1 Bꞌeeb gaal toomaag sakanaawwa itilbaat tamanaawwa kassaah Yasuuꞌiit sinaakrooytii dehaay immarraayna. 2 Laakiin Ifariisiiwwa, whaggi koojaawwa iikwiyaaniit, "Uun uutak toomaag sakana anshiish aree bareeyooh geeb tamiini." idiin.

3 Malya Yasuuꞌa bareeyooh dehaay een eemtaal hadiidiya: 4 "Bareesookna gaal sheeb arginaab ibariyeek, aree gaal hooy kwidhiiniyeek, kak iwari? Yꞌashshadhig tamuunwa yꞌashshadhig umingaayiib ishtiit, ukwidhaab marriyeeb hadiit kiihariw han? 5 Aree baruuh wꞌargin marriyihoob, afirhiit wharkaayooh kehii daasiini. 6 Aree ugawooh eebi. Malya baruuh yꞌaraweehwa ishawweehwa waliikiit, ‘Ani wꞌarginu ukwidhaab amri!’ indi. 7 Ani andi hookna, oontꞌaaneet ashshadhig tamuunwa ashshadhig shibu dehay tuubaat baahariiwaayeeka, amaag sakanaab gaal tuubiiniyihoob, tibreeteeb tageegakaat firha ikatiin.

8 Tari takat gaat tamin ashteeti mhallaga tibariit, gaal hooy kwidhistiniyihoob, kak saktini? Batuuh lambaat tishidhhiin aree oogaw teemhagi, aree marriyeeb hadiit winneet kitehariw han? 9 Aree batuuh marriyihoob, tꞌarawteehwa, tishawawteehwa waliikiit, ‘Mꞌaana! Gwadu afirhaana! Ugirshu ukwidhaab amri!’ tindi. 10 Oontꞌaaneet, ani andi hookna, amaag sakanaab gaal tuubiiniyihoob, Ukwaasanaay imalaki suurii bak firhaat ikatiin." idi.

11 Malya Yasuuꞌa masi, "Malu ar iibri tak iifi. 12 Wꞌoor uudis ubaabaay dehaay, ‘Baab! Umraayii wꞌadhdhu hiiyyaheeb!’ idi. Aflaay uutak umraayooh mhalleeyooh dehaay yꞌadhidh.

13 Shalik bꞌeeyi harꞌii wꞌoor uudis kassooh wꞌadhdhooh iyhaayt, sagi haash beeti iibaabiya. Aree beentooy hisaabooh dꞌiyaab kiikuuyt, imhallagaayeeh ilkik idꞌi. 14 Baruuh imhallagaayeeh kwidhisiyaayt harꞌii, been whaash akraat hargwi hooy daata. Baruuh naat anu imhi. 15 Aflaay baruuh giigiyaayt, been whaashi tak gaalnaay gwad shagaamiya. Uutak barooh ikhansir isigwꞌidi jillaay tudirꞌaatiyooh shagaasiisiya. 16 Ikhansir tamiineet tumꞌari tamiyeet minniimiya. Laakiin barooh naat iyiw gaal han kiihaay.

17 Malya ishuukeeyooh yꞌagaraayt, ‘Ani tooy hargwiit atoodiir. Baabiyu ishagaamana han gwidaat mꞌari tameen! 18 Ani yakiit baabiyu dehaay itꞌigir andi, aree bariiyooh dehaay: Baab! Ani Ukwaasanaay kehiiwwa bariiyook kehiiwwa amaag sakan. 19 Bariiyook oor attiyoodiyee dehaay kaꞌastehalan. Eenda ikiraaykinaayeek tꞌiiteeb gaal kwaasaheeb iyaad andi.’ idi. 20 Aflaay baruuh yakiyaayt ubaabaay dehaay yꞌagar.

Laakiin ubaaba barooh sagi mhiinii yꞌee rhiyanihoob, bariiyooh dehaay nꞌakwmanaaya. Baruuh wꞌoorooh beeti dhaabiyaayt, yhalabaayt hooy fꞌiya.

21 Wꞌoor ubaabaay dehaay, ‘Baab! Ani Ukwaasanaay kehiiwwa bariiyook kehiiwwa amaag sakan. Bariiyook oor attiyoodiyee dehaay kaꞌastehalan.’ idi.

22 Laakiin ubaaba ikishiyaayeeh waliikiyaayt, ‘Ashshigaana! Daawri halak haay mꞌaanaat barooh sitookwna! Bariitooh tugiibalaaytiib khaatim dꞌiina! Gidhꞌaat aree shibna! 23 Dhha laga haay mꞌaanaat haridna. Yakaana aduumaat dꞌiit afirhinayeet toonaati. 24 Uun wꞌooru suur ayaa iifi, tꞌa laakiin idhhan! Suur kwidhaa iifi, tꞌa laakiin maraayu.’ idi. Aflaay baraah tꞌaduuma badooyaan.

25 Beenhoob, wꞌoor uuwin tudirꞌaatiib iifi. Baruuh oogaw idwilihoob, baasinkoobwa hawaatwa imaasiw. 26 Aflaay baruuh ikishiyaayeeb gaal waliikiyaayt, naan tiiktiyeeb barooh raatiya. 27 Ukishiya ‘Usanuuk asgaa yꞌaabuuyt, baabuuk ulaga oodhhaab hardaabi.’ idi.

28 Wꞌoor usuurkina winneet gadabiya. Oogawi shuumti irib. Aflaay ubaaba oogaw shuumiyee dehaay winneet hooy yhariw. 29 Laakiin baruuh ubaabaay dehaay, ‘Shibiba! Ani kassoohoob ukishiyaayt dehook shagaamee masi han naat dehook ribaab kaaki. Laakiin baruuk yꞌaraweeyi geeb haay afirhiyeet nꞌaayt han hiiyyaayheeb kitta. 30 Laakiin uun wꞌooruuk umaalook kassooh mꞌateeb kwidhisiyaayt yꞌagarihoob, ulaga oodhhaab dehaay teharida.’ idi.

31 Ubaaba ‘Wꞌooruunay! Baruuk kassoohoob gwadu tehaya. Ani abariyeet tuuna kastuuh bariitook tikati. 32 Laakiin hiddaab midhadhtiit afirhinayeet toonaati. Usanuuk suur ayaa iifi, tꞌa idhhan, kwidhaa iifi, tꞌa imri.’ idi." Yasuuꞌa idi.