1 Baliit tiyinaateeb, Gaysar Agustus gaanuun hassiya, been Iroomaaniit Imbiraatooriyaayti haashiib kassooh oodehay idheegwneet toona sooya. 2 Been oodehayi dhigwuuy wꞌawwali Kiiriiniyoos Suuriyaay haakim iiktiyeeb udamaaniib iikti. 3 Uudehay gaalka tumadiinaatooh tuknaatiib itkitibni jillaay giigiyaan.

4 Aflaay Yuusif han Daawidi dhiwaayiib iiktiyi sabbii, Jaliileeb whaashiib tiifiit Naasiraab iidneet tumadiinaatii giigiyaayt, Yahuudaay whaashiib tiifiit Daawidiit tumadiina Beetlaham ibi. 5 Baruuh Maryami geeb itkitibi jillaay beentooy ibi. Maryam bariiyooh dehaay daasamaatu aree nakwalaayti. 6 Baraah Beetlahameeb haayee, ufiraayuuh door eeya. 7 Yꞌamnaayi gawiib mhiin kiihaay akay, batuuh wꞌoorooh usuurkina tifriit, halakiib tikwibis aree ureewiit daatiib bꞌasta.

8 Been oomhiin tidirꞌa tidawilnaateeb tꞌanooteehna iishkwiin anooteega iifiin. Baraah whawaad tꞌanooteehna iigwꞌadna. 9 Wꞌankwanaay umalak bareeyooh dehaay lawiya. Wꞌankwanaay umatuun bareeyooh kwayaay talawiya. Aree baraah winneet irkwiin. 10 Laakiin umalak bareeyooh dehaay, "Baarakwiina! Uudehay kassaah winneet haay afirheeni daayi sakana iyaaw hookna andi. 11 Amsi Daawidiit tumadiinaatiib, ishidhhiin dehookna faraayi. Oon barooh ‘Umasiih Wꞌankwana’ iyadna. 12 Tuun batuuh alaamaat dehookna iikti tindi: halakiib kwabaas nisrik reewiit daatiib bꞌiiniib timeerna." idi.

13 Gaalhoob umalaki geeb gwida tibreeti malak lawiyaaniit, baraah kassaah Ukwaasana yhamidna.

14 Baraah "Umatuun Ukwaasana teebri titageegaateeb eefeenaay baꞌiikti,

aree umꞌasig tubuuti kehii eefeen baliib barooh afirhiseen udehayiib baꞌiikti." idiin.

15 Imalak bareeh yꞌishniit teebri beeti yꞌagarnihoob, yꞌanooteega taktakee dehaay, "Beetlaham beeti niidif, aree beet toona tutikeet Wꞌankwana sooyaneetoon niishbib." idiin.

16 Aflaay baraah ashshigee eeyaaniit Maryamwa, Yuusifwa, unisrik ureewiit daatiib bꞌiibwa rhiyaan. 17 Barooh rhiyaanihoob, umalak bareeh sooyaneet toona bareeyooh dehaay hadiidiyaan. 18 Aree baliin beet toona imaasiw kassaah yꞌanooteega bareeh sooyaaneet toonaatiib ajjabamiyaan. 19 Laakiin Maryam teen teena kasteeh uginꞌiyooh tidꞌiit bateeyooh kwoonta. 20 Yꞌanooteega umalak sooyaneet toonaatiit, kasteeh teena tirhiyaaneetwa tꞌimaasiwneetiiwwa dehaay Ukwaasana hamdeewwa tageegseewwa yꞌagarna.

21 Tooyin tꞌasimhaatiib, bariiyooh ukwishuubi door eeyanihoob, baruuh Yasuuꞌaab itoosaam. Tuundi nikwaat baakaay umalak whankaay barooh simaab iiktiyeeb oosim itoosaam.

22 Wꞌateharamti door eeyanihoob, Muusaay whaggiib teefeet toonaatiit, Yuusifwa Maryamwa Wꞌankwanaay dehaay suursiini jillaay barooh Algudus haay ibeen. 23 Wꞌankwanaay whaggiib kataabt toonaatiit, oofraayiib isuurkina irabaab kassaah Wꞌankwanaay dehaay waasamiin. 24 Aree Wꞌankwanaay whaggiib attiyoodiyaat toona sakiini jillaay, baraah han maloot kwibheeri tari maloot dabalooyaat hammamiyay karaamaat iifirꞌanee dehaay giigiyaan.

