1 Oontꞌa Ufatiiri Hadhiyi iid, Whasamti Wꞌiid iidni iidwil, 2 aree ifagiiriya isuurkinaawwa, whaggi koojaawwa, oodehay iriikwni sabbii masi Yasuuꞌaab haay idiirni salal yhiriwna. 3 Malya Uubliis Yahuudaab, Wꞌiskaaryuuti iidneeb, shuumiya. Baruuh Yasuuꞌiib Ikwiriyaatay itamna malooyeeb gaal iikti. 4 Yahuuda ifagiiriya isuurkinaawwa, Ukwaasanaay ugawi gwꞌaadiigaayi daabtaawwa ibaayt, Yasuuꞌaab kak iidlib iideeb bareeh hadiidsamiya. 5 Baraah winneet afirhiyaaniit barooh mhallagaab iyiwnee dehaay taafagsamiyaan. 6 Baruuh agbiliya, aree uudehay biihaayi door, Yasuuꞌaab bareeh haay nuuniyeet fursa igwꞌad.

7 Malya Ufatiiri Hadhiyi iidi bꞌi eeya, aree been oombꞌi Ubaaskaay wꞌiidi argin hooy itehirid. 8 Aflaay Yasuuꞌa Bitruswa, Yuuhannaawwa diigwatiya, "Difnaat wꞌiidiit mꞌari tamnayee dehaay dehoon soomirna!" idi.

9 Barooh raatiyaana, "Naa mhiin dehook nisoomiireet harriiwa?" idiin.

10 Yasuuꞌa igwibi, "Algudus shuumteeni door, tak yami gidir itfayiik timeerna. Been baruuh shuumiiniyeeb oogaw beeti ramna. 11 Aree been oogawi kina beenaat, ‘Seedna raatiini hook: Ani ikwiriyaatayi geeb Whasamti Wꞌiidiit mꞌari hooy tami andiyeeb yꞌamnaayi gaw naad eefi? Indi hook.’ diina! 12 Baruuh oogawi mhakwal wint gurfa farrashamaat rhisi hookna indi. Been oomhiin soomirna!" idi.

13 Baraah idifna, aree Yasuuꞌa bareeh sooyaab iiktiyeet toonaatiit imriin. Aflaay baraah Whasamti Wꞌiidiit mꞌari beentooy isoomirna.

14 Beet tuusꞌa tikayihoob, Yasuuꞌa ilinguumiyaayi geeb tumꞌariitii dehaay isꞌa. 15 Aree Yasuuꞌa bareeyooh dehaay, "Ani oon Whasamti Wꞌiidiit mꞌari lhamaab baakaay geebookna tamiyeet winneet ahariw. 16 Ani andi hookna, Whasamti Wꞌiidiit mꞌari Ukwaasanaayt hadꞌaayeetiib tikatiyeeb ookiik, shaawti oonaay harꞌii batooh tami kaadi." idi.

17 Kaas iyhaayt harꞌii, Ukwaasana yhamid. Malya, "Oon ookaas ahaanaat amꞌadhdhaadhna. 18 Ani andi hookna, Ukwaasanaayt tehadꞌaayi eetniyeeb ookiik, shaawti oon ookaas gwꞌi kaadi." idi.

19 Aree hadhiib yakisiyaayt, Ukwaasana yhamid. Malya yhadhi ikitꞌaayt bareeh nuuniya, "Uun baruuh ugarooyu bareekna ittiyeewiibu. Toon toona aniit shꞌaniiteeb dꞌiina!" idi.

20 Oontꞌaaneet Yasuuꞌa oodraari harꞌii kaas iyhaayt, "Uun uukaas aniib ubooyiib eefeeb ugalad ugayiibu, been baruuh bareeyookna jillaay eetfiif. 21 Laakiin wꞌayi aneeb nuuni indiib, oontꞌa tumꞌariiti kehii geebu eefi. 22 Wꞌaadami Oor ibakii Ukwaasana indiyeet tehayꞌaatii iyaayi. Laakiin been uutak barooh nuuniiniib idhikw!" idi. 23 Ikwiriyaatay aaw bareesooh een saki indiyeeb taktak sakanaayaan.

