuh hoobeen rhamaat arhamiya,

aree ugaladooh umugaddas shꞌiini.

73 Baruuh hooboon Ibraahiimii dehaay halafooyaneet tehalafooy:

74 Yꞌashooyeesoon yꞌayee ishidhhiineetoon toonaatu,

aree barooh mirkwaay anu shagaamnayeet toona ootaad dehaay iniiweetoon toonaati.

75 Bariiyooh suurii diimaab kasseeh imbꞌeeyeen gadastiiwwa shibootiiwwa nikweer.

76 Aree baruuk, yaa wꞌooruun, Winneet Utageegaay nabi ittiyuud tindiya,

baruuk Wꞌankwanaay dehaay usalal tisoomiiri jillaay, bariiyooh suurii giigi tindiya.

77 Bareeh idanuubaahna afoomeenihoob,

umidhhan imeerneet toona bariiyooh oodehay sooyi tindiya.

78 Ukwaasanaayuun gwidaat rhamaateebuuyt,

tuuyin tutalawtiniit tibreetee yꞌi hoon tindi.

79 Baliib uthibniib ikweernaayi kehii talawtiniyi jillaaywa,

tuyattiit lꞌandalaatiib eefeen baliib dehaay talawiiniyi jillaaywa,

iragadaayeen umꞌasgi salal beeti mitiyaatiniyi jillaaywa yꞌi tindi." idi.

80 Unisrik Eeshuuk Imugaddasaayee iwin aree yꞌakir. Baruuh Yꞌisraaꞌiilaayee dehaay daayiib lawiyaneeb hadiit umingaayiib ikwiri.