1 Malya Yasuuꞌa ikwiriyaatayeeh dehaay mitaal hadiidiya. Nigwooy baadi diimaab siileeleeneet toona bareeh sooya. 2 Baruuh "Madiinaat gaanaatiib Ukwaasana baaraakwi gaadi, oodehay baaꞌamshabiib iifi. 3 Beet tumadiinaatiib ibraatfaatkiit oon ugaadii dehaay yꞌeetiit, ‘Ugariimiyu kehii adli hukwim amarriyeet toona aharriiw’ tidi.

4 Ugaadi door gaal naat oodꞌuuy dehaay irib. Laakiin malya baruuh ugarooyooh dehaay, ‘Ani Ukwaasana baarakwiyeek han, tari oodehay baaꞌamshabiibeek han, 5 laakiin toon tutakat diimaab aneeb gallabtiniit, wꞌadil marriyeet toonaatiib iishtam andi. Aflaay batuuh girmaayt hawriik hoosu iikti kitdi.’ idi." idi Yasuuꞌa.

6 Wꞌankwana masi, "Ugaadi udaalim indiyeet toona sinaakirna. 7 Ukwaasana udehayooh iwaasamaab diima whawaadwa oombꞌeewwa barooh waliikeen baliib wꞌadlii haakamiiniyeet toona kitti han? Bareeh willa dehaay gwanbiyeet toona kitti han? 8 Ani andi hookna, uudoor yꞌiiniyihoob, baruuh willa bareeh wꞌadlii haakamiini. Laakiin Wꞌaadami Oor yꞌiiniyihoob, tubuutiib iimaan imaar indi?" idi.

9 Dehay gali igarooyeehna oodehay iraweeka hayiskaab hiisiina, aree oodehay eeraw kasseeh abaabiin. Yasuuꞌa bareeyooh dehaay een eemtaal hadiidiya: 10 "Malu da Ukwaasanaay gawiib siileeltiib yhiriwnayt, asti reewiyaan. Uungaal Fariisiibu, uuraaw tilbaat tamnaabi. 11 Ufariisi yakiyaayt ugarooyooh dehaay bak idiit siileeliya, ‘Ukwaasanaayu, ahamid hook, ani oodehay eeraw tꞌiiteeb kaaki - igwiharanaawwa, toomaag sakanaawwa, ijakiinaawwa tꞌiiteeb kaaki. Tari oon utilbaat tamana tꞌiiteeb han kaaki. 12 Ani malu doora tꞌasaramaatiib baaskiitani. Kastooh toona tꞌamarriyeetiib titamnaat takwi hooy mhalani.’ idi.

13 Laakiin utilbaat tamana sagi mhiin ingadaayt siileeliya. Baruuh teebri beeti han nakamaab kiiki. Laakiin iginheeh ithꞌaayt, ‘Ani amaag sakan, Ukwaasanaay arhamaaheeb.’ idi.

14 Ani andi hookna: Uun uutak utilbaat tamana Ukwaasanaay suurii shibooba ugawooh ibi. Laakiin Ufariisi shiboobaab kiiki.

Ugarooyooh tageegsiiniibka miskiinami indi, ugarooyooh miskiin ikwasiibka tageegi indi." idi.

15 Dehay gali inisrikaayeehna isidehirnee Yasuuꞌii dehaay haay eeyaan. Laakiin ikwiriyaatayaah een rhiyaanihoob, bareeh idninna. 16 Yasuuꞌa yꞌar waliikiyaayt, "Yꞌar aneeb beeti suurbeena. Bareeh hassaana, baaꞌafiina! Een bareeh tꞌiiteeb Ukwaasanaayt tehadꞌaayi bareetooh tikati. 17 Oosdik andi hookna, Ukwaasanaayt tehadꞌaayi oon wꞌoor udabalu tꞌiiteena baaꞌashiishka, batooh door han shuumi kiidi." idi.

18 Haakim gaal Yasuuꞌaab raatiya, "Seedna udaayi! Umidhhan udaayim amarriyee dehaay ibakii naan sakaniyeet toonaatu?" idi.

19 Laakiin Yasuuꞌa, "Naanhooy ‘Udaayi’ tindiyaheeb? Ukwaasana oongaal nuun weer daayi kiihaay. 20 Baruuk tiwasi tikteena: ‘Baajakiina, baadira, baagwihaara, gwisreet badeha baahadiida, baabookwa deetookwa haamooysa!’ iyadna." idi.

