दाऊद की आखरी सभा अर निर्देशन
1 अर दाऊद नै इस्राएल के सारे हाकिमां ताहीं, यानिके गोत्रां के हाकिमां अर राजा की सेवा पाणी करण आळे दलां के हाकिमां ताहीं अर सहस्त्रपतियाँ अर शतपतियाँ अर राजा अर उसके बेट्यां के पशु आदि सारे धन-सम्पत्ति के अधिकारियां, सरदारां अर वीरां अर सारे शूरवीरां ताहीं यरुशलेम म्ह बुलवाया। 2 फेर दाऊद राजा खड़या होकै कहण लाग्या, "हे मेरे भाईयो! अर हे मेरी प्रजा के माणसों! मेरी सुणो, मेरी मनसा तो थी के यहोवा की वाचा के सन्दूक कै खात्तर अर हम माणसां के परमेसवर के चरणां की पीढ़ी28:2 चरणां की पीढ़ी दाऊद वाचा के सन्दूक नै परमेसवर के चरणां की पीढ़ी कहवै सै क्यूँके वो उसकै उप्पर विराजमान रहया करदा या उस प्रकाशमान बाद्दळ म्ह जो दया के आसन एवं करूबां के बिचाळै था। कै खात्तर विश्राम का एक भवन बणाऊँ, अर मन्नै उसके बणाण की त्यारी करी थी। 3 पर परमेसवर नै मेरै तै कह्या, ‘तू मेरे नाम का भवन बणाण न्ही पावैगा, क्यूँके तू युद्ध करण आळा सै अर तन्नै लहू बहाया सै।’ 4 फेर भी इस्राएल के परमेसवर यहोवा नै मेरे पिता के सारे घरान्ने म्ह तै मेरै ताहीं चुण लिया, के इस्राएल का राजा सदा बण्या रहूँ यानिके उसनै यहूदा ताहीं प्रधान होण कै खात्तर अर यहूदा के घरान्ने म्ह तै मेरे पिता के कुण्बे ताहीं चुण लिया अर मेरे पिता के बेट्टयाँ म्ह तै वो मेरे ताहीं सारे इस्राएल का राजा बणाण कै खात्तर खुश होया। 5 अर मेरे सारे बेट्टयाँ म्ह तै (यहोवा नै तो मेरे तै घणे बेट्टे दिए सैं) उसनै मेरे बेट्टे सुलैमान ताहीं चुण लिया सै, के वो इस्राएल कै उप्पर यहोवा के राज्य की गद्दी पै विराजै। 6 अर यहोवा नै मेरे तै कह्या, ‘तेरा बेट्टा सुलैमान ए मेरे भवन अर आँगणां नै बणावैगा, क्यूँके मन्नै उस ताहीं चुण लिया सै के मेरा बेट्टा ठैहरे, अर मै उसका पिता ठहरूँगा। 7 अर जै वो मेरे हुकम अर नियमां कै मानण म्ह आजकाल के बराबर मजबूत रहवै28:7 मजबूत रहवै दाऊद तै जो प्रतिज्ञा करी गई वो शर्त पै आधारित थी अर यहूदी सिंहासन पै उसके वंश का बैठणा वो शर्त पै आधारित था (2 शमू 7:14) इब साफ तौर तै घोषित करया गया।, तो मै उसका राज्य सदा स्थिर राक्खूँगा।’ 8 इस खात्तर इब इस्राएल के देखदे यानिके यहोवा की मण्डळी के देखदे, अर अपणे परमेसवर कै स्याम्ही, अपणे परमेसवर यहोवा के सारे हुकमां नै मान्नो अर उनपै ध्यान करदे रहो; ताके थम इस आच्छे देश के अधिकारी बणे रहो, अर इस ताहीं अपणे बाद अपणे वंश का सदा का भाग होण कै खात्तर छोड़ जाओ।"
