1 Beenaay harꞌii Wꞌankwana asarama tamuunwa malu daawwa warib yhayid, maloob maloob ikwaasiit diigwatiya. Kasteeh baruuh iibi iideet timadiinaawwa imhiinanwa beeti suurooh diigwatiya. 2 Yasuuꞌa bareeyooh dehaay, "Uuwaak gwidaabu, laakiin ishagaamana shalika. Toon toonaatii dehaay uwaaki Ankwana raataana, uwaakiit dirꞌaatooh shagaamanaab dehaay diigwatiiniyeet toona raataana. 3 Difna! Ikarayi bitik fadag yhooyeet afandiig hookna. 4 Shantaat baayaksaana! Kiis baayaksaana! Gidhꞌaat baayaksaana! Aree usalaliib tak gaal han baashoobaana!

5 Gaw shuumteenihoob, hankaab ‘Oon oogaw umꞌasig geeb badaayi.’ diina! 6 Umꞌasig areeyiini tak beentooy timeerneek, umꞌasguukna bariiyooh kehii daayiini. Bak biikaayeek, umꞌasguukna dehookna itꞌigir indi. 7 Been ugawiib fiinaana! Baraah iyawneetookna toona tamaana aree gwꞌaana. Tꞌibariineetii hooy tamteena gwꞌiteena! Ushagaamana ukiraayooh astehaliini. Gaw gaalnaay weer beeti baahantaayaana!

8 Madiinaat shuumteenihoob, uudehay bareekna agbileeneek, toona suurookna daasamtiniit tamaana! 9 Oodehay eelhaab beentooy eefeen mheelaana aree bareeh sooyaana, ‘Ukwaasanaayt tehadꞌaayi dawiltooknaati.’ diina! 10 Laakiin madiinaat shuumteenihoob, uudehay bareekna biiꞌagbilayneek, isalalaayeeb firꞌanaat, 11 ‘Tumadiinaatiyookna falfuut hineet tigidhꞌaateeb eefeeb han kehookna nifarꞌa. Laakiin baraakna Ukwaasanaayt tehadꞌaayi dawiltookna tikatiyeet toona kanna!’ diina! 12 Oontꞌa andi hookna, whukwimiit tooyin Ukwaasana beet tumadiinaatiika Sadoom arhamiinikaab iikti tindi." Yasuuꞌa idi.

13 Malyaab Yasuuꞌa "Tidhikwii yaa Koorasiin! Tidhikwii yaa Beetsayda! Bateeyookna ikeent timꞌuujisa, Tiirooswa Siidooneebwa akaat iiktiineek, udehayuuhna shꞌiika tuubiina. Baraah shiwaali halak iitkwiina aree igirmaayeehna kehii nꞌeetihaash geediin. 14 Whukwimiit tooyin, Ukwaasana bateesookka Tiirooswa Siidooneeb oodehay arhamiinikaab iikti indi. 15 Aree batuuk Kafarnaahuum! Teebri beeti yakami tindii? Abadan, batuuk eedhoom beeti hoogi tindii." idi.

16 Yasuuꞌa ikwiriyaatayeeh dehaay, "Bareeyeekna ibhali eemsiiw been, aniib ibhali han eemsiiw. Bareeyeekna ibhali baamaasiiw been, aniib ibhali han kiimaasiw. Aniib ibhali baamaasiiw uutak, aneeb diigwataanaay ibhali han kiimaasiw." idi.

17 Idiigwatkina yꞌasarama tamuunwa imalu afirhaa yꞌagarniit, "Wꞌankwanaay! Bariiyook oosmii aajin han isnaakirna hoon." idiin.

18 Yasuuꞌa igwibi, "Oobliis tibreetee utalawiit dhibee rhan. 19 Ikwakwaraawwa italꞌanooyaawwa haay eetteeni akrir ahii hookna, masi kasseeh yꞌashu haay tigaribneeb yꞌakrir ahii hookna. Naat han adaayi hookna kitdi. 20 Aajin isnaakirna hooknayt baaꞌafirhaana. Laakiin ismaayaakna tibreeteeb katabayt afirhaana!" idi.

21 Been oodoor Aashuuk Imugaddasa Yasuuꞌaab firhaat itibna. Yasuuꞌa "Baruuk teen teena ifagarandeewwa yꞌagriyaaneewwa tikwibisaayt, yꞌar idabalooyaayee dehaay lawsita akay, ahammiid hook, yaa Baaba, toobuutwa tibreeti Wꞌankwana.

22 Baabu naatka yhiiheeb. Wꞌoor aab ikatiyeeb ubaaba nuun gaal han kiikan. Ubaaba aree aab ikatiyeeb wꞌoor nuun gaal han kiikan. Laakiin wꞌoor ubaaba aab ikatiyeeb eeraw sootiib harriiw, aflaay baraah barooh iikan iyadna." idi Yasuuꞌa.