21 Uutak, "Teen tiwasi kasteeh ani dabalu oor iiktiyi door haay shagaami." idi.

22 Yasuuꞌa een ibhali imaasiwihoob, bariiyooh dehaay, "Gaana masi hook nakwistu, kassooh oomraay itibariyeeb daalbaat, malyaab imhallaga oodehay imiskiina hiiyya! Aree baruuk tibreeteeb miraay imaar tindiya. Beenaay harꞌii mꞌaat aneeb ramaheeb!" idi.

23 Uutak een ibhali imaasiwihoob, winneet gaba takuuyt, akraab yhasi. 24 Yasuuꞌa utakiit hasiyaay rhiyihoob, "Oodehay igabaab Ukwaasanaayt hadꞌaayeeti shuumti dehaay akraabu! 25 Uudehay igaba Ukwaasanaayt hadꞌaayeeti shuumtiika, kaam miilaltiit tilꞌiiti whassiti laamakaabu." idi.

26 Een ibhali imaasiw baliin raatiyaana, "Aflaay aaw adgiriit iidhhan indi?" idiin.

27 Yasuuꞌa igwibi, "Uudehay biiꞌadgirayneet toona Ukwaasanaay geeb adgiramtini." idi.

28 Bitrus bariiyooh dehaay, "Hinin barook neetriimi jillaay niibriyeena kastooh ishaaba!" idi.

29 Yasuuꞌa bareeyooh dehaay, "Oosdik andi hookna, tak gawooh, tari takatooh, tari isanaayeeh, tari ifarooyeeh, tari yꞌareeh Ukwaasanaayt hadꞌaayeeti jillaay inꞌiish, 30 oon udamaan oonaay gwidakaana imaar indi. Aree gayii yꞌiiniib udamaaniib umidhhan udaayim imaar indi." idi.

31 Malya Yasuuꞌa itamna malu eebhat iyhaayt bareeh sooya, "Oontꞌa Algudus beeti saknay, inabiya Wꞌaadami Ooriib iktibneet tuuna kastuuh iikti tindi. 32 Baruuh Ijintiili ayeeb daasami indi. Baraah barooh haay kashi iyadna, barooh neewi iyadna, bariiyooh kehii tifi iyadna. 33 Malya barooh iithꞌa iyadna aree idaar iyadna. Laakiin tooyin tumhaya baruuh tuyatii yaki indi." idi.

34 Ikwiriyaatay een ibhali naat han hooy afhamaab kiikeen. Beet tuuna bareesooh kwabaastu, aree baraah baruuh naanaatiib hadiidiyeeb kanaab kiikeen.

35 Yasuuꞌa Ariihaab iidneet madiina idwilihoob, tak hamashay usalali daraag iistꞌa oodehay iinꞌal iifi. 36 Uun uutak gwida dehay hasamiinaayi hiss imaasiwihoob, baruuh naan tiiktiyeeb sakanaaya. 37 Baraah barooh sooyaana, "Yasuuꞌa Unaasiraayi tooysii hasamiini." idiin.

38 Uutak tageega hissii waliikiya, "Yasuuꞌa, Daawidi Oor, arhamaaheeb!" idi.

39 Uudehay Yasuuꞌaay suurii sakiin baliin, tim iiktiyeet toonaati jillaay barooh idninna. Laakiin baruuh winneet masi waliikiya, "Daawidi Oor, arhamaaheeb!" idi.

40 Yasuuꞌa ingadaayt, been ootak haay yꞌeeneet toona galib sooya. Uutak idwilihoob, Yasuuꞌa barooh raatiya, 41 "Naan harriiwa? Naan dehook sakani?" idi.

Uutak, "Wꞌankwanaay, ani rhaniyeet aharriiw." idi.

42 Yasuuꞌa bariiyooh dehaay, "Shibiba aree rhi tindiya! Wꞌiimaanuuk isinꞌir hook." idi. 43 Uutak igidiyeesooh rhiyaayt Yasuuꞌaab iram, aree Ukwaasana yhamid. Uudehay kassaah toona tutikeet rhiyaanihoob, baraah han Ukwaasana yhamidna.