9 "हे मेरे बेट्टे सुलैमान! तू अपणे पिता के परमेसवर का ज्ञान राख, अर खरे मन अर खुश जी तै उसकी सेवा करदा रह; क्यूँके यहोवा मन नै जाँच्चै अर विचार म्ह जो कुछ पैदा होवै सै उसनै समझै सै। जै तू उसकी खोज म्ह रहवै, तो वो तन्नै मिलैगा; पर जै तू उसनै त्याग दे तो वो सदा खात्तर तेरै ताहीं छोड़ देगा। 10 इब चौक्कस रह, यहोवा नै तेरे ताहीं एक इसा भवन बणाण खात्तर चुण लिया सै, जो पवित्र जगहां ठहरैगा, हियाव बाँधकै इस काम म्ह लाग जा।"
11 फेर दाऊद नै अपणे बेट्टे सुलैमान तै मन्दर के ओसारे, कोठड़ियाँ, भण्डारां, अटारियाँ, भीतरी कोठड़ियाँ, अर प्रायश्चित के ढक्कण के जगहां का नमूना, 12 अर यहोवा के भवन के आँगणां अर च्यांरु और की कोठड़ियाँ, अर परमेसवर के भवन के भण्डारां अर पवित्र करी होई चिज्जां कै भण्डारां के, जो-जो नमूने परमेसवर के आत्मा की प्रेरणा तै उस ताहीं मिले थे, वे सारे दे दिए। 13 फेर याजकां अर लेवियाँ के दलां, अर यहोवा के भवन की सेवा के सारे काम्मां, अर यहोवा के भवन की सेवा के सारे सामान, 14 यानिके सारी ढाळ की सेवा कै खात्तर सोन्ने के बरतनां कै निमित्त सोन्ना तौलकै, अर सारी ढाळ की सेवा कै खात्तर चाँदी के बरतनां कै निमित्त चाँदी तौल कै, 15 अर सोन्ने की दीवटां कै खात्तर, अर उनके दीव्यां कै खात्तर हर एक दीवट, अर उसके दीव्यां का सोन्ना तौलकै अर चाँदी के दीवटां कै खात्तर एक-एक दीवट, अर उसके दीवे की चाँदी, हर एक दीवट के काम कै मुताबिक तौल कै, 16 अर भेंट की रोट्टी की मेजां कै खात्तर एक-एक मेज का सोन्ना तौलकै, अर चाँदी की मेजां कै खात्तर चाँदी, 17 अर शुद्ध सोन्ने के काँटों, कटोरयां अर प्यालां अर सोन्ने की कटोरियां कै खात्तर एक-एक कटोरी का सोन्ना तौलकै, अर चाँदी की कटोरियां कै खात्तर एक-एक कटोरी की चाँदी तौल कै, 18 अर धूप की वेदी कै खात्तर त्याया होया सोन्ना तौलकै, अर रथ यानिके यहोवा की वाचा का सन्दूक28:18 वाचा का सन्दूक वाचा का सन्दूक खुद सै। यहोवा करूबां पै सवारी करै सै, अत: वे उसका रथ सै। (भजन. 18:10, भजन. 99:1) ढ़कण आळे अर पंख फैलाए होए करूबां के नमूने कै खात्तर सोन्ना दे दिया। 19 दाऊद नै सुलैमान तै कह्या "मन्नै यहोवा की शक्ति तै जो मेरै ताहीं मिली, यो सारा किमे बूझ कै लिख दिया सै।"
20 फेर दाऊद नै अपणे बेट्टे सुलैमान तै कह्या, "हियाव बाँध अर मजबूत होकै इस काम म्ह लाग जा। डर मत, अर तेरा मन कच्चा ना हो, क्यूँके यहोवा परमेसवर जो मेरा परमेसवर सै, वो तेरै गैल सै; अर जिब तक यहोवा कै भवन म्ह जितना काम करणा हो वो ना हो ले, तब तक वो ना तो तन्नै धोक्खा देवैगा अर ना तन्नै त्यागैगा। 21 अर देख परमेसवर के भवन के सारे काम कै खात्तर याजकां अर लेवियाँ के दल ठहराए गए सैं, अर सारी ढाळ की सेवा कै खात्तर सारे ढाळ के काम खुशी तै करण आळे बुद्धिमान माणस भी तेरा साथ देवैंगे; अर हाकिम अर सारी प्रजा के माणस भी जो कुछ तू कहवैगा वोए करैंगे।"