1 Yasuuꞌa een ibhali kasseeh uudehay maaswee hadiidiyaayt faaysiyani harꞌii, baruuh Kafarnaahuum shuumiya. 2 Dheeshi daabit Roomaani, winneet areeyi kishiya iifi. Baruuh lhiyaayt tooyat idwil. 3 Uun udaabit, Yasuuꞌiib usakana imaasiwihoob, Yahuudi eegrima gwadib bariiyooh dehaay diigwatiya. Yasuuꞌa yꞌeetiit ukishiyaayooh mheeliyeet toona isehariw. 4 Baraah Yasuuꞌii dehaay eeyaanihoob, barooh winneet inꞌalna, "Uun uutak sidik tushamaamtook astehaliini. 5 Baruuh udehayoon areeyiini, aree udiini gawoon idꞌir." idiin. 6 Aflaay Yasuuꞌa bareeyooh geeb giigiya.

Baruuh ugawii sagiib kiiki. Udaabit yꞌaraweeh dehaay diigwatiyaayt, "Wꞌankwanaay, ugawu shuumtiniyeet toona kaꞌastehalanayt, ugarooyook baagallabaa! 7 Oon usabbii, ugarooyu barook haay anshiisheeb takwi hiiyyaab kaaki. Laakiin kalmaat diyaa, aree ukishiyaayu iinꞌir indi. 8 Ani uknaayu hadꞌaayeeti whii eefi taku, anii whii han kajar eefeen. Oon barooh, ‘Difaa!’ andiyeek, indiif. Aree been barooh, ‘Mꞌaa!’ andiyeek, yꞌiini. Ukishiyaayu dehaay, ‘Toon sakaa!’ andiyeek, beet toona sakiini." idi.

9 Yasuuꞌa een ibhali imaasiwihoob, bariiyooh winneet ajjabamiya. Oodehay harꞌii sakiinnaayee dehaay nakamiyaayt, baruuh "Ani andi hookna, Israaꞌiileeb han bak tꞌiiti win iimaan miraab kaaki." idi. 10 Malya aanda idiigwatamaab ugawii dehaay yꞌagarnihoob, ukishiya nꞌiraa imriin.

11 Tooyin tooraaw Yasuuꞌa Naayiin iidneet madiina ibi. Beenhoob ikwiriyaatayaahwa gwida dehaywa bariiyooh geeb giigiyaan. 12 Tumadiinaati dheefa iktimihoob, aya tak atfayaykee eeya. Uun baruuh tundeetii dehaay gaalalaayu, aree batuuh ibraatfaatkiiti. Gwida dehay tumadiinaatii batiiyooh geeb iifiin. 13 Wꞌankwana tutakat rhiyanihoob, batiiyooh dehaay nꞌakwmanaayaayt, "Biiwaawii!" idi.

14 Malya baruuh suur ibaayt, tukinaaja kehii tiifiyeeb oonꞌaal shiishiya. Oonꞌaal yaksaab aanda ingadna. Yasuuꞌa "Yhaa whankwil, yakaa! Andi hook." idi. 15 Wꞌoor wꞌaya asti isꞌa aree hadiidtiib badooya. Malya Yasuuꞌa wꞌoor toondi yhii.

16 Baraah akra mirkwaay itabniit Ukwaasana yhamidna. Baraah "Win nabi hoon lawiya. Ukwaasana udehayooh eeshtiimi jillaay yꞌaabi." idiin. 17 Uun Yasuuꞌiib usakana kastooh Yahuudaawwa, yhash oodar iifiinwa iktim.

18 Yuuhannaay ikwiriyaatay teen teena kasteeh barooh sooyaan. Yuuhanna bareesooh maloob waliikiyaayt, 19 bareeh Wꞌankwana raatiini jillaay diigwatiya, "Baruuk beeb uyꞌiiniibwa han? Hana weer sꞌayaamnayeet toonaatu?" idi.

20 Aanda Yasuuꞌii dehaay eeyaanihoob, baraah "Yuuhanna Umoosana barook raatnayi jillaay diigwatiya hoon, ‘Baruuk uyꞌiiniibwa han, hana weer sꞌayaamnayeet toonaatu?’ idi hook." idiin.

21 Beenhoob Yasuuꞌa gwida dehay lhaabwa, tilhanay iibriinwa, aajin abkaab iiktiineebwa mheeliya, aree gwida hamashaya rhisiya. 22 Aflaay Yasuuꞌa Yuuhannaay idiigwatkinaayee dehaay, "Difnaat, Yuuhannaab toona turhitaaneetwa, tutimaasiwneetwa sooyaana. Yhamashaya rheena, igaaraabaya hiireereena, oobhadh ibariin eenhasna, yꞌangwilaya eemsiiwna, yꞌaya eedhhanna, usakana udaayi imiskiinaayee dehaay bhaliimiya. 23 Libaabiyaan baliin aniib eetehak baabariin." idi.

24 Yuuhannaay idiigwatkina giigiyaani harꞌii, Yasuuꞌa oodehayii dehaay Yuuhannaayiib hadiidiya: "Umingaay tibeenihoob, naan rhitiib tehiriwna? Aggaab ubaraam nanfiyeeb rhaa miyaadiib tibeena han? 25 Bak biikaayeek, naan rhaa miyaadiib tibeena? Daawri halaka akwaay tak? Abadan, aanda alya halaka eetkwiinwa, igabaawwa, nafirnayteeb ikweerwa baliin siraayaateeb eefeen. 26 Laakiin naan rhaa miyaadiib giigtaana? Nabiib? Awooh, andi hookna, aree nabiika winkaabi. 27 Tuun batuuh uktaabiib kataabtu:

‘Ani udiigwatkinaayu suurook iifdig andi,

baruuh whankaay usalalook isuumir indi.’ diyaabi.