24 Masi bareesooh aaw winkaab iiktiyeeb amgwasuura eebtik daaya. 25 Yasuuꞌa bareeyooh dehaay, "Ijintiili hadꞌa udehayoohna kehii akrir ibariina, aree yhaakma igarooyeehna ‘Oodehayi araw!’ waliikeen. 26 Laakiin baraakna bareeh tꞌiiteeb kitteena. Bareesookna uuwinkaab oodiskaab tꞌiiteeb ikatiyeet toonaatu, aree usuurkina ibakii ukhaddaamiit ikati. 27 Aaw winkaabu: Tumꞌariiti kehii sꞌaab han tari beeb wꞌakhdimiiniibu? Beeb tumꞌariiti kehii sꞌaab kiiki han? Laakiin ani bareeyookna geeb been ukhaddaamiit eefi. 28 Baraakna aniib igwirha kasseeh geebu hassitaana. 29 Aneeb Baabu haay hukwimiyeet hadꞌaayi yhiiyyeetu tunaatiit, bareekna han haay tehakimneet hadꞌaayi iyaaw hookna andi. 30 Aniit tehadꞌaayeetiib geebu gwꞌi tiyadna, aree geebu tami tiyadna. Aree Israaꞌiileet tigabiila titamna malu tehakimni jillaay, hadꞌaayeeti kwirsiyaayi kehii iistꞌa tiyadna." idi.

31 Yasuuꞌa, "Siimoon, Siimoon, sinaakiraheeb! Wharru ibittaay waasiiniib udirꞌaatkinaayt uubliis bareekna gaalka jarrabiyeet toona raatiya. 32 Laakiin Siimoon, ani wꞌiimaanuuk ankiiree dehaay siileelan. Anii dehaay titꞌagiirihoob, isanaayeek ibakii sꞌakira." idi.

33 Laakiin baruuh igwibi, "Wꞌankwanaay! Ani geebook oosjin shuumaniyee dehaaywa, geebook ayaayee dehaaywa amaaru." idi.

34 Yasuuꞌa, "Ani andi hook, Bitrus, lhayt karuumaab uujiik baakuukillaayi, baruuk mhay doora ittiwheeb tindiya, ‘kaakan hook.’ iyaadeheeb tindiya." idi.

35 Malya Yasuuꞌa ikwiriyaatayeeh raatiya, "Ani bareekna mhallagaayeet shanta anu, tari iibaabtiit shanta anu, tari gidhꞌaat anu giigsaneeyookna door, naat han tinawna?" idi.

Baraah "Kinki." idiin.

36 Yasuuꞌa bareeyooh dehaay, "Laakiin oontꞌa mhallagaayeet shanta tibariineek yaksaana. Masi aree iibaabtiit shanta tibariineek yaksaana. Bꞌadhadh baabariibka tusideeriyaaytooh dilibtiit bꞌadhadh dilibti iniineet toonaati. 37 Tuun tuuna iktabeeb kataabtu: ‘Baruuh maagtak ittiyoodi.’ diyaaba. Ani andi hookna, beet tuuna ibakii aniib tikatiyeet toonaati. Awooh, aniib kataabt tuuna willa sidik iikti tindi." idi.

38 Ikwiriyaatay, "Wꞌankwanaay! Tooy malu bꞌadhdha eefeen." idiin.

Yasuuꞌa igwibi, "Beet mhaati!" idi.

39 Yasuuꞌa diimaab sakiyeet toonaatiit Oorba Saytuun beeti giigiya, aree ikwiriyaatayaah han barooh iramna. 40 Beentooy iktimni door, Yasuuꞌa bareeyooh dehaay, "Jarrabamtiib bitdhibayni jillaay siileelaana!" idi. 41 Malya Yasuuꞌa awii gaadiit masaafa bareesooh isgiit, ignafaayt siileeliya, 42 "Baab! Harriiweek oon ookaas hoosu ahaa! Laakiin ani aharriiweet tuuna bitꞌakaay. Baruuk harriiweet tuuna batiikti." idi. 43 Tibreetee malak bariiyooh dehaay lawiya, aree barooh isꞌakir. 44 Yasuuꞌa winneet lhamiya, aree akraat siileel siileeliya. Aree bariiyuuh uuduuf whaashi kehii ubooyiit thakwanaaytiit thathakwiya.

45 Malya tusiileeltii yakiyaayt, ikwiriyaatay beeti yꞌagar. Bareeh gadabee gwooya, diwee imri. 46 Baruuh bareeyooh dehaay, "Naanhooy diwteena? Jarrabamtiib bitdhibayni jillaay yakaana, siileelaana!" idi.

