1 इतिहास 10

शाऊल की मौत

1 एक दिन पलिश्ती इस्राएलियाँ तै लड़े; अर इस्राएली पलिश्तियाँ कै स्याम्ही तै भाज्जे, अर गिलबो नाम के पहाड़ पै मारे गए। 2 पर पलिश्ती शाऊल अर उसके बेट्यां कै पाच्छै लाग्गे रहे, अर पलिश्तियाँ नै शाऊल के बेट्टे योनातान, अबीनादाब अर मल्कीशूअ ताहीं मार गेरया। 3 शाऊल कै गैल घमासान युद्ध होन्दा रह्या अर धनुर्धारियाँ नै उस ताहीं जा लिया, अर वो उनकै कारण व्याकुल होग्या। 4 फेर शाऊल नै अपणे हथियार ढोणआळे तै कह्या, "अपणी तलवार खींचकै मेरै घोप दे, कदे इसा ना हो के वे खतनारहित माणस आकै मेरा मजाक करैं;" पर उसके हथियार ढोणआळे नै भयभीत होकै इसा करण तै इन्कार करया। फेर शाऊल अपणी तलवार खड़ी करकै उसपै गिर पड्या। 5 या देखकै के शाऊल मर ग्या सै उसका हथियार ढोणआळे अपणी तलवार पै आप गिरकै मर ग्या। 6 इस तरियां शाऊल अर उसके तीन्‍नु बेट्टे, अर उसके घरान्‍ने के सारे माणस एक साथ मर गए।*10:6 साथ मर गए। पूरा परिवार न्ही, सारे बेट्टे। 7 या देखकै के वे भाज गए, अर शाऊल अर उसके बेट्टे मर गए, उस तराई म्ह रहणआळे सारे इस्राएली माणस अपणे-अपणे नगर नै छोड़कै भाजगे; अर पलिश्ती आकै उन म्ह रहण लाग्गे।

8 दुसरे दिन जिब पलिश्ती मारे होयां के माल नै लूटण आए, फेर उननै शाऊल अर उसके बेट्टे गिलबो पहाड़ पै पड़े होए मिले। 9 फेर उननै उसके कपड़ेयां ताहीं उतार उसका सिर अर हथियार ले लिए अर पलिश्तियाँ के देश के सारी जगहां म्ह दूत्तां ताहीं ज्यांतै भेज्या के उनके देवत्यां अर साधारण माणसां म्ह यो शुभ समाचार देन्दे जावैं। 10 फेर उननै उसके हथियार अपणे मन्दर म्ह धरे, अर उसकी खोपड़ी ताहीं उनके देवता दागोन कै मन्दर म्ह लटका दी। 11 जिब गिलाद के याबेश के सारे माणसां नै सुण्या के पलिश्तियाँ नै शाऊल कै गैल के-के करया सै। 12 फेर सारे शूरवीर चाल्‍ले अर शाऊल अर उसके बेट्यां की लाश ताहीं ठाकै याबेश म्ह ले आए, अर उनकी हाड्डियाँ ताहीं याबेश म्ह एक बांज दरखत कै तळै गाड़ दी अर सात दिन ताहीं उपवास करया।

13 इस तरियां शाऊल उस बिश्वासघात कै कारण मर ग्या, जो उसनै यहोवा तै करया था; क्यूँके उसनै यहोवा का वचन टाळ दिया था, फेर उसनै भूत-सिद्धि करण आळी तै पूछ कै सलाह ली थी। 14 उसनै यहोवा तै ना पूच्छया था, ज्यांतै यहोवा नै उस ताहीं मारकै राजपाट ताहीं यिशै के बेट्टे दाऊद तै दे दिया।