1 Sabti bꞌi Yasuuꞌa mꞌariit tamiyee dehaay Fariisi suurkina gaalnaay gaw shuumiya. Kassaah oomhiin iifiin Yasuuꞌaab akraab igwaarirna. 2 Beentooy iragada aamaab iiktiini tak Yasuuꞌii suurii ingad. 3 Yasuuꞌa Ifariisiiwwa whaggi koojaawwa raatiya, "Tusabtiib imheelti halaal han kiiki?" idi. 4 Laakiin baraah naat diyaab kiikeen. Aflaay Yasuuꞌa ootak yꞌabik, aree mheeliyaayt giigisiya.

5 Malya Yasuuꞌa bareeh raatiya, "Bareesookna gaal oor ibariyeek, wꞌooruuk tari uyooyuuk sabti bꞌi reetiib dhibiiniyeek, willa kitfirꞌa han?" idi.

6 Laakiin baraah naat igamna.

7 Yasuuꞌa yꞌamna imhiinan idaayiib kak yhayidneeb rhiyanihoob, baruuh bareeyooh dehaay een eemtaal hadiidiya: 8 "Gaal doobeet aduumaatii dehaay waliikiiniyuuk, timiisꞌanii tehayiskaat baaꞌahaa. Gaal bariisookka winkaab han waliikamaab ikati. 9 Laakiin uutak bareekna mhalleekna waliikaab yꞌeetiit bariiyook dehaay, ‘Oon ootak umhiinook hiiyya!’ indi hook, been oodoor baruuk sikwꞌati tiniina. Weer mhiin shalik takweetikaab tiniina. 10 Laakiin waliikamtiniyihoob, oomhiin ushalik takweetiib ahaa. Aflaay Uutak barook waliikaab yꞌeetiit bariiyook dehaay, ‘Wꞌaraawuun! Hayiska mhiin beeti hantaaya.’ iyaad hook indi. Been oodoor kasseeh yꞌamna irawi suurii hamooysami tindiya. 11 Ugarooyooh tageegsiiniib been dhoomi indi, ugarooyooh dhoomsiiniib been aree tageegi indi." idi.

12 Malya Yasuuꞌa whadareeyooh dehaay, "Mhasiit, tari diraariit aduuma danꞌiyihoob, yꞌaraweek tari isanaayeek, tari yꞌayay deek, tari ishawweek igabaab baawaliika. Bak tiwariyeek, baraah han barook udoorooh waliikeen hook. Aflaay ushagaayook idaataneeb itkwis tindiya. 13 Laakiin aduumaat danꞌiyihoob, oodehay yhamraabwa, yꞌamꞌadhdhaabwa, igarbamaabwa, yhamashayaawwa waliika! 14 Aree baarakami tindiya. Aan baraah barook ikweesneena kiibariin. Tooyin uudehay aashiboob tuyatii yakeenihoob, Ukwaasana ijir iyaaw hook indi." idi.

15 Baliin bariiyooh geeb timꞌari tamiin yꞌamnaayeeb gaal een imaasiwihoob, Yasuuꞌaay dehaay, "Uutak Ukwaasanaayt tehadꞌaayeetiib tꞌaduumaatiib tamiiniib been baarakamaabu!" idi.

16 Yasuuꞌa bariiyooh dehaay, "Tak gaal wint aduuma isoomir, aree gwida amna waliikiya. 17 Malya tꞌaduumaati door oodehay iwaliikamaab sooyi jillaay ukishiyaayooh diigwatiya. Baruuh ‘Mꞌaana, oontꞌa naatka amaartu!’ idi.

18 Laakiin baraah kassaah biibaayneet toona igwirhaayeehna hadiidiyaan. Wꞌawwali, ‘Ani haash adlib ayhee, oontꞌa ibakii bayiit iishbib andi, anaahook afooyaheeb!’ idi.

19 Weer aree, ‘Tamin Yoob adlib ayhee, oontꞌa haay firꞌatiit bareeh jarrabi andi, aneeb afooyaheeb!’ idi.

20 Weer han, ‘Ani gayii gaw gidaabuuyt, aflaay wꞌaay kaꞌadgiran.’ idi.

21 Ukishiya wꞌankwanaayooh dehaay yꞌagaraayt, tutiki sooya. Malya ugawikina winneet yhasaayt, ukishiyaayooh sooya, ‘Tumadiinaati salalaawwa eedooywa beeti willa firꞌaa! Oodehay yhamraabwa, yꞌamꞌadhdhaabwa, igarbamaabwa, yhamashayaawwa tooy haay mꞌaa!’ idi.

22 Ukishiya yꞌagaraayt, ‘Yaa wꞌankwana, baruuk sootaneet tuuna daamta. Laakiin masi tooy gwida dehayii dehaay harar mhiin eefi.’ idi.

23 Malya wꞌankwana ukishiyaayooh dehaay, ‘Tumadiinaatii barraab firꞌaa! Aniib uugaw eettabiyeeb hadiit isalalaawwa idooyeewwa oodehay shuumsaa. 24 Ani andi hookna, baliin eenda iwaliikamaaneeb gaal han aniit timꞌari dꞌamsi kiidi.’ diyaabu." idi.

25 Yasuuꞌi geeb gwida dehay iibaabiin. Bareeyooh nakamiyaayt: 26 "Anii dehaay yꞌiiniib uutakka, Baaboohwa, deetoohwa, tutakatoohwa, yꞌareehwa, isanaayeehwa, tikwaateehwa biihimaagayeek, umidhhanooh ookna han biihimaagayeek, anii kwiriyaataayi kiiꞌaki. 27 Aree usaliibooh yaksiitka aneeb baaraam, anii kwiriyaataayi kiiꞌaki.

28 Bareesookna gaal win siraayaati dꞌuur harriiweek, awwal baruuh nꞌati sꞌatiit utaman naan ikatiyeeb, mheen mhallaga oogaw dehaay faayseen ibariyeeb biibariyeeb kiishibib han? 29 Baruuh wꞌasaas daasiit oogawi faaysiti biiꞌadgirayeek, beet toona rhiiniibka bariiyooh iifiyad indi: 30 ‘Uun uutak gawi dꞌuur badooyaayt, ifaayisti igwooy.’ iyaad indi.

31 Tari whadꞌa tamin alfa dheesh ishuukeeh haay yhanbiyeeb ibariib, whadꞌa ubarooh finaasamiiniib tagwuugw alfa ibariyeek, kak iiwari indi? Baruuh awwal nꞌati sꞌatiit ansiramiiniyeeb biikaayeeb kiishibib han? 32 Baruuh biiꞌadgirayeek, whadꞌa uuraaw masi usalaliib haayee, diigwatkinaab beeti fidigtiit mꞌasig hooy harriiw. 33 Aflaay oontꞌaaneet gaalka tutibariyi kastooh ishtiit aneeb biiraameek, anii kwiriyaataayi kiiꞌaki." idi.

34 Yasuuꞌa, "Umiilak daayiibu, laakiin uudꞌaam hooy giigiiniyeek, kak uudꞌam masi dehaay itꞌagiir? 35 Baruuh whaashii dehaay daayiib kiiki. Wꞌandhooy dehaay han daayiib kiiki. Uudehay barraab eefifna.

Eemsiiw angwil ibariibka, baꞌiimsaw!" idi.