47 Yasuuꞌa masi hadiidee gwida dehay eeyaan. Yahuuda iidni tak, itamna malooyeeb gaal iikti bareeh milhee eeya. Baruuh Yasuuꞌaab salaamti jillaay idwil. 48 Laakiin Yasuuꞌa barooh raatiya, "Yahuuda, baruuk tusalaam Wꞌaadami Oor haay tintiil han?" idi.

49 Ikwiriyaatay Yasuuꞌi geeb iifiin toona tꞌakaa tiid rhiyaanihoob, baraah "Wꞌankwanaay! Bꞌadhdhii kayasnay?" idiin. 50 Aree gaal bareesooh ufagiiri oowinnaay kishiya bꞌadhdhii ithꞌa, aree wꞌangwiil umaykwaab hooy ikitꞌa.

51 Yasuuꞌa igwibi, "Oontꞌa gadna!" idiit, ootaki angwiil shiishiyaayt isinꞌir.

52 Yasuuꞌa ifagiiriya isuurkinaawwa, Ukwaasanaay ugawi gwꞌaadiigaayi daabtaawwa, oodehayi eegrimaawwa, bariiyooh abuuki jillaay yꞌaab baliinee dehaay, "Naanhooy wꞌamaag takiit bꞌadhdhaawwa kwoolayaawwa yakistaaniit eetaanheeb? 53 Diimaab Ukwaasanaay gawiib geebookna iifi, aree bꞌeeb han ayeeb anii kehii daasaab kitteena. Laakiin tuuthibin tehankiimihoob, uun baruuh doorookna ikati." idi.

54 Malya Yasuuꞌaab yꞌabikniit fidnaab salooliyaana, aree ufagiiri oowinnaay gaw beeti haay giigiyaan. Bitrus han sagi mhiinii imooraam. 55 Laakiin baraah whooshiit hooyteeb nꞌeet ishidhhanniit hiddaab isꞌanihoob, Bitrus bareeyooh geeb isꞌa. 56 Oot kishiyaat barooh beentooy tunꞌeeti midragi kwayaay sꞌee rhita. Malya barooh daayiib tishibibaayt, "Uun uutak Yasuuꞌi geeb iifi." tidi.

57 Laakiin Bitrus itwi, "Yaa takatay! Ani oon ootak ookna kaakan." idi.

58 Shalikt middaati harꞌii tak weer barooh rhiyaayt, "Baruuk han bareesooh gaalwa." idi.

Laakiin Bitrus, "Yaa takay, ani kaaki!" idi.

59 Gaat saaꞌaati harꞌii tak weer akkadiya, "Uun baruuh sidik Yasuuꞌi geeb iifi. Baruuh han Jaliilee ikati." idi.

60 Bitrus "Yaa takay, baruuk naan tindiyeeb ani kaakan." idi. Baruuh masi hadiidee, uujiik kuukillaayi. 61 Wꞌankwana nakamiyaayt Bitrus beeti ishbib. Bitrus oon oodoor Wꞌankwana bariiyooh dehaay: "Lhayt fajir uujiik baakuukillaayi, mhay doora ittiwheeb tindiya." diyaab iiktiyeeb ibhali shꞌiya. 62 Barraab ifirꞌat winneet waawiya.

63 Yasuuꞌaab iigwꞌad aanda barooh haay kashiyaaniit ithabꞌana. 64 Baraah bariiyeeh eegwꞌad yhakwirniit raatiyaana, "Sirida! Aaw ithꞌa hook?" idiin. 65 Aree barooh weena gwidaanaatii neewiyaan.

66 Uumha mhiyihoob, oodehayi suurkinaayi majlis, kassaah ifagiiriya isuurkinaawwa whaggi koojaawwa immarraayna, aree Yasuuꞌaab bareeyooh suurii haay eeyaan. 67 Baraah Yasuuꞌii dehaay, "Sooyaa hoon! Baruuk Umasiihwa?" idiin.

Yasuuꞌa igwibi, "Een andiyuukna, baraakna aamaniheeb kitdiina, 68 aree ani raatiyuukna, baraakna kitgwibiina. 69 Laakiin oon amseenee, Wꞌaadami Oor Ukwaasana Wꞌalyaanaay umaygwadiib iistꞌa indi." idi.

70 Baraah kassaah raatiyaana, "Aflaay baruuk Ukwaasanaay oorwa?" idiin.

Yasuuꞌa "Daayiib tiyadna, ani barooh akati." idi.

71 Malya baraah, "Barooh ooknaay uyafii een nimaasiw, naanhooy wari badehi nhariw?" idiin.