1 Yint gaat Yasuuꞌa Ganeesaareeteeb iyami dar ingid. Uudehay Ukwaasanaay ibhali isniikarni jillaay barooh kwalala. 2 Yasuuꞌa iyami ginnaal yꞌaashoob aabki ishaab iiktiineet maloot falluuka rhiya. Baraah tishabakaateehna iishgwadhna. 3 Yasuuꞌa falluukaat gaat Siimooniit tiiktiinaati kehii ingadaayt, "Tufalluukaatook iyami ginnaalii diiseet suurbeeti gwishisha!" idi. Malya Yasuuꞌa tufalluukaatiib isꞌat oodehay allamiya.

4 Baruuh ibhaliyeeh faayisiyanihoob, Siimoonii dehaay, "Tufalluukaatook iyameet tehooy beeti gwishisha, aree tishabakaateekna iyameeb gidnaat aashoob aabikna!" idi.

5 Siimoon igwibi, "Wꞌankwanaay, oon oomhiin whawaad kassooh akraab shagaamna, aashooyaayt han abkaab kinki. Laakiin baruuk bak tindiyayt, tishabaka iigid andi." idi.

6 Baraah tishabakaateehna iyameeb igidnihoob, tishabakaataahna shatatamiyaaneeb hadiit gwida aashoob yꞌaabikna. 7 Aflaay baraah tufalluuka tooraawtiib iifiin yꞌaraweehna beeti ashshariyaaniit, yꞌeetiit bareeh eeshtiimneet toona hooy yhariwna. Aree baraah eeyaaniit, mhalliteehna tishabaka aayam miyaay yhiriwneeb hadiit winneet itibna.

8 Siimoon Bitrus toon toona rhiyanihoob, Yasuuꞌiib iragadaayi whii dhibiyaayt, "Wꞌankwanaayu, hoosu giiga! Ani amaag taku." idi. 9 Siimoon Bitruswa, yꞌaashoob aabki igeeb iifiin kassaahwa baliin yꞌaabkaab iiktiineet yꞌaashooyeet guudtiib winneet ajjabamiyaan. 10 Aree Yaaguubwa Yuuhanna Sabadi arwa, Siimooniib ishariikiiwwa han winneet ajjabamiyaan.

Malya Yasuuꞌa Siimoonii dehaay, "Baarakwiya! Amseenee fidnaab dehayi aabki iikti tindiya." idi. 11 Aflaay tifalluukaateehna iyami ginnaal beeti sookwiyaaniit, naatka ingadni idꞌiiniit barooh iramna.

12 Yasuuꞌa madiinaat gaanaatiib haayee, tak bhadh iibriib eeya. Uun uutak Yasuuꞌaab rhiyanihoob, ifiiree whaashi kehii dhibiyaayt, barooh inꞌal, "Wꞌankwanaay, sinhasaheeb, harriiweek baruuk sinhasooyti adgirtiniya." idi.

13 Yasuuꞌa wꞌayooh ibriraayt, ootaki kehii daasiyaayt, "Aharriiw, nhas akaa!" idi. Igidiyeesooh uubhadh ootakii giigiya aree baruuh inꞌir.

14 Malya Yasuuꞌa ootak waseeyaayt, "Toon toona tak han baasooya! Difaat ugarooyook ufagiiri rhisa. Tinꞌireet toona rhisitiniyi jillaay, iminhiseeyook dehaay been unabi Muusa sooyaab iiktiyeet tikaraama firꞌaa." idi.

15 Laakiin Yasuuꞌiib usakana winneet gwidakaana ibrar. Aflaay gwida dehay bariiyeeh ibhali isniikarni jillaaywa, tilhanayteesoohna mheelamiini jillaaywa eeyaan. 16 Laakiin Yasuuꞌa diimaab bareesooh giigiyaayt, mingaayama mhiin ibaayt siileeliya.

17 Yint gaat Yasuuꞌa oodehay allami. Ifariisiiwwa whaggi koojaawwa baliit Jaliilwa Yahuudaawwa Alguduseet tigariya kasteesoohwa yꞌaaba aree beentooy iistꞌana. Eelhaab mheeliyi jillaay Wꞌankwanaay yꞌakrir Yasuuꞌaab attiyeewiyaaba. 18 Daab gali amꞌadhdha tak madhamti kehii fiyakee haay eeyaan. Ootak oogaw haay shuumiit, Yasuuꞌii suurii daasiineet toona jarrabiyaan. 19 Laakiin dehayiit guudti ishuumti adgirat iribnihoob, ootak ugawi mooy haay reewiyaan. Malya baruuh tumadhamtiyooh kehii haayee tukaaktii nꞌati hoogisiyaaniit, oodehayi bitik Yasuuꞌi suurii daasiyaan.