23 Yasuuꞌa ikwiriyaatayeeh dehaay nakamiyaayt tarootsamiya, "Baraakna rhiteeneet toona rheen tiliili baliit libaabiyaan. 24 Andi hookna, gwida nabiyaawwa gwida hadꞌaawwa beet baraakna rhiteeneet toona rhitiib yhariwna. Laakiin beet batooh rhaab kiikeen. Baraakna timaasiwneet toona iimsawneet yhariwna. Laakiin maaswaab kiikeen." idi.

25 Muusaay whaggi kooja gaal yakiyaayt, Yasuuꞌa naan indiyeeb iishbibee dehaay gaana raatiya. Baruuh "Seednaay! Umidhhan udaayim kwasaamaniyee dehaay ibakii naan adanꞌi?" idi.

26 Yasuuꞌa bariiyooh dehaay, "Ooktaabiib naan kataabtu? Baruuk aree een bareeh kak afhamtaa?" idi.

27 Uutak igwibi, "Uuktaab ‘Wꞌankwana Ukwaasanaayook kassooh uginꞌiisookwa, kassooh unfisiisookwa, kassooh utaadiisookwa, kassooh ugirmaayiisookwa areeya. Aree ushawwook ugarooyiitook areeya.’ indi." idi.

28 Yasuuꞌa ootakii dehaay, "Daayiib tigwibiya, teen teena sakaa! Aree ikwaar tindiya." idi.

29 Laakiin uutak baruuh hooy hadiidiyeet toona akteen miyaadiib, aflaay baruuh Yasuuꞌaab raatiya, "Aree aniib ushawaw aabu?" idi.

30 Yasuuꞌa bariiyooh dehaay igwibi: "Tak Algudusee Ariihaab beeti giigee, gwihara hooy daayaaniit tꞌiibriyi hooy isaalibna. Ithaabꞌaniit tooyat iidwilihoob, yꞌishni giigiyaan. 31 Beenhoob fagiiri been usalal ookna nꞌati saki. Uun ufagiiri ootak rhiyihoob, oodar ooraawii hasamiya. 32 Oontꞌa weer tak Laawiib oomhiin eeyaayt barooh rhiyihoob, uun han oodar ooraawii hasamiya. 33 Laakiin Saamiri iibaabee been ootaki mhiin eeya. Baruuh been ootak rhiyihoob, bariiyooh dehaay nꞌakwmanaaya. 34 Bariiyooh dehaay eeyaayt tꞌadilꞌiitooh dehaay yhakwir aree saliitwa haabwa kehii ifif. Malya ootak umeekooh isꞌamaayt fiinaniiti gaw haay ibi. Beentooy aree barooh daayiib iweer. 35 Oombꞌi ooraaw malu ashteeti diiti mhallaga mhaliyaayt tifiinaniiti gawi kina yhii. Malya baruuh, ‘Oon ootak daayiib weeraa! Aree bariiyooh dehaay gwidakaana kwansiyeek, ani atꞌagiirihoob ikwaas hook andi.’ idi." idi.

36 Yasuuꞌa ootakii dehaay, "Een bareeh imhayeeb, oon ootak igwihara isaalibneeb sidki shawwooh ikatiib keeyaab hiistiniya?" idi.

37 Whaggi kanaaniiga igwibi, "Ootak ubariiyooh dehaay nꞌakwmanaayaab ikati." idi.

Yasuuꞌa bariiyooh dehaay, "Difaat baruuh sakiyaneet toona tꞌiiteena sakaa!" idi.

38 Wꞌankwanaawwa ikwiriyaatayaahwa iibaabee gariyaat gaanaatii dehaay eeyaan. Beentooy Maarta iidneet takat barooh ugawiyooh tehadar. 39 Maarta kwaat Maryam iidneet tiibri. Maryam Wꞌankwanaay suurii tisꞌat ibhaliyeeh tisniikar. 40 Laakiin Maarta ishaga ishagaamami kassuuh dehaay guudiya. Batuuh Yasuuꞌii dehaay eetaayt raatta, "Wꞌankwanaay! Tukwaatu ushanhiib oodꞌu daayaniyi jillaay tꞌish hoosu giigta. Batooh teeshtiimeetu toona sooyaa!" tidi.

41 Wꞌankwana igwibi, "Maarta! Maarta! Batuuk tehasikii, gwidaanaatiib amgwarhaatuwii. 42 Laakiin ateharriwaana gaat teefi. Maryam hayiskaana waasta, beet tuuna batiisooh yakami kitdi." Yasuuꞌa idi.