1 Yasuuꞌa ikwiriyaatayeeh dehaay: "Gaba tak wakiil iibri iifi. Uwakiil bariiyooh oomraay kwidhisiya miyaadiib atehimamiya. 2 Aflaay uutak uwakiilooh waliikiyaayt, raatiya, ‘Aan ibhali bariiyook eemsiiweeb naanaata? Kassooh ushanhiyook hisaab haay mꞌaa! Baruuk shaawti anii wakiil kitꞌakaya.’ idi.

3 Uwakiil ugarooyooh dehaay, ‘Oontꞌa kak saki andi? Ushanhikina ushanhii mhaliiniheeb. Ani toobuur afarriikee dehaay akrir kaabari, aree eenꞌaliyee dehaay asankwꞌi. 4 Ani saki andiyeet toona akteen. Tooy ushanhu eetniiwihoob, uudehay igawaayeehna shuumsiiteheeb itehidirheeb iyadna.’ idi.

5 Aflaay baruuh Oodehay wꞌankwanaayuuh siisalfaab iiktiyeeb baliib gaal gaalnaay waliikiya. Baruuh wꞌawwaliib raatiya, ‘Wꞌankwanaayu naan inshiik hook?’ idi.

6 Uutak ‘Sheeb karoora saytuuni saliitiit inshiikeheeb.’ idi.

Uwakiil ‘Tuwaragaatook abika, willa nꞌati sꞌaa, aree ay tamuun kitiba!’ idi.

7 Malya baruuh umalya raatiya, ‘Aree barook naan inshiik hook?’ idi.

Uutak ‘Alif ribꞌa gamhiib.’ idi.

Uwakiil ‘Tuwaragaatook ahaat, asimhay shi kitiba!’ idi.

8 Ushanhikina uwakiilooh ootkaal aagib daayiib sakaabuuyt yhamid. Uun tuduniyaati dehay tehalaagayteehna tikwuukwiib oonuuri dehayiika fagarakaaba. 9 Ani andi hookna, tuduniyaati miraayii araw dehookna dꞌiina! Aflaay baruuh giiginiyihoob, baraakna tikookanii tidaayimaateeb agbilami tiyadna.

10 Winneet shaliknaatii dehaay amiin ikatiibka, gwidaanaatii dehaay han amiin ikati. Winneet shaliknaatiib tikaal aagib ikatiibka, gwidaanaatiib han tikaal aagib ikati. 11 Aflaay tuduniyaati miraayiib amiinaab bitkaayneek, oomraay usidkiinaay aaw aamaniini hookna? 12 Araweeyookna miraayiib amiinaab bitkaayneek, tibareetookna aaw iniiw hookna?

13 Gaal kishiya malu ankwana kashagaamiya. Baruuh tari gaal areeyi indi, tari ooraaw aree iirib indi. Tari oongaal daayiib shagaamiini, ooraaw aree abaabiini. Ukwaasanaawwa imhallagaawwa mhalleehna hiddaab shagaamtiib kaꞌadgirtaana." idi.

14 Ifariisi, baliin oomraay areeyiin, beet toona kastooh imaasiwnihoob, Yasuuꞌiib ifaayidna. 15 Yasuuꞌa bareeyooh dehaay, "Baraakna oodehayi suurii igarooyeekna daayiinaaytii laween tikwasiina, laakiin Ukwaasana iginꞌaayeekna ikteen. Oodehayi bitik winneet takweet tibariina, Ukwaasanaay suurii atoorbiina tikati. 16 Yuuhanna umoosanaay udamaan ookiik, uudehay Muusaay whagwa, inabiyaayi kitabwa isniikarna. Been udamaanii, Ukwaasanaayt hadꞌaayeeti usakana udaayi bhaliimiyanihoob, gaalka shuumiyee dehaay winneet yhariw. 17 Gaat nikwta whaggii ikwidhistiika, toobuutwa tibreeti kwidhisti laamakaabi.

18 Tak takatooh fidigtiit, weet safiiniyeek, been baruuh jikuun ikwasi. Takat fiduugiit safiiniib uutak han jikuun ikwasi." idi.

19 Yasuuꞌa, "Gaba tak winneet daawri halaka alyaab iitkwi iifi. Baruuh timꞌariitiib hooy daayiit tami. 20 Oon ootaki dheefaay suurii tak miskiin Lꞌaasir iidneeb, ubashar kassuuh adilꞌiit ataab iiktiyeeb iifi. Oon ootak ugabaanaay gawi dheefa beeti haay eeyaan. 21 Uun baruuh ootak ugabaanaayt timꞌariitii dhibtiit toona tamiyeet yhiriw. Ubashar adilꞌiit ataabuuyt, aayas aree yꞌiit tꞌadilꞌi iilhisiin.

22 Uun uutak umiskiin iyanihoob, imalak barooh yakisiyaaniit Ibraahiimi daraag daasiyaan. Malya uutak ugaba han iyaayt itoobaas. 23 Uutak toonꞌi daamiya. Akraab lhamaa asti iishbibihoob, Ibraahiim hooy sagii rhiya. Aree Lꞌaasir bariiyooh daraag rhiya. 24 Aflaay baruuh Ibraahiimii dehaay, ‘Baabu Ibraahiim, arhamaaheeb! Lꞌaasir anii dehaay diigwata! Tugiibalaaytooh yameeb daasiit, umiidalaabu balꞌasi, ani toon tunꞌeetiib akra gwirhaayeeb eefi.’ idi.

25 Laakiin Ibraahiim igwibi, ‘Wꞌooruun, baruuk tuduniyaatiib tidaayiinayteek tiyhaneet toona shꞌaa. Lꞌaasir aree beenhoob amagnayt iyhi. Laakiin amsi baruuh daayiib eefee, aree baruuk lhamtiniya. 26 Aree kastooh toon toonaati geeb, hininwa bareekwa win deela ibitkeen daamaabi. Aflaay tooysii bareekna beeti giigtiib yhariw baliin kaꞌadgiriyaana, tari beentooysii hinin beeti whasamti gaal han kaꞌadgiriya.’ idi.

27 Malya uutak ugaba, ‘Baab, aflaay winneet hook aharriiw, Lꞌaasir baabiyu oogawii dehaay diigwata! 28 Ani ay sana abari. Barooh bareeh beeti diigwata, winneet sooyiiniyeet toonaatu, aflaay baraah han oon wꞌadaabi mhiin beeti biiyꞌayneet toonaati.’ idi.

29 Ibraahiim igwibi, ‘Isanaayaak Muusaabwa inabiya eerawwa ibariin. Bareeh baꞌisniikarna.’ idi.

30 Malya uutak ugaba, ‘Een kiikeen, Baabu Ibraahiim! Tak gaal oodehay wꞌayaanaay yakiit bareeh eebiyeek, baraah Ukwaasanaay dehaay itꞌigir iyadna.’ idi.

31 Ibraahiim bariiyooh dehaay, ‘Baraah Muusaabwa inabiyaawwa biisinaakiirneek, aya tak gaal yakiit eebiyeek han, kiisinaakirna.’ idi." Yasuuꞌa idi.