20 Yasuuꞌa wꞌiimaanoohna rhiyanihoob, "Yaa takay! Tumaagtuuk afoomaati." idi.

21 Ifariisiiwwa whaggi koojaawwa aakna kwoontiib badooyaana, "Uun ukifuuri bhali hadiidiini aabu? Ukwaasana oodꞌooh baakaay, weer adgiriit tumaagnaay afooyiini aabu?" idiin.

22 Yasuuꞌa baraah naan iikwinneeb iktiin aree raatiya, "Iginꞌiyookna naanhooy teen teena teekwinna? 23 Naan laamakaatu: ‘Tumaagnaaytuuk afoomaati’ uumiyaad han ‘Yhaa! Asti gadaat, hiireera!’ uumiyaad? 24 Laakiin ani Wꞌaadami Oor tubuuti kehii tumaagnaay haay afooyaniyeet hadꞌaayi abari." idi. Malya baruuh ootak wꞌamꞌadhdhaanaay dehaay, "Asti gadaa! Tumadhamtook yaksaat ugawook bayaa, andi hook" idi. 25 Uutak igidiyeesooh bareeyooh suurii asti ingad. Toona tehooy bꞌaab iiktiyeet iyhaayt Ukwaasana hamdee ugawooh ibi. 26 Kassuuh uudehay ajjabamiyaaniit Ukwaasana yhamidna. Baraah winneet mirkwaay itabniit, "Oon amsi akraat mꞌuujisa rhina!" idiin.

27 Oonaay harꞌii, Yasuuꞌa ifirꞌa aree umaktabiyooh iistꞌa Laawi iidni tilbaat lakkatanaab rhiya. Yasuuꞌa ootakii dehaay, "Ramaheeb!" idi. 28 Laawi yakiyaayt, naatka ingad idꞌiit barooh iram.

29 Malya Laawi ugawiyooh Yasuuꞌii dehaay aduumaat idꞌi. Aree gwida tilbaat lakkatanaawwa, waribwa bareeyooh geeb tamiin. 30 Laakiin Ifariisiiwwa Whaggi koojaawwa yhaseeniit, Yasuuꞌiib ikwiriyaatayee dehaay ashkiimiyaaniit, "Itilbaat lakkatanaayi geebwa, tumaagnaay sakeen oodehayi geebwa naanhooy tamteena aree gwꞌiteena?" idiin.

31 Yasuuꞌa bareeyooh dehaay, "Uudehay wꞌakra hakiimii dehaay kiishinhana, eelhaab nuun. 32 Ani eeshboob waliikaniyee dehaay yꞌaab kaaki, laakiin timaagnay sakeen tuubsaniyi jillaay yꞌaabi." idi.

33 Baraah Yasuuꞌii dehaay, "Yuuhannaay kwiriyaataywa, Ifariisi kwiriyaataywa, gwidaat baaskiiteena aree siileeleen. Laakiin bariiyaak ikwiriyaatay tameena aree gwꞌeen." idiin.

34 Yasuuꞌa igwibi, "Idoobsana udooba bareeyooh geeb haayee baaskiiteena han? 35 Laakiin udooba bareesooh yakamiiniyeet yint gaat daayi tindi. Baliit tiyinaateeb baraah baaskiiti iyadna." idi.

36 Yasuuꞌa bareeyooh dehaay een eemtaal hadiidiya:

"Tak silhaayt gayi halakii firꞌatiit shꞌiiya halakiib kiihayid. Bak iwariyeek, whalak ugayi shatatamiini, aree whalak ugayiinaayt tusilhaay beeb ushꞌiiyaanaay kehii kitshiboob. 37 Aree aat gayiit hamiit aateeb infiif gaal han kiihaay. Bak iwariyeek, tiyꞌa tigayiit tehawat thawseena, tiyꞌa eetfiifna aree tehawat dayꞌamtini. 38 Laakiin tiyꞌa tigayiit ibakii gayiit hawattiib daameen. 39 Hamiit aat gwꞌiini tak tigayiit kiihariw, baruuh ‘Tehamiit daayikaata.’ indi." idi.