1 Yasuuꞌa itamna malu hiddaab waliikiyanihoob, bareeh kasseeh eejin haay iifarꞌaneetwa tilhanay haay mheeliini akrirwa hadꞌaayeetwa yhii. 2 Malya Ukwaasanaayt tehadꞌaayi sooyiini jillaaywa, eelhaab mheeliini jillaaywa bareeh diigwatiya. 3 Yasuuꞌa bareeyooh dehaay, "Tꞌiibaabtii dehaay naat han baayaksaana! Kwoolay baayaksaana! Shantaat baayaksaana! Hadhiib baayaksaana! Mhallagaab baayaksaana! Halakaayeet shawaayt baayaksaana! 4 Beet tumadiinaatii giigteeneeb ookiik shuumteeni gawiibka fiinaana. 5 Uudehay bareekna eeribneek, bareetooh tumadiinaatii giigteenihoob, iragadaayeesookna ifalfuut nifishna. Beet tuuna bareeyooh kehii badehaat tikati." idi. 6 Aflaay ikwiriyaatay gariyaat gaanaatii weet beeti ibeen. Usakana udaayiib oodehay sooyiina aree kasseeh imhiinan oodehay mheeliin.

7 Oontꞌa Heeroodis whaakim toona tutikeet kastooh imaasiw. Aree baruuh naat igam. Dehay gali, "Yuuhanna tuyatii yakiya." iidna, 8 wari, "Unabi Eelya lawaab ikati." iidna. Wari masi, "Inabiya ishꞌiiyaayee gaal tuyatii idhhan." iidna. 9 Laakiin Heeroodis, "Yuuhannaab ani tꞌala akitꞌa, teen teena hooy eemsiiweeb uun aabu?" idi. Aree winneet bariiyooh irhiti yhariw.

10 Ilinguumiya yꞌagarnihoob, toona tꞌidꞌiineet Yasuuꞌaab sooyaan. Malya baruuh bareeh geebooh iyhi. Aree baraah aakna "Beetsaydaab" iidneet madiina beeti giigiyaan. 11 Laakiin uudehay beet toona ikannihoob, barooh iramna. Baruuh bareeh yꞌashish aree Ukwaasanaayt tehadꞌaayeetiib dehaay hadiidiya. Baliib oomheel yhiriw han mheeliya.

12 Tehimni tidwilihoob, itamna malu Yasuuꞌii dehaay eeyaaniit, "Hinin mingaayama mhiiniib neefi akay, oodehay igwidaab mꞌariitwa fiinaniiti mhiinwa imeerni jillaay tigariya yhadabeeb eefeentwa tidirꞌaawwa beeti giigsa." idiin.

13 Yasuuꞌa bareeyooh dehaay, "Baraakna bareeh tameeneet mꞌari hiina." idi.

Baraah igwibiina, "Ay hadhiiwwa, malu aashoowwa eebhat nibari. Oosuug dehaay giigiit, kassooh oodehayii dehaay mꞌariit niidlib bindiyeek!" idiin. 14 Been oomhiin ay alfa da iifiin.

Laakiin Yasuuꞌa ikwiriyaatayeeh dehaay, "Oodehay ay tamuun yꞌeen jamꞌaabka kwaasnaat soosꞌana." idi. 15 Ikwiriyaatay beet toona sakiyaana, aree kasseeh isoosꞌana. 16 Yasuuꞌa yhadhi yꞌaywa, yꞌaashu imaloowwa yakisiyaayt teebri ishbib. Yhadhi baarakiyaayt irfit. Malya bareeh ikwiriyaatay yhiit, oodehayii dehaay suurseeneet toona isehariw. 17 Kassaah uudehay hooy tamiyaaniit gabiyaan. Malya ikwiriyaatay ugaafii tamna malu biili itibniit yakisiyaan.

18 Yasuuꞌa oodꞌooh siileeliyihoob, ikwiriyaatay bariiyooh geeb iifiin. Yasuuꞌa bareeh raatiya, "Uudehay aniib naan hadiideen?" idi.

19 Ikwiriyaatay igwibiina, "Uudehay gwadi, Yuuhannaab Umoosana iyadna hook. Wari Eelyaab iyadna hook. Masi wari, inabiya ishꞌiiyaayee gaal tuyatii dhhanaab ikati iyadna hook." idiin.

20 Yasuuꞌa raatiya, "Baraakna aree kak tiyadna? Ani aabu tiyadna?" idi.

Bitrus igwibi, "Baruuk Ukwaasanaay Umasiihwa." idi.