28 Ani andi hookna, Yuuhannaayiika winkaab taamꞌa firaat kiikeen. Laakiin Ukwaasanaayt hadꞌaayeetiib uudiska Yuuhannaayiika winkaabi." Yasuuꞌa idi.

29 Uudehay kassaah, itilbaat tamana han, een Yasuuꞌiib ibhali imaasiwnihoob, baraah Yuuhannaayiib yꞌayee atoomsaabayt, Ukwaasanaay usalal shiboot ikatiyeet toona ifidhadhna. 30 Laakiin Ifariisiiwwa, whaggi koojaawwa Ukwaasana bareeh iknaayee dehaay iibriyeet tehalaagaay iribna. Yuuhannaab atoomsaab kiikeen.

31 Yasuuꞌa "Oon udamaani dehay, aab asnadiir? Kak tꞌiiteeba? 32 Baraah usuugiib eestꞌi ar, aree gali eeraw waliikeen tꞌiiteeba:

‘Yhaana! Biilhooyt dehookna nithꞌa,

aree lagat tiribna.

Nawwaattiit kaft dehookna kafna,

aree waawat tiribna.’ iyadna.

33 Yuuhanna Umoosana mꞌariit tamaab baakaay, tari haab gwꞌaab baakaay eeya. Aree baraakna, ‘Oon jin hooy eefeen’ tiyadna. 34 Laakiin Wꞌaadami Oor tameewwa, gwꞌeewwa eeya, aree baraakna, ‘Uun tamana taku, haab gwꞌanaabu. Itilbaat tamanaawwa, baliib yꞌamag daawwa araweesamiini.’ tiyadna. 35 Laakiin tifagarandi kasseeh yꞌareesooh laween." idi.

36 Tak Fariisi Yasuuꞌii dehaay diraariit aduuma idꞌi. Aflaay Yasuuꞌa Ufariisi gaw shuumiyaayt, tumꞌariiti tamtii dehaay isꞌa. 37 Tumadiinaatiib amaagt takat tiifi. Tuun tutakat Yasuuꞌa Ufariisi gawiib mꞌariit tamiini miyaad timaasiwihoob, shakwiintiit karoora haay eeta. 38 Yasuuꞌii harꞌii iragadaayi geeb milootee tingad. Yasuuꞌiib iragada milootee mꞌasta. Malya iragada tehamooteesooh tiysis, iragada fꞌitaayt, shakwiint kehii tifif tidꞌi.

39 Barooh waliikaab Ufariisi toon toona rhiyanihoob, ugarooyooh dehaay, "Uun baruuh nabiib iiktiyeek, tutakat tubarooh tatehitniit naa takat tikatiyeeb iktiin! Batuuh amaagti." idi.

40 Yasuuꞌa bariiyooh dehaay igwibi, "Siimoon, naat iyaad hook andi." idi.

Siimoon "Diyaa, Seednaay!" idi.

41 Yasuuꞌa bariiyooh dehaay, "Dikwkwaani kina iifi. Baruuh malu da deen iishik. Oongaalnaay geeb ay shi diinaar iibri, ooraawi geeb ay tamuun diinaar iibri. 42 Laakiin baraah barooh haay ikwiisni mhallaga gaal han kiibari. Aflaay baruuh mhallee oodeen afooya. Oontꞌa een bareesooh naayuuh barooh winneet areeyiinikaabu?" idi.

43 Siimoon igwibi, "Uutak tooslif tugwidakaat afoomiyaab winneet areeyiinikaab hiisani." idi.

Yasuuꞌa "Tikana." idi.

44 Malya Yasuuꞌa tutakatii dehaay nakamiyaayt, Siimoonii dehaay, "Toon tootakat rhitniya? Ani ugawook shuuman, baruuk yam iragadaayi haay iishigwidheeb han hiiyyaayu kitta. Laakiin batuuh timilooteesooh iragadaayi mꞌastaayt, tehamooteesooh tiysis. 45 Baruuk aneeb gaalhoob han hoosu fꞌaab kitta. Laakiin tuun tutakat, oogaw shuumaneekka masi aniib iragadaayi fꞌatii door han gadaat kitti. 46 Baruuk ugirmaayu dehaay saliit han dꞌiyaab kitta. Laakiin batuuh aniib iragadaayi kehii shakwiint tifif tidꞌi. 47 Shaawti andi hook, batiituuh tuumaag tugwidaat afoomta, oon usabbii batuuh winneet areeta. Laakiin been shalikna afoomiiniib shalikna areeyiini." idi.

48 Malya Yasuuꞌa tutakatii dehaay, "Tumaagnaaytuuk afoomaati." idi.

49 Oomhiin iifiin yꞌamna aaraw taktakee dehaay, "Uun aabuuyt, tumaagnaay afooyiini?" idiin.

50 Yasuuꞌa tutakatii dehaay, "Wꞌiimaanuuk ishidhhan hooki. Asgaa giigii!" idi.