1 Iroomaani Gaysar Tiibaaryoos hadꞌaab iiktiyeekka whawil utamna ayyaay, Boontiyus Biilaatoos Yahuudaay haakim iikti. Heeroodis aree Jaliil yhakim, aree usanuuh Fiilibus Ituuriyaawwa Tiraakuunitooswa iidni hash yhakim. Liisaaniyaas aree Abiileena iidni haash yhakim.

2 Hannaanwa Kayaafaaswa ifagiiriyaayi suurkina iiktiini door, Ukwaasanaay ibhali Yuuhannaab Sakariyaay wꞌoorii dehaay umingaayiib eeyaan. 3 Beenhoob baruuh kasseeh Urduni kwayaay iifiin yhash ibi. Baruuh oodehayii dehaay, "Ukwaasanaay dehaay tuubaana aree atoomaasna! Malya idanuubaakna afoomi iyadna. 4 Unabi Isyaasiib uktaabiib kataabt toonaatiit:

‘Umingaayiib waliikiini hiss gaal eefi,

Wꞌankwanaay dehaay usalal soomirna!

Tilagi fadhadht dehaay kwaasna!

5 Kastaah taarꞌu ibakii itoobiisneet toonaatu,

kassaah aarbaawwa ikanbilwa eetyiimneet toonaati.

Isalala yhalag itfadhiidhneet toonaatu,

tilagi tishingiraat ilamisneet toonaati.

6 Aree Kassuuh uudehay Ukwaasanaay umidhhan rhi iyadna.’ indi." idi.

7 Yuuhanna bariiyooh atoomsooytii dehaay ifrꞌa oodehay igwidaanaay dehaay, "Yaa ikwakwaraayi ar, bareek beeti sakeen igadabee eedhab aaw sooya hookna? 8 Tuubaana firaay lawsaana! Aree igarooyeekna dehaay, ‘Ibraahiim baaboon akay nibari.’ tiyadneeb baahiisaana. Oosdik andi hookna, Ukwaasana een yꞌaweeyee Ibraahiimi dehaay ar yaksitiib adgiriini. 9 Uufaas whindi gadami kehii suur akay daasamiya. Whindi daayiit samara haay baayꞌay, katꞌamiit nꞌeetiib ituugid indi." idi.

10 Uudehay barooh raatiyaana, "Aflaay, kak saknay?" idiin.

11 Yuuhanna igwibi, "Uutak malu halaka ibari, ibaabariib whalakooh oongaal baꞌiyaaw! Mꞌariit ibari, ibaabariib baꞌiyaaw!" idi.

12 Itilbaat lakkatana han itoomisnee dehaay eeyaan. Baraah raatiyaana, "Seedna, hinin kak saknay?" idiin.

13 Baruuh bareeyooh dehaay, "Titilba dehookna daamaat nuun gwidakaana baaꞌahaana." idi.

14 Malya kajar gali barooh raatiyaana, "Aree hinin kak saknay?" idiin.

Yuuhanna igwibi, "Oodehay akruurii mhallagaab hooy baaꞌahaana! Tari gwisree baaꞌatehimaana! Imhallaga ititkwasiineeb haay ganaamaana!" idi.

15 Beenhoob uudehay Umasiihiib wꞌaay sꞌayaamiina, aree baraah kassaah igarooyeehna sakanaayiina, "Yuuhanna Umasiih akat yꞌiini han?" iidna. 16 Yuuhanna oodehay kassiyooh dehaay, "Ani iyamee anmiis hookna. Laakiin anii harꞌii yꞌiini, aniika akrakaabi. Ani tigidhꞌaateeh afandiigeet toona han kaꞌastehalan. Baruuh Eeshuuk Imugaddasaayeewwa nꞌeetiiwwa iimis hookna indi. 17 Uun baruuh girbaalooh yaksaabu, wharru daayiib isinhis indi. Igamhooh ugeesaay daasi indi, wꞌagga aree baayaayt nꞌeetii iiliw indi." idi. 18 Yuuhanna oodehay usakana udaayiib sooyi, aree gwida wari salalaayee bareeyooh dehaay bhaliiyi.