21 Yasuuꞌa bareeh toon batooh gaal han biisooyayneet toona hooy yhariw.

22 Yasuuꞌa "Wꞌaadami Oor ibakii winneet gwidaana lhamiini. Aree ibakii yꞌeegrimaawwa, ifagiiriya isuurkinaawwa, whaggi koojaawwa barooh eeribna. Baruuh ibakii itoodiir, aree tooyin tumhaya dhhantiit yakiini." idi.

23 Malya Yasuuꞌa kassooh oodehayii dehaay, "Gaal aniit toormaam harriiweek, baruuh ibakii ugarooyooh ankiriini aree bꞌeebka usaliibooh yaksiini, malya eetriimheeb. 24 Umidhhanooh dibuuy harriiwka, barooh itehisir indi. Laakiin anii jillaay unfisooh itehasiirka, barooh idaab indi. 25 Wꞌaadami tuduniya kastooh marriyeek, laakiin unfisooh itehasiireek tari kwidhsiiniyeek naan rayiimiini? 26 Gaal aneebwa ibhaliyeesoowwa sankwꞌeek, Wꞌaadami Oor han umatuuniyoohwa Ubaabaay matuuniibwa, imalak imugaddasaayi matuuniibwa yꞌeeniyihoob, been bariisooh iisikwꞌa indi. 27 Oosdik andi hookna, een tooy ingadiin oodehayii gali, Ukwaasanaayt tehadꞌaayi rheeneeb ookiik iiyyi kiidiin." idi.

28 Yasuuꞌa een hadiidiyaayt harꞌii asimhayt yina eetiit middaatiib, baruuh Bitruswa, Yuuhannaawwa, Yaaguubwa iyhaayt, siileeliyee dehaay oorba reewiya. 29 Siileelee ifiiraah weet hayꞌa ikeen. Yhalakaayaah utalaw tꞌiiteeb eeraab ikeen. 30 Laakiin Yasuuꞌaab malu da infiridna. Aan baraah Muusaabwa Eelyaawwa iiktiin. 31 Baraah daawriit hayꞌaatii lawiyaan. Yasuuꞌi geeb hadiidiyaan. Baraah bariituuh tooyat Alguduseeb iikti tiidnaatiib hadiidiyaan. 32 Bitruswa yꞌarawaahwa akraat nꞌari hooy daata. Laakiin baraah daayiib ibꞌarnihoob, Yasuuꞌiib umatuunwa bariiyooh geeb ingid eenda imaloowwa rhiyaan. 33 Aan aanda imalu Yasuuꞌii giigiineeb oodoor, Bitrus bariiyooh dehaay, "Seednaay! Oon oomhiin daanayeet tuuna daayiit kitti han? Mhay alleeka niidꞌir, gaal bariiyook dehaay, gaal Muusaay dehaay, gaal Eelyaay dehaay." idi. (Baruuh naan hadiidiyeeb kiikan.)

34 Baruuh bhaliiyee, bꞌaluuk eeyaayt bareeh kasseeh ikwibis. Ikwiriyaatay ibꞌaluuk bareeh ikwibisi door irkwiin. 35 Ibꞌaluukii hiss eeya, "Uun baruuh wꞌooru ani waasaab akatiyeebu, barooh sinaakirna!" idi. 36 Uun whiss hadiidiyanihoob, ikwiriyaatay Yasuuꞌaab oodꞌooh haayee imriin. Ikwiriyaatay beet toona aakna ikwibisna. Beenhoob beet toona turihiyaaneet gaal han sooyaab kiikeen.

37 Oombꞌi ooraaw baraah oorbaay igidehanihoob, gwida dehay barooh yꞌashishna. 38 Oodehayii tak gaal waliikiyaayt, "Seednaay! Winneet hook aharriiw, uun baruuh gaalꞌoor aniibu. Barooh shibiba! 39 Barooh jin hooy shuumaaba, aree baruuh gaalhoob aadhiini. Uuyaf hibibt eettiibeeb hadiit aajin barooh iragisna. Door han barooh baalhasi kiiꞌish. 40 Ikwiriyaatayeek eejin ifirꞌaneet toona anꞌal, laakiin baraah adgiraab kiikeen." idi.

41 Yasuuꞌa "Yaa uutaas wꞌiimaan baabariin yꞌamag, ani naa door hadiit geebookna daayani? Naa door hadiit dehookna asbirani? Yhaa! Wꞌoorook tooy haay mꞌaa!" idi.