25 Beenhoob Simꞌoon iidni tak, Ukwaasana iriikw Alguduseeb iifi. Baruuh shibu taku aree Ukwaasana iriikw. Baruuh Israaꞌiil umidhhan timiireet toona yhigit aree Aashuuk Imugaddasa bariiyooh kehii iifiin. 26 Wꞌankwana Umasiih baarhi iiyyi biidiyeet toona Aashuuk Imugaddasa oon ootakii dehaay lawsaaba. 27 Aashuuk Imugaddasa hantaayisiyaaniit, baruuh udiini gawi hoosh ibi. Ifaru whag yhiriweet tꞌaada bariiyooh dehaay sakiini jillaay, wꞌoor Yasuuꞌaab udiini gaw beeti haay eeyaanihoob, 28 Siimoon barooh yꞌayeesooh yakisiyaayt, Ukwaasana yhamid, aree:

29 "Wꞌankwana Wꞌakra, baruuk waadiyaataneet toonaatiit,

oontꞌa ani ukishiyaayuuk asgaa ayaayi.

30 Aniib aagwꞌad umidhhanook rhiyaana,

31 beet toona baruuk kassooh oodehayi suurii tisoomira,

32 baruuh Ijintiili usalal rhisiini nuuru,

aree udehayook Israaꞌiil matuun dehaay haay yꞌiini." idi.

33 Wꞌoori baabaawwa tuundeewwa bariiyooh tittiyoodaayt toonaatiib ajjabamiyaan. 34 Malya Simꞌoon bareeh ideharaayt Maryamii dehaay, "Uun wꞌoor Israaꞌiileeb gwida dehay dhibsi indi aree gwidaab yaksi indi. Baruuh Ukwaasana diigwataab ikatiyeet toona rhistiniit alaama ikati, laakiin uudehay barooh eeribna. 35 Aflaay gwida dehayi ginꞌa eekwinneet tuuna lawi tindi. Aree batook han bꞌadhadh unfisook iikwit indi." idi.

36 Beentooy masi winneet eegrimt nabi Hannaab Fanuuꞌeeliit oot iidneet, Ashiiriit tugabiilaatii tiiktiit tiifi. Batuuh tidꞌareenaay harꞌii, asarama hawla utakiyooh geeb tikwiri. 37 Malya batuuh asimhay tamuunwa fadhig hawla tiiktiyeeb ookiik ibraatfaatkiit tiki. Batuuh Wꞌankwanaay oogaw door han hasamaat kitti. Laakiin whawaadwa oombꞌeewwa tꞌabid, baaskiittii aree siileelti. 38 Beet tumidda bareeyooh dehaay eetaayt, Ukwaasana tehamid. Algudusi fiduug yhigit kassooh oodehayii dehaay wꞌoori sakana hadiidta.

39 Yuusifwa Maryamwa kasteeh teena baliit Wꞌankwanaay whag yhiriweet idꞌiinihoob, baraah Jaliileeb tiifiit tumadiinaatoohna tookna Naasiraab beeti yꞌagarna. 40 Wꞌooruuhna iwin aree yꞌakir. Baruuh fagarandiit itab, aree Ukwaasanaayt tinꞌima bariiyooh kehii iifiin.

41 Wꞌoor ifarooyaah hawilka Whasamti wꞌiidii dehaay Algudus haay iibiin. 42 Yasuuꞌa tamna malu hawla iiktiyihoob, baraah diimaab sakiineet toonaatiit wꞌiidii dehaay insiin. 43 Wꞌiidiit yina ingadni harꞌii, ifarooyaah itꞌigirneet midda, wꞌoor Yasuuꞌa Alguduseeb harꞌa imhi. Laakiin baraah beet toona kanaab kiikeen. 44 Baruuh bareeh iitrameeb hiisee, baraah bꞌeeb iibaabiyaan. Malya baraah yꞌaydeehwa yꞌaraweeyoohna bitikwa barooh yhariwna. 45 Barooh inawnihoob, baraah bariiyooh harawaay Algudus beeti yꞌagarna. 46 Mhayt yinaati harꞌii barooh Wꞌankwanaay ugawi hooshiib imriina, ikoojaayi geeb sꞌeewwa bareeh sinaakireewwa naat raraateewwa imriin. 47 Uudehay kassaah barooh imaasiw baliin bariitooh tufhamaatiibwa bariiteeh tigwabiiteebwa ajjabamiyaan. 48 Ifarooyaah barooh rhiyaanihoob, baraah ajjabamiyaan. Tuundi bariiyooh dehaay, "Anaa wꞌooru! Naanhooy bak tiweera hoon? Baabuukwa aneebwa winneet nhariw hook, aree hasakaay daana." tidi.

49 Wꞌoor igwibi, "Naanhooy aneeb tehiriwnaheeb? Ani baabiyu ugawiib daayaniyeet toona kitkanna han?" idi.

50 Laakiin baruuh bareeyooh dehaay naan iideeb afhamaab kiikeen.

51 Malya Yasuuꞌa bareeyooh geeb Naasiraab beeti yꞌagar aree bareeh isnaakir. Laakiin bariituuh tuundi teen teena kasteeh uginꞌiyooh tidbi. 52 Yasuuꞌa ugarooywa tifagarandiiteewwa iwin. Ukwaasanaay rada rayiimiya aree oodehayi reer rayiimiya.