19 Laakiin Yuuhanna whaakim Heeroodis idaanin. Baruuh bariiyooh dehaay, "Usaniitook takat Heeroodiyaas tiniineet tuuna shingiraanaati." idi. Yuuhanna masi Heeroodis gwidaat maagnay warit han sakaab iiktiyeet toona sooya. 20 Malya Heeroodis Yuuhannaab usijniib idꞌiit, tumaagnaaytooh tusuureet gwidakaat maagnaay hooy ishaaw.

21 Kassuuh uudehay itoomaasnihoob, Yasuuꞌa han itoomaas. Baruuh siileelee aree taabri ifdagna. 22 Aashuuk Imugaddasa kwibheeriit hayꞌaatii bariiyooh kehii tikwiyaan. Tibreetee hiss eeyaayt: "Wꞌooru winneet wꞌareeyaniyeeb barookwa. Ani winneet hook madhaadhu." idi.

23 Yasuuꞌa wꞌallamti badooyanihoob, wꞌimruuh mhay tamuun hawla iikti. Aflaay uudehay baruuh

Yuusif Haali oor iiktiyeeb hiisiyaan. 24 Haali Mataatiib, Mataat Laawiib, Laawi Malkiib, Malki Yanaayiib, Yanaa Yuusifiib, Yuusif Mataatayaasiib, 25 Mataatayaas Aamuusiib, Aamuus Naahuumiib, Naahuum Hasliib, Hasli Nagaayiib, Nagaay Maaꞌaatiib, 26 Maaꞌaat Mataatayaasiib, Mataatayaas Shimꞌiib, Shimꞌi Yoosikiib, Yoosik Yoodaayiib, Yooda Yuuhannaayiib, 27 Yuuhanna Reesaayiib, Reesa Saruubaabiliib, Saruubaabil Shaꞌaltiiꞌeeliib, Shaalaatyaal Neeriib, Neeri Malkiib, 28 Malki Addiiyiib, Addi Koosaamiib, Koosaam Ilmadaamiib, Ilmadaam Eeriib, 29 Eer Jooshiwaayiib, Jooshiwa Alꞌaasariib, Alꞌaasar Yooriimiib, Yooriim Mataatiib, Mataat Laawiib, Laawi Shimꞌooniib, 30 Shimꞌoon Yahuudaayiib, Yahuuda Yuusifiib, Yuusif Yoonaamiib, Yoonaam Alyaagiimiib, Alyaagiim Malyaayiib, 31 Malya Minnaaniib, Minnaan Mataataayiib, Mataata Naataaniib, Naataan Daawidiib, 32 Daawid Yassiib, Yassi Oobeediib, Oobeed Booꞌaasiib, Booꞌaas Salmooniib, Salmoon Naahshuuniib, 33 Naahshuun Amiinadaabiib, Amiinadaab Admiib, Admi Raamiib, Raam Hasruuniib, Hasruun Faarasiib, Faaras Yahuudaayiib, 34 Yahuuda Yaaguubiib, Yaaguub Isehaagiib, Isehaag Ibraahiimiib, Ibraahiim Taaraahiib, Taaraah Naahuuriib, Naahuur Saruukiib, 35 Saruuk Raaꞌuuyiib, Raaꞌuu Faalikiib, Faalik Aabiriib, Aabir Shaalahiib, 36 Shaalah Geenaaniib, Geenaan Arfakshaadiib, Arfakshaad Saamiib, Saam Noohiib, Nooh Laamikiib, Laamik Mitooshaalihiib, 37 Mitooshaalih Hanookhiib, Eenook Yaaridiib, Yaarid Maahaalaalꞌiiliib, Maahaalaalꞌiil Geenaaniib, 38 Geenaan Anooshiib, Anoosh Sheetiib, Sheet Aadamiib,

Aadam Ukwaasanaay ooru.