42 Been oodoor wꞌoor yꞌee, aajin barooh whaashi kehii dhibisiyaaniit irgisna. Laakiin Yasuuꞌa eejin idnin, wꞌoor isinꞌiraayt ubaaba yhii. 43 Kassaah uudehay Ukwaasanaay yꞌakrireeb winneet ajjabamiin.

Uudehay Yasuuꞌa sakiyeet kasteeh tinaateeb ajjabamee, Yasuuꞌa ikwiriyaatayeeh dehaay, 44 "Ani andiyeetookna toona daayiib sinaakirna: Wꞌaadami Oor dehayi ayeeb nuunami indi." idi. 45 Laakiin ikwiriyaatay tuuna naan tiiktiyeeb afhamaab kiikeen. Tuun batuuh bareesooh kwabaastu, aflaay beet toona baraah afhamaab kiikeen. Aree beet batooh barooh raatiineet toona irkwiin.

46 Ikwiriyaatay bareesooh aaw winkaab iiktiyeeb imgwassaarna. 47 Yasuuꞌa baraah iikwinneet toona iktiin. Dabalu oor udaraagooh isingad. 48 Malya baruuh bareeyooh dehaay, "Oon wꞌoor aniib oosmii agbiliiniib, aneeb han agbiliiniheeb. Aneeb agbiliiniib, aneeb diigwatiyaab han agbiliini. Oon usabbii, bareesookna uudiskaab hookna oowinkaabi." idi.

49 Yuuhanna Yasuuꞌii dehaay, "Seednaay! Oosmiisook eejin iifirꞌa tak rhina. Laakiin baruuh hinee gaal kiikuuyt barooh nhabi." idi.

50 Yasuuꞌa bareeyooh dehaay, "Barooh baahabiina! Bareekna baamoomiigka geebookna daayiini." idi.

51 Baruuh teebri beeti hooy yakamiyeeb uudoor idwileet midda, Yasuuꞌa Algudus beeti giig niyaamiya. 52 Yasuuꞌa gaw hooy naayyeeb dehaay isuumirni jillaay Saamiri dhiweet gariya beeti suurooh diigwatkinaab iifdig. 53 Laakiin baruuh Algudus marii giigiyi sabbii, beentooy uudehay barooh ashshaab kiikeen. 54 Ikwiriyaatay Yaaguubwa Yuuhannaawwa toon toona rhiyaanihoob, "Wꞌankwanaay! Bareeh kwidhsiti jillaay Ukwaasana tibreetee nꞌeet nꞌati fandiigeet toona raattiib hoon harriiwa han?" idiin. 55 Laakiin Yasuuꞌa bareeyooh nakamiyaayt idaanin, 56 aree baruuh, "Wꞌaadami Oor oodehay danbiyee dehaay yꞌaabu nuun, oodehay kwidhsiiniyee dehaay yꞌaab kiiki." idi. Malya baraah weet gariya beeti giigiyaan.

57 Baraah masi usalaliib sakee, tak gaal Yasuuꞌii dehaay, "Yaa Wꞌankwanaay! Teebiyi mhiinka beeti iitram hook andi." idi.

58 Yasuuꞌa igwibi, "Tibꞌashu deeb ibariina, aakilay tibreeteeb dhaabeen gawaab ibariin. Laakiin Wꞌaadami Oor ugirmaayooh hooy shuumsiiniyi mhiin kiibari." idi.

59 Yasuuꞌa tak weernaay dehaay, "Ramaheeb!" idi.

Uutak Yasuuꞌii dehaay, "Wꞌankwanaay! Hankaab baabu anbiisee dehaay giigsaaheeb." idi.

60 Laakiin Yasuuꞌa bariiyooh dehaay, "Yꞌaya udehayoohna yꞌayaab aakna baꞌiibisna. Laakiin baruuk giigaat Ukwaasanaayt tehadꞌaayi oodehay sooyaa!" idi.

61 Tak weer han Yasuuꞌii dehaay, "Wꞌankwanaay! Ani iitram hook andi. Laakiin ani dhiwaayi salaamiib diyat yꞌani." idi.

62 Yasuuꞌa "Wꞌayooh aduuyiib daasiit, harꞌa shanbiib uutak Ukwaasanaayt tehadꞌaayeeti shagaamtiib takweet kiibari." idi.